ប្រធានាធិបតីបារ៉ាក់ អូបាម៉ា បានវិលត្រឡប់មកពីដំណើរទស្សនកិច្ច៦ថ្ងៃនៅក្នុងប្រទេសអឺរ៉ុប។ លោកប្រធានាធិបតីចំណាយពេលច្រើននៃទស្សនកិច្ចរបស់លោកដើម្បីបញ្ជាក់ថាសម្ព័ន្ធភាពរវាងស.រ.អា.និងអឺរ៉ុបជាកិច្ចការសំខាន់។
ប្រធានាធិបតីអូបាម៉ា មិនបានចុះហត្ថលេខាលើកិច្ចព្រមព្រៀងធំដុំណាមួយ ឬក៏មិនបានប្រកាសអំពីការផ្លាស់ប្ដូរនយោបាយធំធេងណាមួយទេ នៅក្នុងសប្ដាហ៍នេះ នៅក្នុងប្រទេសអឺរ៉ុបនោះ។ តែលោក ហាក់ដូចជាធ្វើឲ្យបានសម្រេចនូវគោលដៅចម្បងនៃដំណើរទស្សនកិច្ចរបស់លោក ដោយលោកបានធានាប្រាប់ក្រុមមន្ដ្រីអឺរ៉ុបថា សម្ព័ន្ធភាពឆ្លងមហាសមុទ្រអាត្លង់ទិចនៅតែមានសារៈសំខាន់ចំពោះ ស.រ.អា.។ សង្រ្គាមនៅក្នុងប្រទេសអ៊ីរ៉ាក់ និងអាហ្វហ្កានិស្ថាន ការបះបោរនៅមជ្ឈឹមបូព៌ា សេដ្ឋកិច្ចលូតលាស់ខ្លាំងនៅអាស៊ី និងវិបត្ដិសេដ្ឋកិច្ចនៅស.រ.អា.ស្ថិតនៅក្នុងការផ្ដោតគំនិតខ្លាំងរបស់លោក អូបាម៉ា ចាប់តាំងពីលោកឡើងកាន់តំណែងជាប្រធានាធិបតីមកនោះ។ បន្ថែមពីនេះរដ្ឋបាលលោកអូបាម៉ា បានប្រកាសនឹងចាត់ទុកវេទិកាអំពីសេដ្ឋកិច្ចនៃក្រុមប្រទេសមានឧស្សាហកម្មជឿនលឿន
G 20ជាមួយប្រទេសសមាជិកមកពីគ្រប់ទីកន្លែងក្នុងពិភពលោកថា មានសារៈសំខាន់លើសពីក្រុមអឺរ៉ុប G 8 ទៅទៀត។
លោកអូបាម៉ា ចាប់ផ្ដើមបេសកកម្មការទូតរបស់លោក នៅក្នុងប្រទេសអៀឡង់។ លោកបានជួបសន្ទនាជាមួយមេដឹកនាំប្រទេស បានពិសាស្រាបៀរ នៅក្នុងហាងនៃទីក្រុង ម៉នីហ្កល (Moneygall) ទីកន្លែង កំណើតជីដូន ជីតារបស់លោក ហើយបានប្រកាសកេរ្ដិ៍ដំណែលអៀឡង់របស់លោកនៅមុខសាធារណជនរាប់ពាន់ម៉ឺននាក់ក្នុងទីក្រុងដឺប្លិន (Dublin)។
“ហេឡូ ដឺប្ល៊ិន" “ហេឡូ អៀឡង់"។ " ខ្ញុំឈ្មោះ បារ៉ាក់ អូបាម៉ា មកពីទីក្រុងម៉នីហ្កលអូបាម៉ាស៍ (Moneygall Obamas)"។
លោកមិនបានសន្យាជួយជាថវិកាដល់សេដ្ឋកិច្ចដុនដាបរបស់ប្រទេសអៀឡង់ទេ តែលោកសច្ចានឹងគាំទ្រផ្លូវចិត្ដ។
បន្ទាប់មក លោក អូបាមាបានទៅទស្សនាប្រទេសអង់គ្លេស។ ស.រ.អា.និងអង់គ្លេសជាសម្ព័ន្ធមិត្ដជិតស្និទ្ធចាប់តាំងពីសតវត្សរ៍ទី១៩ ហើយជាប្រទេសដៃគូពាណិជ្ជកម្មដ៏ធំបង្អស់ ក្នុងពិភពលោក។ តែនៅពេលមានការខុសឆ្គងក្នុងពិធីការមួយចំនួន និងរបៀបមើលងាយ នៅអតីតកាលពេលពិធីបុណ្យសម្ពោធឡើងកាន់តំណែងប្រធានាធិបតីនោះ បានធ្វើឲ្យគេងឿងឆ្ងល់មកលើសុខភាពនៃការទាក់ទងគ្នា ដែលគេហៅថា ទំនាក់ទំនងពិសេសនោះ។
ក្រុមអង់គ្លេសកម្រផ្ដល់កិត្ដិយសមកលើទស្សនកិច្ចតាមផ្លូវការរដ្ឋ រាប់ទាំងការផ្ដល់ឱកាសនៃការថ្លែងសុន្ទរកថាទៅកាន់សភាអង់គ្លេសនៅក្នុងអគាររដ្ឋសភាវែសមិនស្ទ័រហល (Westminster Hall) ដែលមានអាយុ ៩០០ឆ្នាំ។នៅទីនោះ លោក អូបាម៉ាបង្ហាញថា ការយល់ឃើញថា ប្រទេសមានសេដ្ឋកិច្ចលូតលាស់ថ្មីៗ ដូចជាចិន ឥណ្ឌា និងប្រ៊េស៊ីលនឹងជំនួសប្រទេសអាមេរិក និងអង់គ្លេស ក្នុងនាមជាប្រទេសដឹកមុខពិភពលោកនោះ គឺជាការយល់ខុស។
«ការយល់ឃើញដូច្នោះ ខុសហើយ។ ពេលវេលានៃការដឹកនាំរបស់យើងគឺនៅពេលនេះ។ ស.រ.អា. និងអង់គ្លេស ហើយនិងប្រទេសសម្ព័ន្ធមិត្ដប្រជាធិបតេយ្យ របស់យើងបានជួយពិភពលោក ហើយមានប្រទេសខ្លះមានសេដ្ឋកិច្ចងើបធ្លោឡើង ហើយមានអ្នកខ្លះ ចម្រើនលូតលាស់។ ទោះជាមានប្រទេសជាច្រើនបានចាប់ផ្ដើមការទទួលខុសត្រូវក្នុងថ្នាក់ដឹកនាំសកលក៏ដោយ ក៏សម្ព័ន្ធមិត្ដរបស់យើងនៅតែមានការចាំបាច់នឹងធ្វើឲ្យសម្រេចដល់គោលដៅរបស់សតវត្សរ៍មួយ ដែលមានសន្ដិភាព ហើយ សម្បូរហូរហៀ»។
លោកប្រធានាធិបតី និងលោកនាយករដ្ឋមន្ដ្រី អង់គ្លេស ដេវីត ខាម៉ឺរ៉ុន (David Cameron) បានវែកញែកអំពីរឿងមួយចំនួន រាប់ទាំងប្រទេសលីប៊ី។ លោកនាយករដ្ឋមន្ដ្រី ហាក់ដូចជាគំាទ្រឲ្យមានវិធានការខ្លាំងក្លាក្នុងកិច្ចប្រឹងប្រែងបណ្ដេញមេដឹកនាំ មួអាម៉ារ កាដាហ្វ៊ី (Muammar Gadhafi) ចេញពីអំណាច តែលោក អូបាម៉ាអំពាវនាវឲ្យមានការប្រុងប្រយ័ត្នច្រើនបន្ថែម។ មេដឹកនាំប្រទេសទាំងពីររូបនោះបានបង្ហាញចំណងមិត្ដភាពផ្ទាល់ខ្លួនដ៏រឹងមាំ ដោយបានលេងកីឡាពីងប៉ុងជាមួយសិស្សនៅក្នុងទីក្រុងឡុងនិងបានបរិភោគ ហាមប៊ឺរហ្កឺរ (Hamburgers) នៅឯការិយាល័យនាយករដ្ឋមន្ដ្រីនៅអាស័យដ្ឋានផ្ទះលេខ១០ ផ្លូវដោននិង (Downing)។ រួចលោក អូបាម៉ា និងព្រះមហាក្សត្រីយានីនៃប្រទេសអង់គ្លេស អេលីហ្សាបែត (Elizabeth) បានបញ្ជាក់អំពីការប្រើប្រាស់ពាក្យ “ទំនាក់ទំនងពិសេស” នៅពេលលើកកែវស្រាសាមប៉ាញ ជូនពរគ្នាទៅវិញទៅមក នៅក្នុងការជប់លៀងថ្នាក់រដ្ឋ ក្នុង វំាងហ្លួង បឹកគិងហាម (Buckingham)។
ប្រធានាធិបតីអូបាម៉ាបានទៅចូលរួមក្នុងសន្និសីទសេដ្ឋកិច្ច G 8 ក្នុងទីក្រុង ដូវីល (Deauville) ប្រទេសបារាំង ដោយលោកស្វែងរកថវិកាដើម្បី យកទៅជួយប្រទេសអេហ្ស៊ីព ទុយណេហ្ស៊ី និងប្រទេសអារ៉ាប់មួយចំនួន ដែលបានបង្ហាញសក្ដានុពលនៃលទ្ធិប្រជាធិបតេយ្យ។
ក្រុមប្រទេសមានឧស្សាហកម្ម និងលទ្ធិប្រជាធិបតេយ្យ ជឿនលឿនទាំងនោះ មិនបានធ្វើការប្ដេជ្ញាចិត្ដដុំកំភួនទេ តែ និយាយថា គេនឹងផ្ដល់ថវិកា២០ពាន់លានដុល្លារទៅឲ្យអេហ្ស៊ីព និងទុយនេហ្ស៊ីសម្រាប់គម្រោងកែទម្រង់។
នៅក្នុងទីក្រុងដូវីល លោកអូបាម៉ាធ្វើមិនបានសម្រេចជោគជ័យក្នុងការពន្យល់ប្រធានាធិបតីរុស្ស៊ី ដេមីទ្រី មេដវ៉ឺដេវ (Dmitri Medvedev) ឲ្យជឿថា ប្រព័ន្ធការពារមីស៊ីលរបស់ស.រ.អា.មិនដាក់ទិសដៅ មកលើមីស៊ីលរុស្ស៊ីទេ។
យ៉ាងណាម៉ិញ លោក មេដវ៉ឺដេវ បានគាំទ្រកិច្ចប្រឹងប្រែងនៃការបណ្ដេញ លោក កាដាហ្វ៊ីចេញពីអំណាច ហើយនិងជួយរុញច្រានមេដឹកនាំលីប៊ីរូបនោះឲ្យស្ថិតនៅរឹតតែឆ្ងាយពីគេ។
នៅក្នុងទីក្រុងវ៉ាសូវី លោកអូបាម៉ាបានថ្លែងធានាប្រាប់ក្រុមមេដឹកនាំប៉ូឡូញថាទំនាក់ទំនងប្រសើរ ឡើងរវាងស.រ.អា. និងរុស្ស៊ីមិនមែនមានន័យថា ស.រ.អា.បន្ថយសេចក្ដីប្ដេជ្ញាចិត្ដរបស់រដ្ឋាភិបាល វ៉ាស៊ីនតោនក្នុងការការពារ ប្រទេសប៉ូឡូញ ដែលជាសមាជិករបស់បក្សសម្ព័ន្ធអូតង់នោះទេ៕
ប្រែសម្រួលដោយ អ៊ូ ធួក
