នៅក្នុងសុន្ទរកថាសំខាន់មួយស្តីពីការប្រែប្រួលជាប្រវត្តិសាស្ត្រក្នុងភូមិភាគមជ្ឈិមបូព៌ា និងផ្នែកខាងជើងនៃទ្វីបអាហ្វ្រិក លោកប្រធានាធិបតីបារ៉ាក់ អូបាម៉ាមានប្រសាសន៍ថា សហរដ្ឋអាមេរិកឈរយ៉ាងមាំទាំនៅខាងប្រជារាស្ត្រដែលធ្វើការតវ៉ាឱ្យមានកំណែទម្រង់ប្រជាធិបតេយ្យ និងប្រឆាំងនឹងអំពើហិង្សាដែលបានត្រូវប្រើប្រាស់ដោយរដ្ឋាភិបាលខ្លះប្រឆាំងនឹងក្រុមបាតុករ។ សុន្ទរកថារបស់លោកប្រធានាធិបតី ដែលលោកបានថ្លែងនៅឯក្រសួងការបរទេស ជាការផ្សំមួយរវាងការផ្តល់ជំនួយ និងការគំរាមកំហែងនៅពេលលោកប្រកាសអំពីការផ្តល់ជំនួយថ្មីដើម្បីជួយឱ្យលទ្ធិប្រជាធិបតេយ្យ ដែលចាក់ឫសនៅក្នុងប្រទេស អេហ្ស៊ីប និងទុយនីស៊ី ហើយលោកបានថ្កោលទោសយ៉ាងខ្លាំងដល់ប្រធានាធិបតីនៃប្រទេសស៊ីរីចំពោះការបង្ក្រាបរបស់លោកលើក្រុមបាតុករដែលបានធ្វើការតវ៉ាដោយសន្តិវិធី។
ដោយមានប្រសាសន៍ថា សហរដ្ឋអាមេរិកនឹងនិយាយដើម្បីគោលការណ៍ស្នូល និងសិទ្ធិសាកល និងជំទាស់នឹងការប្រើប្រាស់អំពើហិង្សា និងការបង្ក្រាប លោកអូបាម៉ាបានបញ្ជាក់ច្បាស់លាស់អំពីគោលជំហររបស់សហរដ្ឋអាមេរិកស្តីពីការប្រែប្រួលក្នុងតំបន់នោះ។ លោកប្រធានាធិបតីមានប្រសាសន៍ថា៖
«យើងគាំទ្រដល់កំណែទម្រង់នយោបាយ និងសេដ្ឋកិច្ចក្នុងភូមិភាគមជ្ឈិមបូព៌ា និងផ្នែកខាងជើងនៃទ្វីបអាហ្វ្រិកដែលអាចបំពេញសេចក្តីប្រាថ្នាត្រឹមត្រូវតាមច្បាប់របស់ក្រុមប្រជារាស្ត្រសាមញ្ញនៅទូទាំងតំបន់នោះ។ ការគាំទ្ររបស់យើងដល់គោលការណ៍ទាំងនេះមិនមែនជាការយកចិត្តទុកដាក់បន្ទាប់បន្សំទេ។នៅថ្ងៃនេះខ្ញុំចង់និយាយឲ្យច្បាស់លាស់ថា វាជាអាទិភាពកំពូលមួយដែលត្រូវតែធ្វើឱ្យក្លាយទៅជាសកម្មភាពជាក់ស្តែង និងត្រូវគាំទ្រដោយការទូត សេដ្ឋកិច្ច និងយុទ្ធសាស្ត្រដែលយើងមាន»។
ដើម្បីជួយឱ្យលទ្ធិប្រជាធិបតេយ្យចាក់ឫសក្នុងប្រទេសនានាដូចជាប្រទេស អេហ្ស៊ីប និងទុយនីស៊ីជាដើម លោកប្រធានាធិបតីអូបាម៉ាបានប្រកាសអំពីការផ្តើមគំនិតថ្មីៗដើម្បីគាំទ្រដល់ការកែទម្រង់សេដ្ឋកិច្ច ទំនើបកម្ម និងវិនិយោគ។
ទាំងអស់នេះមានរួមបញ្ចូលការសម្រាលបំណុលសម្រាប់អេហ្ស៊ីប និងសំណើមួយរបស់សហរដ្ឋអាមេរិកដល់ធនាគារពិភពលោក និងអង្គការមូលនិធិរូបិយវត្ថុអន្តរជាតិឱ្យរៀបចំផែនការមួយដើម្បីធ្វើឱ្យសេដ្ឋកិច្ចនៃប្រទេសទាំងពីរនេះមានស្ថិរភាព។ លោកអូបាម៉ាបានភ្ជាប់រលកនៃការបះបោរនៅទូទាំងតំបន់នោះទៅនឹងសេចក្តីត្រូវការខាងសេដ្ឋកិច្ចដែលមិនបានសម្រេចតាមបំណងរបស់ប្រជារាស្ត្រ។ លោកប្រធានាធិបតីបន្តថា៖
«ជាសរុប នយោបាយតែមួយមិនបានធ្វើឱ្យក្រុមអ្នកតវ៉ាទៅធ្វើបាតុកម្មតាមផ្លូវទេ។ ចំណុចសំខាន់សម្រាប់មនុស្សច្រើននាក់គឺកង្វល់នៃការរកម្ហូបអាហារសម្រាប់គ្រួសារ។ មនុស្សច្រើននាក់ក្នុងតំបន់នោះងើបពីដំណេកដោយមានការរំពឹងបន្តិចបន្តួចអំពីម្ហូបអាហារសម្រាប់ថ្ងៃនោះ ហើយប្រហែលមានក្តីសង្ឃឹមថា វាសនារបស់ពួកគេនឹងផ្លាស់ប្តូរ»។
លោកប្រធានាធិបតីបានមានប្រសាសន៍ថា ការប្រែប្រួលជាប្រវត្តិសាស្ត្រនៅក្នុងភូមិភាគមជ្ឈិមបូព៌ា និងប៉ែកខាងជើងនៃទ្វីបអាហ្វ្រិកជាការផ្ទុយស្រទ្បះនឹងមនោគមវិជ្ជាប្រកបដោយហិង្សារបស់អង្គការ អាល់កៃដា និង អូសាម៉ា ប៊ិន ឡាដិន ដែលត្រូវបានសម្លាប់ក្នុងការវាយឆ្មក់មួយដោយអាមេរិកក្នុងប្រទេស ប៉ាគិស្ថាន។ ដោយថ្លែងថា ប៊ិន ឡាដិន“មិនមែនជាទុក្ករជនទេ ក៏ប៉ុន្តែជាឃាតករម្នាក់ដែលបានសម្លាប់មនុស្សអស់ជាច្រើននាក់។ លោកប្រធានាធិបតីបានមានប្រសាសន៍ថា ប្រជារាស្ត្រនៃភូមិភាគមជ្ឈិមបូព៌ា និងផ្នែកខាងជើងនៃទ្វីបអាហ្វ្រិកបានច្រានចោលរួចស្រេចហើយនូវរបៀបវារៈរបស់ពួក អាល់កៃដា។
ប្រែសម្រួលដោយ ឈឹម សុមេធ
