លោកប្រធានាធិបតីសហរដ្ឋអាមេរិក បារ៉ាក់ អូបាម៉ា កំពុងអំពាវនាវឲ្យចាត់វិធានការជាបន្ទាន់ អំពីការផ្លាស់ប្តូរអាកាសធាតុនៅថ្ងៃពុធនេះ នៅពេលដែលសេតវិមានបញ្ចេញរបាយការណ៍ថ្មីមួយ ស្តីពីផលប៉ះពាល់នៃការផ្លាស់ប្តូរអាកាសធាតុលើសន្តិសុខជាតិ។
លោកប្រធានាធិបតីអូបាម៉ា មានគម្រោងថ្លែងទៅកាន់ពិធីបញ្ចប់ការសិក្សារបស់ឆ្មាំការពារដែនសមុទ្រនៅក្នុងទីក្រុង New London រដ្ឋ Connecticut។
យោងទៅតាមការដកស្រង់ពីអត្ថបទនៃសន្ទរកថា លោកប្រធានាធិបតី អូបាម៉ា និយាយថា ទីតាំងកងទ័ពរបស់ប្រទេសជាតិនៅតាមឆ្នេរសមុទ្រ បានរងផលប៉ះពាល់រួចទៅហើយ ដោយកម្រិតទឹកសមុទ្រឡើង និងការរាំងស្ងួត ហើយការឆេះព្រៃអាចគំរាមកំហែងដល់តំបន់ហ្វឹកហ្វឺនកងទ័ពនៅឆ្នេរសមុទ្រភាគខាងលិចសហរដ្ឋអាមេរិក។
នៅតំបន់ខាងជើងឆ្ងាយ ទីតាំងកងទ័ពសហរដ្ឋអាមេរិកក្នុងរដ្ឋអាឡាស្កា បានទទួលការគំរាមកំហែងដោយស្រទាប់ដីក្រោមកកជានិច្ច។
លោកប្រធានាធិបតី អូបាម៉ាបានមានប្រសាសន៍ថា «អ្នកទាំងអស់គ្នាជាផ្នែកមួយនៃមន្រ្តីជំនាន់ទីមួយ បំរើការងារនៅក្នុងពិភពលោកដែលមានផលប៉ះពាល់ពីការផ្លាស់ប្តូរអាកាសធាតុកើតមានពិតប្រាកដទៅលើយើង។ ការផ្លាស់ប្តូរអាកាសធាតុនឹងមានឥទ្ធិពលលើមនុស្សគ្រប់រូបក្នុងផែនការសេវាកម្មរបស់យើង លើការធ្វើផែនការ លើប្រតិបត្តិការ លើការបំពាក់ឧបករណ៍ និងការពារហេដ្ឋារចនាសម្ព័ន្ធរបស់ពួកគេនៅថ្ងៃនេះ ហើយនិងសម្រាប់រយៈពេលយូរនៅថ្ងៃអនាគត»។
សេតវិមានបានប្រាប់ឲ្យដឹងថា មន្ទីរបញ្ចកោណកំពុងសិក្សាពីភាពរងគ្រោះថ្នាក់នៃមូលដ្ឋាននិងទីកន្លែងជាង៧០០០របស់កងទ័ពអាមេរិក ចំពោះការផ្លាស់ប្តូរអាកាសធាតុនេះ ហើយនិងលទ្ធភាពនៃការបង្កើនតម្រូវការឆ្មាំការពារដែនសមុទ្របន្ទាប់ពីគ្រោះមហន្តរាយធម្មជាតិ៕
