វ៉ាស៊ីនតោន៖ ប្រទេសកូរ៉េខាងជើង បានចេញផ្សាយរូបថតជាផ្លូវការលើកទីមួយរបស់លោក Kim Jong Un ដែលជាកូនប្រុស និងជាអ្នកបន្តតំណែងពីលោក Kim Jong Il មេដឹកនាំកូរ៉េខាងជើង។ រូបថតនេះ បានត្រូវផ្សព្វផ្សាយនៅក្រោយការប្រជុំសំខាន់មួយរបស់គណៈបក្សគ្រប់គ្រងប្រទេស ដែលបានតែងតាំងអ្នកនយោបាយជើងថ្មីនេះឱ្យកាន់តំណែងសំខាន់ៗ ក្នុងគណៈបក្ស និងក្នុងក្រុមយោធា។ ការថតរូបដែលគេចាត់ចែងឱ្យមាននេះ ចង្អុលបង្ហាញអំពីបញ្ហាដែលអាចកើតមាននៅក្រោយឆាក។
លោក Kim Jong Un ហាក់ដូចជាហ្មត់ចត់ក្នុងរូបថតនេះ ដោយលោកអង្គុយមិនញញឹមនៅជួរមុខនៃពួកមេដឹកនាំកូរ៉េខាងជើងជាន់ខ្ពស់២០០នាក់។ លោក Kim Jong Un ដែលមានអាយុជាង២០ឆ្នាំ និងមានសាច់ទ្រលុកទ្រលន់ អង្គុយនៅពីរកៅអីឃ្លាតពីលោក Kim Jong Il ដោយពាក់អាវធំស្រដៀងគ្នានឹងអាវធំពណ៌កាគីរបស់ឳពុកលោក។ ពួកមន្ត្រីក្រៅពីនេះពាក់អាវធំបើកកឬឯកសណ្ឋានយោធារូបថតនេះ ដែលបានត្រូវបោះពុម្ពផ្សាយក្នុងកាសែតជាផ្លូវការនៃប្រទេសកូរ៉េខាងជើង កំណត់ការបញ្ចប់សន្នសីទមិនសូវមានធ្វើមួយរបស់គណៈបក្សកម្មករដែលនៅក្នុងនោះពួកអ្នកធ្វើវិភាគរំពឹងថា លោក Kim Jong Un នឹងត្រូវតែងតាំងជាអ្នកបន្តតំណែងពីឳពុកលោក។ ក៏ប៉ុន្តែ លោក Gordon Flake អ្នកជំនាញការខាងកិច្ចការប្រទេសកូរ៉េនៅឯមូលនិធិ Mansfield ក្នុងរដ្ឋធានីWashington និយាយថាដំណើរការមានភាពសាំញ៉ាំជាងនេះ។
«អ្វីដែលយើងឃើញនៅទីនេះមិនមែនជាការបន្តតំណែងទេ។ អ្វីដែលយើងឃើញនៅទីនេះជាការបញ្ជាក់ជាសាធារណៈលើកដំបូងនៃការចាប់ផ្តើមដំណើរការនៃការបន្តតំណែង។ ក៏ប៉ុន្តែ លោក Kim Jong Il នៅកាន់អំណាចនៅទ្បើយ។ ដូច្នេះ នេះមិនមែនជាការគ្រប់គ្រងមួយបែបស្ថាប័នទេ។ នេះជាការគ្រប់គ្រងមួយបែបគ្រួសារផ្ទាល់ខ្លួន»។
នៅសន្និសីទក្នុងសប្តាហ៍ចុងក្រោយបង្អស់នៃខែកញ្ញា លោក Kim Jong Un និងម្តាយមីងលោក បានត្រូវតម្លើងឋានៈជាឧត្តមសេនីយផ្កាយបួន ទោះណាជាលោកនិងលោកស្រី មានការពិសោធន៍ខាងយោធាតែបន្តិចបន្តួចកាលពីពេលមុនក៏ដោយ។ លោក Kim Jong Un ក៏បានចូលរួមជាមួយឪពុកមាលោក ក្នុងការមើលការខុសត្រូវគណៈកម្មការសំខាន់មួយខាងកិច្ចការពារប្រទេស។
ជាយូរយារមកហើយ កងទ័ព ដែលមានសមាជិកជាងមួយលាននាក់ ជាអង្គការសំខាន់មួយរបស់រដ្ឋកូរ៉េខាងជើង ហើយលោក Kim Jong Il បានបង្កើនសារៈសំខាន់របស់ក្រុមយោធា នៅក្រោយទូរភិក្សដ៏ធ្ងន់ធ្ងរកាលពីទសវត្សរ៍ឆ្នាំ១៩៩០។ លោក Abe Denmark ធ្វើការនៅឯមជ្ឈមណ្ឌលសម្រាប់សន្តិសុខអាមេរិកាំងថ្មីមួយក្នុងរដ្ឋធានី Washington។ លោកនិយាយថា ការផ្តល់ឱ្យលោក Kim Jong Un ម្តាយមីង និងឳពុកមាលោកនូវតំណែងជាន់ខ្ពស់ក្នុងទីភ្នាក់ងារការពារប្រទេសជាវិធីមួយដើម្បីធ្វើឱ្យឥស្សរជនទាំងនេះមានភាពត្រឹមត្រូវតាមច្បាប់ក្នុងភ្នែកសាធារណជននិងរដ្ឋាភិបាល។
«នៅពេលដែលលោក Kim Jong Il កាន់អំណាចបន្តពីឳពុកលោក លោកពឹងពាក់លើស្ថាប័នជាច្រើនដែលបានជួយចាត់ចែងកិច្ចការរដ្ឋនៅពេលលោកទ្បើងមកកាន់អំណាចហើយលោកបានកំចាត់ស្ថាប័នជាច្រើនពីព្រោះស្ថាប័នទាំងនេះអាចជាអ្នកប្រកួតប្រជែងដើម្បីឥទ្ធិពលនិងអំណាច។ ហើយការណ៍ដែលលោក Kim Jong Il បានតម្លើងឋានន្តរស័ក្តិឱ្យសមាជិកខ្លះនៃក្រុមប្រឹក្សាការពារជាតិនិងបានចាត់វិធានការឯទៀតៗប្រហែលជាការប៉ុនប៉ងមួយដើម្បីកសាងជាថ្មីស្ថាប័នខ្លះៗក្នុងបណ្តាស្ថាប័នទាំងនេះដើម្បីជួយសម្រួលការបន្តតំណែងនេះ។”
លោក Flake នៃមូលនិធិ Mansfield និយាយថាការតម្លើងឋានៈយ៉ាងលឿនឱ្យដល់ញាតិសន្តានជិតស្និទ្ធរបស់លោក Kim Jong Il នឹងបង្កើតឱ្យមានភាពតានតឹងនៅក្នុងចំណោមក្រុមមន្ត្រីជើងចាស់ ហើយការណ៍នេះនឹងធ្វើឱ្យមានស្ថានភាពមិនប្រាកដប្រជាថែមទៀត។
“ខ្ញុំចង់និយាយថាប្រសិនបើមានបុព្វហេតុណាមួយនាំឱ្យមានការមួម៉ៅកាលពីសប្តាហ៍មុន គឺពួកឧត្តមសេនិយចាស់ៗទាំងនេះដែលបានឃើញឧត្តមសេនិយផ្កាយបួនថ្មីៗ៦នាក់បានត្រូវតម្លើងឋានន្តរស័ក្តិ ដោយមានរួមបញ្ចូលទាំងក្មេងអាយុ២៧ឆ្នាំដែលគ្មានការពិសោធន៍ខាងយោធាសោះម្នាក់ផង។”
របៀបធ្វើការផ្ទៃក្នុងនៃវិស័យនយោបាយកូរ៉េខាងជើងមានអាថ៌កំបាំងច្រើនបណ្តាលឱ្យពួកអ្នកធ្វើវិភាគនិងប្រជាជនកូរ៉េខាងជើងគិតស្មានៗអំពីការតានតឹងមានសភាពបែបណា។
លោក Choi Jin-wook ធ្វើការនៅឯវិទ្យាស្ថានកូរ៉េសម្រាប់ការបង្រួបបង្រួមជាតិជាថ្មីដែលចាត់ចែងដោយរដ្ឋាភិបាលក្នុងក្រុងសេអ៊ូល។ លោកនិយាយថាសេចក្តីត្រូវការយ៉ាងខ្លាំងរបស់កូរ៉េខាងជើងក្នុងការជំរុញសេដ្ឋកិច្ចខ្លួនឱ្យលូតលាស់អាចបំពេញមុខនាទីសំខាន់មួយក្នុងការប្រយុទ្ធដណ្តើមអំណាចគ្នាក្នុងប្រទេសកូរ៉េខាងជើង។ លោកChoi Jin-wook ថ្លែងថាប្រសិនបើរដ្ឋាភិបាលក្រុង Pyongyangប្រកាន់យករបៀបដោះស្រាយបែបផ្សះផ្សាមួយចំពោះកូរ៉េខាងត្បូងដើម្បីឱ្យបានផលប្រយោជន៍ខាងសេដ្ឋកិច្ច ការបែកបាក់គ្នារវាងពួកនាយទាហានជើងចាស់និងពួកមេដឹកនាំនយោបាយថ្មីៗអាចរីកធំបាន។
«ប្រសិនបើក្រុមយោធាជំទាស់នឹងអ្វីដែលហៅថាគោលនយោបាយផ្សះផ្សារបស់គណៈបក្សចំពោះពិភពលោកខាងក្រៅ ក្រុមយោធាប្រហែលធ្វើសកម្មភាពបង្ករឿងហេតុប្រឆាំងនឹងកូរ៉េខាងត្បូងឬពិភពលោកខាងក្រៅ»។
ប្រទេសកូរ៉េខាងជើងនិងប្រទេសកូរ៉េខាងត្បូងបានធ្វើកិច្ចចរចាខាងយោធាលើកទីមួយរបស់ពួកគេក្នុងរយៈពេលពីរឆ្នាំកាលពីថ្ងៃព្រហស្បតិ៍ទី៣០ខែកញ្ញាដោយផ្តោតការយកចិត្តទុកដាក់ ជាផ្នែក លើការពន្លិចនាវាចម្បាំងកូរ៉េខាងត្បូងមួយគ្រឿងកាលពីខែមីនា។ ការស៊ើបអង្កេតអន្តរជាតិមួយបានបន្ទោសរដ្ឋាភិបាលក្រុង Pyongyang ចំពោះការវាយប្រហារនេះ ដែលអ្នកធ្វើវិភាគខ្លះមានយោបល់ថាប្រហែលត្រូវធ្វើទ្បើងដើម្បីជួយធ្វើឱ្យឃើញថាលោក Kim Jong Un ហាក់ដូចជាមានអំណាចខ្លាំង។មានការមិនយល់ស្របនឹងទ្រឹស្តីនេះ ក៏ប៉ុន្តែពួកអ្នកធ្វើវិភាគយល់ស្របគ្នាថាពួកវរជនគ្រប់គ្រងប្រទេសកូរ៉ខាងជើងមិនទំនងជាបង្ហាញការមិនពេញចិត្តណាមួយដល់ជម្រើសពួកអ្នកដឹកនាំដោយលោក Kim Jong Il ទេ ដរាបណាលោកនៅរស់។ នៅក្រោយលោក Kim Jong Il ស្លាប់ មានការបញ្ជាក់បន្តិចបន្តួចថាតើអ្នកគ្រប់គ្រងប្រទេសក្មេងម្នាក់និងគ្មានការពិសោធន៍អាចនៅកាន់អំណាចបានឬទេក្នុងចំណោមពួកមន្ត្រីជំនាន់ចាស់ដែលចេះតែគិតផ្តេសផ្តាស៕
ប្រែសម្រួលដោយលោក ឈឹម សុមេធ។