ភ្ជាប់​ទៅ​គេហទំព័រ​ទាក់ទង

នួន​ ជា អតីត​មេ​មនោគម​វិជ្ជា​នៃ​របប​កម្ពុជា​ប្រជាធិបតេយ្យ បាននិយាយ​នៅ​ថ្ងៃ​ពុធ​នេះ​ថា​ ប្រទេស​ចិន​បាន​ជួយ​គាំទ្រ​ពួក​ខ្មែរក្រហម​ដោយ​ឥត​លក្ខខណ្ឌ។​ ក៏ប៉ុន្ដែ​បាន​បដិសេធ​ការ​ជួយ​រៀបចំ​នយោបាយ​ដឹកនាំ​ពី​សំណាក់​ប្រទេស​ចិន។

អតីត​ប្រធាន​សភា​ខ្មែក្រហម​អាយុ ​៨៥​ឆ្នាំ​រូប​នេះ ​បាន​ឆ្លើយ​សំណួរ​របស់​លោក​ចៅក្រម​

ជីន ម៉ាក ឡាវែញ (Jean-Marc Lavèrnge) នៅ​ក្នុង​ការ​កាត់ក្ដី​របស់​អង្គជំនុំជម្រះ​សាលាដំបូង​ នៃ​សាលាក្តី​ខ្មែរក្រហម​កាល​ពី​ព្រឹកមិញ​ថា ចិន​កុម្មុយនិស្ដ​បាន​ផ្ដល់​ជំនួយ​សព្វាវុធ ស្បៀងអាហារ ​និង​ផលិតផល​ឧស្សាហកម្ម​ជា​ដើមដល់​ពួក​ខ្មែរក្រហម។ ជំនួយ​គឺ​ជា​ជំនួយ​គ្មាន​សំណង​ និង​គ្មាន​លក្ខខណ្ឌ។

«ជំនួយ​អាវុធ​ក៏​ដោយ ​ជំនួយ​ជា​ក្រណាត់​ក៏​ដោយ​ដូច​ជា​ខោអាវ​ សម្លៀកបំពាក់​ស្បៀងអាហារ​ខាង​ចិន​ប្រជាមានិត​ជួយ។ ​ជា​ជំនួយ​ឥត​លក្ខខណ្ឌ​ គ្មាន​សង​វិញ​ទេ»។

របប​កម្ពុជា​ប្រជាធិបតេយ្យ​របស់​ពួក​ខ្មែរក្រហម​ នៅ​ក្នុង​អំឡុង​ពេល​ក្ដោបក្ដាប់​អំណាច​ចន្លោះ​ពី​ថ្ងៃ​ទី​១៧ ​ខែ​មេសា ​ឆ្នាំ​១៩៧៥ ​ដល់​ថ្ងៃ​ទី​៦ ខែ​មករា​ ឆ្នាំ​១៩៧៩ បាន​បង្ក​ឲ្យ​ប្រជា​ពលរដ្ឋ​កម្ពុជា​ស្លាប់​បាត់​បង់​ជីវិត​អស់​យ៉ាងតិច​ចំនួន​១,៧ ​លាន​នាក់។ អតីត​ប្រមុខរដ្ឋ​នា​សម័យ​នោះ ​គឺ​ខៀវ ​សំផន​ អៀង​សារី អតីត​ឧបនាយក​រដ្ឋមន្ដ្រី ​និង​ជា​រដ្ឋមន្ដ្រី​ការបរទេស ​និង​នួន ​ជា ​បង​ធំ​ទី​ពីរ ​និង​ជា​មេ​មនោគម​វិជ្ជា​នៃ​របប​នេះ​កំពុង​ស្ថិត​ក្រោម​ការ​កាត់ទោស​ក្នុង​សំណុំរឿង​០០២។

ជន​ជាប់​ចោទ​នួន ​ជា ​បាន​ឆ្លើយ​នឹង​សំណួរ​របស់​លោក​ចៅក្រម​សញ្ជាតិ​បារាំង​ដដែល​ថា ​របប​ក្រុងប៉េកាំង ​បាន​ផ្គត់ផ្គង់​អ្នក​ជំនាញ​បច្ចេកទេស​ដល់​របប​ខ្មែរក្រហម ​ក៏ប៉ុន្ដែ​មិន​បាន​ជួយ​កាច់​ចង្កូត​នយោបាយ​នោះ​ទេ។

«មាន​អ្នក​ជំនួយ​ខាង​បច្ចេកទេស ​ខាង​រថភ្លើង។ មក​ជួយ​មើល​ផ្លូវ​រថភ្លើង​ពីព្រោះ​កាល​នោះ ​យើង​រៀបចំ​ផ្លូវ​រថភ្លើង​ឡើងវិញ។ ប៉ុន្ដែ​គ្មាន​អ្នក​ជំនួយ​ខាង​នយោបាយ​ទេ។ ​មាន​តែ​អ្នក​បច្ចេកទេស​ទេ»។

សេចក្ដី​អះអាង​របស់​ជន​ជាប់​ចោទ​រូប​នេះ​ ធ្វើ​ឡើង​ស្រដៀង​គ្នា​ជាមួយ​នឹង​សេចក្ដីថ្លែងការណ៍​របស់​អតីត​ឯក​អគ្គរដ្ឋទូត​ចិន​ប្រចាំ​ប្រទេស​កម្ពុជា​ លោកស្រី​ ចាង ជិន ហ្វឹង (Zhang Gin Feng)។ ​លោកស្រី​ ចាង ​មាន​ប្រសាសន៍​នៅ​វិទ្យាស្ថាន​ខុងជឺ ​ក្នុង​រាជបណ្ឌិត​សភា ​ទី​ក្រុង​ភ្នំពេញ ​កាល​ពី​ខែ​មករា ​ឆ្នាំ​ ២០១០ ​ថា​ ប្រទេសចិន «មិន​បាន​រួមចំណែក​ ឬ​អន្ដរាគមន៍» នៅ​ក្នុង​នយោបាយ​របស់​ពួក​ខ្មែរក្រហម​ទេ។ ក៏ប៉ុន្ដែ​ចិន​បាន​ផ្ដល់​ជំនួយ​ស្បៀង​អាហារ​ដល់​ប្រជាពលរដ្ឋ​កម្ពុជា​នៅ​ក្នុង​របប​នោះ​ដើម្បី​ជួយ​ស្រោកស្រង់​ប្រជាពលរដ្ឋ​កម្ពុជា​ពី​គ្រោះ​ទុរភិក្ស។
នួន ​ជា ​នៅ​ក្នុង​ការ​កាត់ទោស​នៅ​ថ្ងៃ​នេះ​បាន​ទទួល​ស្គាល់​ថា ​មាន​ការ​ខ្វះខាត​ស្បៀងអាហារ​នៅ​តាម​កន្លែង​ខ្លះ​តែ​ប៉ុណ្ណោះ​ក្នុង​របប​ដែល​ខ្លួន​គ្រប់គ្រង ​ហើយ​ការ​ខ្វះខាត​នោះ​មិន​ធ្ងន់ធ្ងរ​ទេ។ ក៏​ប៉ុន្តែ​ របាយការណ៍​ជា​ច្រើន​បង្ហាញ​ថា ​ពួក​ខ្មែរក្រហម​បាន​បង្អត់​អាហារ​ប្រជាពលរដ្ឋ​ខ្លួន​ឯង​មិន​ឲ្យ​មាន​ការ​ហូប​ចុក​គ្រប់គ្រាន់ ​ហើយ​ពួក​គេ​បាន​បង្ខំ​ឲ្យ​ប្រជាជន​ធ្វើ​ការ​ធ្ងន់ធ្ងរ​ដូច​ជា​ទាសករ។

នេះ​គឺ​ជា​លើក​ទី១​ហើយ​ដែល​អតីត​មេដឹកនាំ​កំពូល​ខ្មែរក្រហម​មួយ​រូប​បាន​បង្ហាញ​ពី​ការ​ជាប់​ពាក់ព័ន្ធ​ច្រើន​របស់​ចិន​ក្នុង​ការ​ដឹកនាំ​របស់​ខ្លួន។ ​ក្នុង​អំឡុង​ពេល​ចាប់​ផ្ដើម​សវនាការ​សំណុំរឿង​ ០០២ ​នួន ​ជា ​បាន​ធ្វើ​ការ​វាយប្រហារ​ជា​ច្រើន​លើ​ការ​ជាប់​ពាក់ព័ន្ធ​របស់​ប្រទេស​វៀតណាម៕

XS
SM
MD
LG