នៅក្នុងសេចក្តីថ្លែងការណ៍មួយចេញផ្សាយនៅក្នុងទីភ្នាក់ងារព័ត៌មានកណ្តាលកូរ៉េជាផ្លូវការ ក្រសួងការបរទេសកូរ៉េខាងជើងបានព្រមានអំពី «ផលវិបាក» ជាការឆ្លើយតបនឹងការរឹបអូសនាវារបស់ខ្លួនដោយសហរដ្ឋអាមេរិក។
សេចក្តីថ្លែងការណ៍កាលពីថ្ងៃអង្គារ ទី១៤ ខែឧសភា បានថ្លែងថា៖ សហរដ្ឋអាមេរិកគួរគិតទុកជាមុនអំពីផលវិបាក ដែលនឹងមាននៅក្រោយស្ថានការណ៍បច្ចុប្បន្នដែលបានបណ្តាលមកពីការប្លន់កប៉ាល់នេះ ហើយបញ្ជូននាវារបស់យើងមកឱ្យយើងវិញជាបន្ទាន់»។
សេចក្តីថ្លែងការណ៍នេះរបស់ទីភ្នាក់ងារព័ត៌មាន KCNA បានអះអាងថា ការរឹបអូសយកនាវានេះរំលោភលើកិច្ចព្រមព្រៀងកាលពីឆ្នាំ ២០១៨ រវាងលោកប្រធានាធិបតីស.រ.អា. ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន ដើម្បីកែលម្អទំនាក់ទំនងទ្វេភាគី។
កាលពីដើមខែឧសភា ស.រ.អា.បានប្រកាសថា ខ្លួនបានរឹបអូសនាវាឈ្មោះ Wise Honest ដែលត្រូវបានឃាត់ដំបូង ដោយអាជ្ញាធរឥណ្ឌូណេស៊ី កាលពីខែមេសា ឆ្នាំ២០១៨។
មន្ត្រីស.រ.អា. បាននិយាយថា កប៉ាល់មានចំណុះ ១ម៉ឺន៧ពាន់តោន នេះដែលជាកប៉ាល់ដឹកទំនិញធំទីពីររបស់កូរ៉េខាងជើងដើម្បីដឹកជញ្ជូនធ្យូងថ្មកូរ៉េខាងជើង ទៅលក់ឯប្រទេសក្រៅ គឺជាការរំលោភលើការដាក់ទណ្ឌកម្មអន្តរជាតិ។
នេះជាលើកដំបូងហើយដែលមន្ត្រីស.រ.អា. បានរឹបអូសនាវាកូរ៉េខាងជើងមួយគ្រឿង។
ចំណាត់ការនេះបាននាំឱ្យចំណងទាក់ទងរវាងកូរ៉េខាងជើងនិងស.រ.អា.រឹតតែតឹងតែងថែមទៀត ដែលហាក់ដូចជាចូលជាថ្មីទៀតទៅក្នុងរយៈពេលមួយនៃអរិភាពនៅក្រោយមានកិច្ចចរចានុយក្លេអ៊ែរមួយឆ្នាំមកនោះ។
កាលពីប៉ុន្មានសប្តាហ៍ថ្មីៗនេះ ប្រទេសកូរ៉េខាងជើងបានបាញ់ពិសោធកាំជ្រួចផ្លោងជាថ្មីទៀតនៅក្រោយពីបានទប់ចិត្តមិនបានធ្វើការបង្ហោះបែបនេះជាងមួយឆ្នាំកន្លះមក។
មន្ត្រីស.រ.អា.បានធ្វើកន្តើយនឹងការបាញ់ពិសោធកាំជ្រួចមានវង់ប្រតិបត្តិការខ្លីទាំងបីគ្រឿងនេះ ដោយបាននិយាយថា ខ្លួននៅតែបើកចំហដើម្បីធ្វើកិច្ចចរចាជាមួយប្រទេសកូរ៉េខាងជើង។
នៅក្នុងជំនួបកំពូលលើកទីមួយ កាលពីខែមិថុនា ឆ្នាំ២០១៨ លោក ត្រាំ និងលោក គីម ជុងអ៊ុន បានសន្យាថា នឹងកែលម្អការទាក់ទងគ្នានិងធ្វើការឆ្ពោះទៅកាន់ការធ្វើឲ្យឧបទ្វីបកូរ៉េមិនឱ្យមានអាវុធបរមាណូ»។
កិច្ចចរចានេះបានរលំ នៅពេលដែលជំនួបកំពូលលើកទីពីររវាងលោក ត្រាំ និងលោក គីម កាលពីខែកុម្ភៈ នៅក្នុងប្រទេសវៀតណាម គ្មានជោគជ័យក្នុងការធ្វើឱ្យមានកិច្ចព្រមព្រៀងមួយ។
នៅក្នុងជំនួបកំពូលនោះ លោក គីម បានស្នើរុះរើកន្លែងនុយក្លេអ៊ែរសំខាន់មួយរបស់កូរ៉េខាងជើង ជាថ្នូរនឹងការបន្ធូរបន្ថយការដាក់ទណ្ឌកម្មរបស់ស.រ.អា. ដែលបាននាំឱ្យមានផលមិនល្អដល់សេដ្ឋកិច្ចកូរ៉េខាងជើង។
លោក ត្រាំ បាននិយាយទទូចថា លោកនឹងមិនបន្ធូរបន្ថយការដាក់ទណ្ឌកម្មទេរហូតដល់ពេលណាដែលកូរ៉េខាងជើងយល់ព្រមបោះបង់ចោលកម្មវិធីអាវុធនុយក្លេអ៊ែរទាំងស្រុងរបស់ផងខ្លួន។
ការរឹបអូសយកកប៉ាល់ឈ្មោះ Wise Honest ជាផ្នែកមួយនៃអ្វីដែលមន្ត្រីស.រ.អា ពណ៌នាថាជាយុទ្ធនាការនៃការដាក់គំនាបសង្កត់ខ្លាំងបំផុតប្រឆាំងនឹងប្រទេសកូរ៉េខាងជើង។
តាមរយៈការដាក់ទណ្ឌកម្មមួយចំនួន ដោយសហរដ្ឋអាមេរិកនិងអង្គការសហប្រជាជាតិ ប្រទេសកូរ៉េខាងជើងបានត្រូវហាមប្រាមមិនឱ្យធ្វើសកម្មភាពសេដ្ឋកិច្ចមួយចំនួន ដោយមានរួមបញ្ចូលទាំងការដឹកជញ្ជូនសម្ភារៈនានាដូចជាធ្យូងថ្មជាដើមទៅលក់ឱ្យប្រទេសក្រៅ។
ប្រទេសកូរ៉េខាងជើងបានគេចពីការដាក់ទណ្ឌកម្ម ជាផ្នែកដោយប្រើនាវារាប់សិបគ្រឿងដូចជាកប៉ាល់ឈ្មោះ Wise Honest ជាដើម ដើម្បីធ្វើការផ្ទេរវត្ថុធាតុដើមតាមនាវា។
ការរឹបអូសលើកដំបូងនៃកប៉ាល់ Wise Honest កាលពីឆ្នាំ២០១៨ គឺនៅពេលដែលកប៉ាល់នេះបានដឹកធ្យូងថ្មប្រមាណ ២៥,៥០០ តោនដែលមានតម្លៃប្រមាណ៣លានដុល្លារនៅពេលនោះ។
មន្ត្រីស.រ.អាមានជំនឿថា ប្រទេសកូរ៉េខាងជើងប្រើប្រាក់កាសបានមកពីការលក់ធ្យូងថ្ម ដើម្បីផ្គត់ផ្គង់កម្មវិធីផលិតអាវុធរបស់ខ្លួន។
កាលពីពាក់កណ្តាលខែឧសភា នាវានេះបានបើកទៅដល់កំពង់ផែ Pago Pago នៅក្នុងដែនដី American Samoa របស់សហរដ្ឋអាមេរិក៕
ប្រែសម្រួលដោយ ឈឹម សុមេធ
