ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សកម្មជន​គាំទ្រ​លោក កឹម សុខា ២​នាក់ ត្រូវ​ចោទ​ប្រកាន់​ពីបទ​«ប្រមាថ​ព្រះមហាក្សត្រ»


រូបផ្គុំ៖ លោក គង់ ប៊ុនហ៊ាង (ឆ្វេង) និងលោក ហង្ស សេង (ស្តាំ) ជាអតីត​សមាជិក​គណបក្ស​សង្រ្គោះជាតិ​ក្នុង​ខេត្តបាត់​ដំបង។ ពួកគេ​ទាំងពីរ​នាក់ ត្រូវបាន​ចោទប្រកាន់​ពីបទ​«ប្រមាថ​ព្រះមហាក្សត្រ» តាម​មាត្រា៤៣៧ ដែល​អាច​ឲ្យ​ពួកគេ​ជាប់​ពន្ធនាគារ​រហូត​ដល់​៥ឆ្នាំ បើ​រក​ឃើញ​កំហុស។ (រូបថតពីហ្វេសប៊ុក)
រូបផ្គុំ៖ លោក គង់ ប៊ុនហ៊ាង (ឆ្វេង) និងលោក ហង្ស សេង (ស្តាំ) ជាអតីត​សមាជិក​គណបក្ស​សង្រ្គោះជាតិ​ក្នុង​ខេត្តបាត់​ដំបង។ ពួកគេ​ទាំងពីរ​នាក់ ត្រូវបាន​ចោទប្រកាន់​ពីបទ​«ប្រមាថ​ព្រះមហាក្សត្រ» តាម​មាត្រា៤៣៧ ដែល​អាច​ឲ្យ​ពួកគេ​ជាប់​ពន្ធនាគារ​រហូត​ដល់​៥ឆ្នាំ បើ​រក​ឃើញ​កំហុស។ (រូបថតពីហ្វេសប៊ុក)

អតីត​សមាជិក​គណបក្ស​សង្រ្គោះ​ជាតិ​២​នាក់​ក្នុង​ខេត្ត​បាត់ដំបង ​ដែល​គាំទ្រ​លោក​កឹម សុខា​ ត្រូវ​បាន​ចាប់​ខ្លួន​ កាល​ពី​ចុង​សប្តាហ៍​មុន ​ហើយ​តុលាការ​រាជធានី​ភ្នំពេញ​បាន​សម្រេច​ចោទ​ប្រកាន់​ពួក​គេ​ថា​ «ប្រមាថ​ព្រះ​មហា​ក្សត្រ»​ដោយ​យោង​តាម​បញ្ញត្តិ​ថ្មី​នៃ​ក្រម​ព្រហ្មទណ្ឌ​ដែល​ត្រូវ​បាន​បង្កើត​ឡើង​កាល​ពី​ឆ្នាំ​២០១៨។​

ពួកគេ​ទាំង​ពីរ​នាក់​ គឺ​លោក ​ហង្ស សេង ​អាយុ​៦៩​ឆ្នាំ ​និង​លោក ​គង់ ប៊ុនហ៊ាង ​អាយុ​៦៦​ឆ្នាំ​ ដែល​ជា​អតីត​សមាជិក​ប្រតិបត្តិ​ខេត្ត​បាត់ដំបង ​ហើយ​ជា​អ្នក​នយោបាយ​ជាមួយ​អតីត​គណ​បក្ស​សិទ្ធិ​មនុស្ស ​ដែល​គ្រប់គ្រង​ដោយ​លោក កឹម សុខា។​

អ្នក​នាំពាក្យ​តុលាការ​រាជធានី​ភ្នំពេញ ​លោក គុជ គឹមឡុង ​ប្រាប់​ VOA ​នៅ​រសៀល​ថ្ងៃ​អង្គារ​នេះ​ថា ​ពួកគេ​ទាំង​ពីរ​នាក់​ត្រូវ​បាន​ចោទ​ប្រកាន់​ពី​បទ​«ប្រមាថ​ព្រះ​មហា​ក្សត្រ» ​ដោយ​យោង​តាម​មាត្រា​៤៣៧​ ដែល​អាច​ឲ្យ​ពួក​គេ​ជាប់​ពន្ធនាគារ​រហូត​ដល់​៥​ឆ្នាំ ​ប្រសិន​បើ​រក​ឃើញ​កំហុស។​

បញ្ញត្តិ​ដែល​ចែង​ពី​បទ​«ប្រមាថ​ព្រះ​មហា​ក្សត្រ»​ ត្រូវ​បាន​បង្កើត​ឡើង​កាល​ពី​ខែ​កុម្ភៈ ​ឆ្នាំ​២០១៨ ​ដែល​រង​ការ​រិះគន់​ថា​ ​កំហិត​សេរីភាព​នៃ​ការ​បញ្ចេញ​មតិ ​និង​ប្រើប្រាស់​ដើម្បី​បំបិទ​សំឡេង​ប្រឆាំង​រដ្ឋាភិបាល។​ ក្រោយ​ការ​បង្កើត​បញ្ញត្តិ​នេះ ​ ​មនុស្ស​មួយ​ចំនួន​ត្រូវ​បាន​ចាប់​ខ្លួន​ ហើយ​ការ​ចាប់​ខ្លួន​សកម្ម​ជន​បក្ស​ប្រឆាំង​ពីរ​រូប​នេះ​ជា​ករណី​ថ្មី​ ដែល​ត្រូវ​បាន​ក្រុម​សិទ្ធិ​មនុស្ស​រិះគន់។​

ភរិយា​របស់​លោក ​ហង្ស សេង​ គឺ​អ្នកស្រី ​ហឿន សារិន​ អាយុ​៥៥​ឆ្នាំ ​រស់​នៅ​ក្នុង​ឃុំ​អន្លង់វិល​ ស្រុក​សង្កែ ​ខេត្ត​បាត់ដំបង​ មាន​ប្រសាសន៍​ថា​ នគរបាល​ម្នាក់​បាន​មក​ផ្ទះ​របស់​អ្នកស្រី​ កាល​ពី​ថ្ងៃ​អាទិត្យ ​ទី​១៨​ ខែ​តុលា​នៅ​ម៉ោង​ជាង​៨​ព្រឹក ​ដោយ​ហៅ​ស្វាមី​របស់​អ្នកស្រី​ថា​ ទៅ​ធ្វើ​សួន​ច្បារ​នៅ​អធិការដ្ឋាន​នគរបាល​ស្រុក​សង្កែ ​ហើយ​លោក​ក៏​ទៅ​ជាមួយ​ ដោយសារ​ត្រូវ​ការ​ការងារ​ធ្វើ។ ​ប៉ុន្តែ​អ្នកស្រី​ថា ​ផ្ទុយ​ទៅ​វិញ ​ស្វាមី​របស់​អ្នកស្រី​ ត្រូវ​បាន​ចាប់​ខ្លួន​ វាយ​ខ្នោះ ​ហើយ​អ្នកស្រី​មិន​ដឹង​ថា​ ស្វាមី​នៅ​ទីណា​នោះ​ទេ ​រហូត​មក​ដល់​ពេល​នេះ។​

អ្នកស្រី​មាន​ប្រសាសន៍​ថា៖​ «ខ្ញុំ​ថា​ អត់​យុត្តិធម៌​ទេ​អ៊ីចឹង​នោះ​ ព្រោះ​កុហក ​ឲ្យ​គាត់​ទៅ​អ៊ីចឹង ​(ហើយ​ចាប់​ខ្លួន) ​អត់​យុត្តិធម៌។​ បើ​មិន​បាន​អី ​ក៏​ប្រាប់​ថា​ ​ឥឡូវ គេ​ចង់​ជួប​អ៊ំ​ឯង ​អីចេះ​មួយ ​អីចុះ​មួយ ​មិន​បាច់​កុហក​ថា​ ធ្វើ​ការ។ ​ទាំង​អូន​ឯង ​ទាំង​ខ្ញុំ ​អរ​ហើយ ​ ព្រោះ​បាន​ធ្វើ​ការ។ ​ដល់​អ៊ីចឹង​ មក​បោក​គាត់​តែ​ម្តង។ ​ខ្ញុំ​ថា​ អត់​យុត្តិធម៌​ទេ»។​

អ្នកស្រី​ជា​ភរិយា ​បន្ត​ថា​ ការ​ចាប់​ខ្លួន​នេះ​មិន​មាន​ដីកា​ ហើយ​អ្នកស្រី​ខ្លួន​ឯង​ផ្ទាល់ ​ក៏​មិន​ដឹង​ថា​ គេ​ចោទ​ប្តី​អ្នកស្រី​ពី​ការ​ប្រព្រឹត្ត​ខុស​អ្វី​ដែរ។​ អ្នកស្រី​បញ្ជាក់​ថា៖ ​«ហើយ​ចាប់​ទៅ​ អត់​មាន​ដឹង​ដំណឹង​ថា​ គាត់​ទៅ​ណា ​មក​ណា។ ​បើ​ដឹង​ដំណឹង​ទៅ ​ ខ្ញុំ​យក​ថ្នាំ​ទៅ​ឲ្យ​គាត់​ពិសា»។​

អ្នកស្រី​មាន​ប្រសាសន៍​ថា​ ​ស្វាមីអ្នកស្រី​ ​មិន​ដែល​បាន​និយាយ​អ្វី​ប៉ះ​ពាល់​ដល់​ព្រះ​មហា​ក្សត្រ​នោះ​ទេ។​

អ្នកស្រី​ថា៖ ​«បើ​តាម​ខ្ញុំ ​ខ្ញុំ​ថា​អត់​យុត្តិធម៌​ទេ ព្រោះ​មិន​ដែល​ឮ​គាត់​និយាយ​អី»។​

អ្នកស្រី​ឲ្យ​ដឹង​ទៀត​ថា ​ការ​ចាប់​ខ្លួន​ស្វាមី​ដែល​ជា​អ្នក​គាំទ្រ​លោក ​កឹម សុខា ​កើត​ឡើង​ ក្រោយ​ពេល​ដែល​ស្វាមី​របស់​អ្នកស្រី ​បាន​ទៅ​ចូលរួម​ពិធី​បុណ្យ​មួយ​នៅ​វត្ត​ឈ្មោះ​សោមនស្ស ​ស្ថិត​ក្នុង​ស្រុក​ឯក​ភ្នំ ​ខេត្ត​បាត់ដំបង ​ដែល​មាន​លោក​ កឹម សុខា​ ចូលរួម​កាល​ពី​កន្លង​ទៅ។​

ហ្វេសប៊ុក​របស់​លោក ​គង់ ប៊ុនហ៊ាង ​និង​លោក​ ហង្ស សេង ​មិន​បាន​បង្ហោះ​អ្វី​នោះ​ទេ​ក្នុង​រយៈ​ពេល​ប៉ុន្មាន​សប្តាហ៍​ចុង​ក្រោយ​នេះ។​

ចំណែក​អ្នកស្រី​ សេន ស៊ី ​អាយុ​៥៨​ឆ្នាំ ​ជា​ភរិយា​របស់​លោក ​គង់ ប៊ុនហ៊ាង ​ដែល​ត្រូវ​បាន​ចាប់​ខ្លួន​ មាន​ប្រសាសន៍​ថា​ នគរបាល​ឃុំ​៣​នាក់​ ដែល​អ្នកស្រី​ស្គាល់ ​បាន​ទៅ​ផ្ទះ​អ្នកស្រី​ក្នុង​ភូមិ​បញ្ញា ​ឃុំ​កំពង់ព្រះ ​ ស្រុក​សង្កែ ​នៅ​ម៉ោង​ប្រមាណ​៨​យប់​ ហើយ​បាន​នាំ​ខ្លួន​ស្វាមី​របស់​អ្នកស្រី​ទៅ​ ដោយ​មិន​បាន​បង្ហាញ​ដីកា ​និង​បញ្ជាក់​ព័ត៌មាន​អ្វី​ឲ្យ​ច្បាស់​លាស់​នោះ​ទេ។​

អ្នកស្រី​ចាត់​ទុក​ថា ​នេះ​ជា​ការ​ចាប់​ខ្លួន​ដោយ​អយុត្តិ​ធម៌ ​ក្រោយ​ស្វាមី​របស់​អ្នកស្រី​បាន​ទៅ​ចូល​រួម​កម្មវិធី​បុណ្យ​ទាន​នៅ​វត្ត​មួយ​ក្នុង​ខេត្ត​បាត់ដំបង​ដែល​លោក ​កឹម សុខា​ បាន​ចូល​រួម។​

អ្នកស្រី​មាន​ប្រសាសន៍​ថា៖ ​«ដល់​ពេល​ទៅ​ហៅ​ប្តី​ខ្ញុំ​ ទៅ​ហៅ​តែ​មាត់​ទទេ ​ គ្មាន​ក្រដាស​អី ​កោះ​ហៅ ​កោះ​អី​ផង។​គ្មាន​ភស្តុតាង​អី ស្រាប់​យក​ប្តី​ខ្ញុំ​បញ្ជូន​មក​ធ្លាយ​ដល់​(ពន្ធនាគារ)​ព្រៃ​ស​បាត់»។ ​ អ្នកស្រី​បន្ថែម​ថា៖​ «ប្តី​ខ្ញុំ​មិន​អាច​មាន​ពាក្យ​[ប្រមាថ​ព្រះ​មហា​ក្សត្រ] ​ដល់​ថ្នាក់​ដូច​ពាក្យ​គេ​ចោទ​ប្រកាន់​អ៊ីចឹង​ទេ។​ខ្ញុំ​ធានា​ខុស​ត្រូវ​រឿង​ប្តី​ខ្ញុំ។ ​មនុស្ស​ល្អ ​មនុស្ស​ស្លូត​ត្រង់»។​

មាត្រា​៤៣៧​នៃ​ក្រម​ព្រហ្មទណ្ឌ​ស្តីពី​បទ​ប្រមាថ​ចំពោះ​អង្គ​ព្រះ​មហា​ក្សត្រ​ចែងថា​ ​ជន​ល្មើស​ត្រូវ​ផ្តន្ទាទោស​ដាក់​ពន្ធនាគារ​ពី​១​ឆ្នាំ​ ទៅ​៥​ឆ្នាំ ​និង​ពិន័យ​ជា​ប្រាក់​ពី២​លាន​រៀល​ទៅ​១០​លាន​រៀល។​

លោក​ សាត គឹមសាន​ ស្នងការ​នគរបាល​ខេត្ត​បាត់ដំបង​ បាន​បដិសេធ​មិន​អត្ថាធិប្បាយ ​ដោយ​រុញ​ឲ្យ​សួរ​ទៅ​នាយកដ្ឋាន​ព្រហ្មទណ្ឌ​នៃ​អគ្គ​ស្នងការដ្ឋាន​នគរបាល​ជាតិ​វិញ។​

លោក​មាន​ប្រសាសន៍​ថា៖ ​«សួរ​ខាង​នាយកដ្ឋាន​ព្រហ្មទណ្ឌ​នៃ​អគ្គ​ស្នងការដ្ឋាន​នគរបាល​ជាតិ។ ​បង​សួរ​ទៅ​ខាង​ហ្នឹង​ទៅ​ មាន​អ្នក​នាំពាក្យ​នៅ​ហ្នឹង​ហើយ​ ខ្ញុំ​ជាប់​រវល់​កម្មវិធី​ចែក​អំណោច​ដល់​ប្រជា​ពលរដ្ឋ​មួយ​ភ្លែត»។​

លោក ​ឆាយ គឹមខឿន​ អ្នក​នាំ​ពាក្យ​អគ្គ​ស្នងការដ្ឋាន​នគរបាល​ជាតិ​ មាន​ប្រសាសន៍​ថា​ សមត្ថកិច្ច​បាន​រក​ឃើញ​ភស្តុតាង​ដែល​បញ្ជាក់​ថា ​ពួកគេ​បាន​ប្រមាថ​ព្រះ​មហា​ក្សត្រ ​ប៉ុន្តែ ​លោក​មិន​អាច​បញ្ជាក់​ថា​ តើ​ជា​ការ​បង្ហោះ​ហ្វេសប៊ុក​ និយាយ​ផ្ទាល់​មាត់ ​ឬ​អ្វី​នោះ​ទេ។​

លោក​ប្រាប់ ​VOAថា៖ ​«សមត្ថកិច្ច​ចាប់​ខ្លួន​ដោយសារ​បាន​រក​ឃើញ​ភស្តុតាង​ដែល​គាត់​ទាំងពីរ​រូប​ហ្នឹង​ប្រមាថ​អង្គ​ព្រះ​មហា​ក្សត្រ។ ​ដោយ​ឡែក​ចង់​ដឹង​ថា​ គាត់​ប្រមាថ​ព្រះ​មហា​ក្សត្រ​តាម​រយៈ​ស្អី​នោះ យើង​ខ្ញុំ​មិន​បញ្ជាក់​ជូន​ទេ ​ព្រោះ​នេះ​ គឺ​ជា​ភស្តុតាង​ដែល​សមត្ថកិច្ច​ត្រូវ​រក្សា​ទុក»។​

ទាក់ទង​នឹង​ការ​ចាប់​ខ្លួន​ពួក​គេ ​ដោយ​មិន​បាន​ប្រាប់​គ្រួសារ​នូវ​ហេតុផល​ពិត​ប្រាកដ​លោក​ ឆាយ គឹមខឿន​ បញ្ជាក់​ថា៖ ​«ការ​ធ្វើ​ការងារ​សន្តិសុខ​ជាតិ​គេ​មាន​រៀប​ធ្វើ​របស់​គេ។ ​តែ​បើ​សិន​ទៅ​ចាប់​គាត់​ភ្លាម​តែ​ម្តង ​ម៉េច​គាត់​ព្រម។ ​....​ប៉ុន​គេ​មាន​ច្បាប់​នៃ​ការ​អនុញ្ញាត​របស់​គេ​ បាន​គេ​ហ៊ាន​វាយ​ខ្នោះ​មនុស្ស»។​

លោក​ ឌឹម សារឿន​ អតីត​សមាជិក​គណបក្ស​សង្រ្គោះ​ជាតិ ​និង​ជា​មិត្តភក្តិ​របស់​អ្នក​ទាំង​ពីរ​ដែល​ត្រូវ​បាន​ចាប់​ខ្លួន ​លើក​ឡើង​ថា​ ពួក​គេ​មិន​សូវ​បង្ហោះ​សារ​លើ​ប្រព័ន្ធ​សង្គម​ហ្វេសប៊ុក​ទេ​ ហើយ​បើ​បង្ហោះ​គឺ​ទាក់​ទង​ក្រុម​គ្រួសារ​តែ​ប៉ុណ្ណោះ។​

លោក​ចាត់​ទុក​ថា​ ការ​ចាប់​ខ្លួន​នេះ​ជា​រឿង​នយោបាយ ​ដោយ​សារ​ពួកគេ​ជា​«សកម្មជន​ឆ្នើម​ និង​សកម្ម»​ ហើយ​ការ​ចាប់​ខ្លួន​នេះ​ ធ្វើ​ឡើង​បន្ទាប់​ពី​ពួកគេ​បាន​ចូលរួម​ជាមួយ​លោក ​កឹម សុខា ​ក្នុង​សកម្មភាព​នៅ​វត្ត​ និង​ចែក​អំណោយ​ឲ្យ​ពលរដ្ឋ​ក្នុង​ខេត្ត​បាត់ដំបង។​

លោក​មាន​ប្រសាសន៍​ថា៖​ «ដោយ​សារ​ខ្ញុំ​បាន​ព័ត៌មាន​ពី​ប្រពន្ធ​លោក​ គង់ ប៊ុនហ៊ាង​ ថា ​អនុប៉ុស្តិ៍​ប្រាប់​គាត់​ថា​ គេ​នាំ​ខ្លួន​សាក​សួរ​រឿង​គាត់​ទៅ ​ធ្វើ​បុណ្យ​ជាមួយ​លោក​កឹម សុខា ​បាន​ខ្ញុំ​ដឹង​ព័ត៌មាន​រឿង​ហ្នឹង»។​

លោក​ សំ សុគង់ ​មេធាវី​ម្នាក់​ដែល​ភាគច្រើន​ការពារ​ឲ្យ​មន្រ្តី​គណបក្ស​ប្រឆាំង​ដែល​ត្រូវ​បាន​ចាប់​ខ្លួន​ថ្លែង​ថា​ លោក​នឹង​ជួប​ជាមួយ​ពួកគេ​ទាំង​ពីរ​នាក់ ​ដើម្បី​សួរ​នាំ​ព័ត៌មាន​បន្ថែម​អំពី​ការ​ចោទ​ប្រកាន់​របស់​តុលាការ​ទៅ​លើ​ពួក​គេ។​

លោក ​អំ សំអាត​ នាយក​រង​ទទួល​បន្ទុក​ឃ្លាំមើល​និង​ការពារ​សិទ្ធិ​មនុស្ស​នៃ​អង្គការ​លីកាដូ​ មាន​ប្រសាសន៍​ថា ​នេះ​មិនមែន​ការ​ប្រព្រឹត្ត​បទ​ល្មើស​ជាក់​ស្តែង​នោះ​ទេ ​ ដូច្នេះ​គួរ​តែ​មាន​ដីកា​បង្ហាញ​ដល់​ក្រុម​គ្រួសារ​ឲ្យ​បាន​ត្រឹម​ត្រូវ ​ហើយ​ប្រាប់​ព័ត៌មាន​ដល់​ពួកគេ។​

លោក​មាន​ប្រសាសន៍​ថា៖ ​«បើ​សិន​ជា​បទ​ល្មើស​មិន​ជាក់​ស្តែង​ ហើយ​យើង​ធ្វើ​ការ​លួង​លោម​ ឬ​ក៏​មិន​ប្រាប់​ព័ត៌មាន​ពិត​ ហើយ​ទៅ​ប្រាប់​ព័ត៌មាន​បំភ្លៃ​អី​អា​ហ្នឹង​វា​ខុស​ពី​នីតិវិធី។ ​នីតិវិធី​តម្រូវ​ឲ្យ ​បើ​មិន​បទ​ល្មើស​ជាក់​ស្តែង​ ត្រូវ​បង្ហាញ​ដីកា ​ប្រាប់​ពី​មូលហេតុ​នៃ​ការ​ឃាត់​ខ្លួន​ ហើយ​នឹង​ប្រាប់​ក្រុម​គ្រួសារ​ថា យក​ទៅ​ណា»។​

លោក ​Phil Robertson ​នាយក​រង​អង្គការ​ឃ្លាំមើល​សិទ្ធិ​មនុស្ស​ប្រចាំ​ទ្វីប​អាស៊ី​(Human Rights Watch)​ បាន​លើក​ឡើង​ថា ​រដ្ឋាភិបាល ​បាន​ប្រើ​ប្រាស់​បញ្ញត្តិ​បង្កើត​ថ្មី​ដែល​ចែង​ពី​ការ​«ប្រមាថ​ព្រះ​មហា​ក្សត្រ»​ ដើម្បី​ចោទ​ប្រកាន់ ​និង​ដាក់​ពន្ធនាគារ​ដៃ​គូ​ប្រកួត​ប្រជែង​នយោបាយ។​

បើ​តាម​មជ្ឈមណ្ឌល​សិទ្ធិ​មនុស្ស​កម្ពុជា ​កាល​ពី​ខែ​តុលា​ឆ្នាំ​២០១៨ ​អ្នកស្រី​ បាន សំភី ​អតីត​សមាជិក​គណបក្ស​សង្គ្រោះ​ជាតិ​ក្នុង​ខេត្ត​សៀមរាប ​ត្រូវ​បាន​កាត់​ទោស​ដាក់​ពន្ធនាគារ​រយៈ​ពេល​មួយ​ឆ្នាំ ​ក្រោម​បញ្ញត្តិ«ប្រមាថ​ព្រះ​មហា​ក្សត្រ»៕

XS
SM
MD
LG