ភ្ជាប់​ទៅ​គេហទំព័រ​ទាក់ទង

ពលរដ្ឋ​នីហ្សេរីយ៉ា​ចាប់ផ្តើម​ចុះឈ្មោះ​ត្រៀម​បោះឆ្នោត​ខែ​មេសា

  • Scott Stearns

ពលរដ្ឋ​នីហ្សេរីយ៉ា​តម្រង់​ជួរ​នៅ​ស្ថានីយ៍​ចុះ​ឈ្មោះ​អ្នក​បោះឆ្នោត​មួយ​នៅ​ក្នុង​រដ្ឋធានី​អាប៊ូចា Abuja កាល​ពី​ថ្ងៃ​ទី​១៥​ខែ​មករា​ឆ្នាំ​២០១១។

ការ​ចុះឈ្មោះ​បោះឆ្នោត​កំពុង​ដំណើរការ​នៅ​ក្នុង​ប្រទេស​អាហ្វ្រិកមួយ​ដែល​មាន​ប្រជាពលរដ្ឋ​ច្រើន​ជាង​គេ​ខណៈ​ដែល​ពលរដ្ឋ​នីហ្សេរីយ៉ា​ប្រុងប្រៀប​ខ្លួន​ធ្វើការ​បោះឆ្នោត​នៅ​ខែ​មេសា​ដើម្បី​ជ្រើស​តាំង​អភិបាលរដ្ឋ ​អ្នកតាក់​តែង​ច្បា​ប់ ​និង​ប្រធានាធិបតី។

ការ​ចុះ​ឈ្មោះ​បោះឆ្នោត​បាន​ចាប់​ផ្ដើម​ឡើង​ដោយ​លំបាក​ដោយសារ​តែ​មណ្ឌល​ជាច្រើន​បើក​ទ្វារ​យឺត​ពេល​ហើយ​គេ​មាន​បញ្ហា​ពិបាក​ភ្ជាប់​ម៉ាស៊ីន​កំព្យូទ័រ​ទៅ​នឹង​ម៉ាស៊ីនថត​ស្កែន​ម្រាមដៃ ​ម៉ាស៊ីនថតរូប​និង​ម៉ាស៊ីន​ផ្ដិត​ឯកសារ ដើម្បី​ធ្វើ​ប័ណ្ណ​នៅ​ហ្នឹង​កន្លែង​សម្រាប់​អ្នក​បោះ​ឆ្នោត។

ប្រធាន​គណៈកម្មការ​រៀបចំ​ការបោះ​ឆ្នោត លោក​អាតាហ៊ីរូ ចេហ្កា (Attahiru ​Jega) ​ថ្លែង​ថា​ទំហំ​និង​ភាព​សាំញ៉ាំ​នៃ​កិច្ចការ​ទាំងនោះ​ជា​រឿង​ប្លែក​ទាំងស្រុង​ដែលប្រទេស​នីហ្សេរីយ៉ា​មិន​ធ្លាប់​ជួបប្រទះ។ ​តែ​លោក​បាន​ធានា​ដល់​អ្នក​បោះឆ្នោត​ថា​បញ្ហា​បឋម​ទាំង​នោះ​នឹង​ដោះស្រាយ​រួច​នៅ​ថ្ងៃ​ច័ន្ទ​ហើយ​រហូត​ដល់​ពីរ​សប្ដាហ៍ពេល​នៅ​សល់​ដើម្បី​ចុះ​ឈ្មោះ​អ្នក​បោះ​ឆ្នោតនឹង​ដំណើរ​ការ​ដោយ​រលូន។

មន្ដ្រី​ទទួល​បន្ទុក​ខាង​ការចុះឈ្មោះ​បោះឆ្នោត​ហ្វ្រង់ស៊ីស​ អ៊ុនឆេ (Francis ​Unche)​ បាន​ទទួល​ពាក្យ​បណ្ដឹង​ជាច្រើននៅ​មជ្ឈមណ្ឌល​ អាប៊ូចា។ តែ​លោក​មាន​ជំនឿ​ថា​គណៈកម្មការ​រៀបចំ​ការបោះឆ្នោត​ហៅកាត់ថា ​INEC នឹង​ចាត់​វិធានការ​ដ៏​ត្រឹមត្រូវ។

«អ្វីៗ​ទាំងអស់​នឹង​ដំណើរការ​ដ៏​រលូន​រាប់​ទាំង​កៅអី​ផ្លាស្ទិក​និង​តុ​និង​ដំបូល​ក្រណាត់ចាំបាច់ពីព្រោះ​យើង​ត្រៀម​ចុះឈ្មោះ​បោះ​ឆ្នោត​នៅខាង​ក្រៅ។ អ្វីៗ​ទាំង​អស់​នឹង​មក​ដល់​នៅ​ថ្ងៃ​ច័ន្ទព្រឹក​ហើយ​គ្រប់យ៉ាងនឹង​បាន​ត្រូវ​រៀបចំ​រួច»។

បញ្ហា​របស់​គណៈកម្មការ​រៀបចំ​ការបោះ​ឆ្នោត​មាន​កាន់តែ​ច្រើនដោយសារ​ចំនួន​មនុស្ស​ច្រើន​សន្ធឹក​បានចូល​មក​ចុះ​ឈ្មោះ​ពីព្រោះ​គេ​ឮ​តាម​វិទ្យុ តាម​ការ​ឃោសនា​សាធារណៈ​ និង ​ទូរទស្សន៍។

«អ្នក​អាច​ចុះ​ឈ្មោះ​បាន​តែ​ម្ដង​ទេ។ បើ​មាន​ម្ដង​ទៀត​នេះ​ជា​បទឧក្រិដ្ឋ។ ​ការចុះឈ្មោះ​ចាប់​ផ្ដើម​ពី​ម៉ោង​ ៨ ​ព្រឹក ​ដល់​ម៉ោង​ ៥ ​ល្ងាច ​រាល់ៗ​ថ្ងៃ។ ​សូម​ទៅ​ចុះ​ឈ្មោះ​បោះ​ឆ្នោត​ដោយ​សារ​តែសន្លឹក​ឆ្នោត​របស់​លោក​អ្នក​គឺជា​អំណាច​របស់​លោក​អ្នក​ដែរ។ ​សូម​ជួយ​គណៈកម្មការ​រៀប​ចំ​ការ​បោះឆ្នោត​ធ្វើការ​ ឲ្យ​បាន​ប្រសើរ​បំផុត​សម្រាប់​ការ​បោះឆ្នោត​ឆ្នាំ​២០១១»។

ប្រធានាធិបតី​ ហ្គូដឡាក់​ ចូណាថាន់ (Good luck ​Jonathan) ជា​អ្នកចុះ​ឈ្មោះ​មុន​គេ​នៅ​ក្នុង​រដ្ឋ​កំណើត​របស់​លោក​គឺ​រដ្ឋ​បាយ៉េលឡា​ (Bayelsa)។​ លោក​ថ្លែង​ប្រាប់ក្រុម​អ្នកកាសែតថា​ ការ​ចុះឈ្មោះ​បោះឆ្នោត​ជា​ការ​ចាប់​ផ្ដើម​អភិបាលកិច្ចល្អ។

ពលរដ្ឋ​នីហ្សេរីយ៉ា ​ជាង​៧០​លាន​នាក់​អាច​ចុះឈ្មោះ​បោះឆ្នោត​នៅពេល​នេះ ​ហើយ​គេ​មាន​ការព្រួយ​បារម្ភ​ថា​តើ​គេអាច​បញ្ចប់​កិច្ច​ការ​នេះ​ក្នុង​រយៈ​ពេល​ពីរ​សប្ដាហ៍​បាន​ឬ​ទេ? កាលបរិច្ឆេទ​នៃ​ការបោះ​ឆ្នោតបាន​ត្រូវ​រុញ​ទៅ​មុខ​រួច​ម្ដង​ទៅ​ហើយ​ដោយសារ​តែ​គណៈកម្មការ​រៀបចំការ​បោះឆ្នោតនិយាយ​ថា​គេ​ត្រូវ​ការ​ពេល​វេលា​បន្ថែម​ដើម្បី​ប្រុងប្រៀប​សម្ភារៈ ​និង​ បង្ហាត់​បុគ្គលិក ​នៅ​ក្នុង​មជ្ឈមណ្ឌល​ចុះ​ឈ្មោះ​ជាង​១២០.០០០​កន្លែង៕

ប្រែ​សម្រួល​ដោយ អ៊ូ ធួក

XS
SM
MD
LG