ភ្ជាប់​ទៅ​គេហទំព័រ​ទាក់ទង

លោក​ប្រធានាធិបតី​​អូបាម៉ា​​សន្យា​​ថា​​​នឹង​​​ពង្រឹង​​​សេដ្ឋកិច្ច​​នៅ​​ឆ្នាំ​២០១១​​នេះ


លោក​ប្រធានាធិបតី​សហរដ្ឋអាមេរិក​ បារ៉ាក់​ អូបាម៉ា។

វ៉ាស៊ីនតោន៖នៅ​ពេល​ដែល​ប្រជា​ពលរដ្ឋ​អាមេរិកាំង​រាប់​លាន​នាក់​ស្វាគមន៍​ឆ្នាំ២០១១​ ដោយ​មានការ​ប្រារព្ធ​ពិធី​និង​ការ​ដុត​កាំជ្រួច​ ពួក​អ្នកនយោបាយ​សហរដ្ឋ​អាមេ​រិក​កំពុង​ស្វាគមន៍​ទសវត្សរ៍​ថ្មី ​ដោយ​មាន​ការ​សន្យា​ដែល​គេ​ធ្លាប់​ឮ​រួច​មក​ហើយ។

ដោយ​ស្ថិតនៅ​ឆ្ងាយ​ពី​ការប្រារព្ឋ​ពិធីបុណ្យ​ចូល​ឆ្នាំ​ថ្មីយ៉ាង​អធិក​អធម ដូច​ជាការ​ប្រារព្ឋ​នៅ​ទីលាន ​Times Square​ ក្នុង​ទីក្រុង​ញូយ៉កសហរដ្ឋ​អាមេរិក​ លោកប្រធា​នាធិបតី​បារ៉ាក់​ អូបាម៉ា​ មាន​សារ​ដ៍​ស្រងូត​ស្រងាត់​មួយ​សម្រាប់​ប្រជា​ពល​រដ្ឋ​អាមេរិកាំង​។

«យើង​កំពុង​រើប​ចេញ​ពី​ការ​មិន​រីក​ចម្រើន​សេដ្ឋកិច្ច​ដែល​មាន​តែ​ម្តង​ក្នុង​មួយជីវិត​ ដែល​បាន​ធ្វើ​ឲ្យ​ប្រជា​ពលរដ្ឋ​អាមេរិកាំង​រាប់​លានគ្រួសារ​មាន​ការ​ពិបាក។ យើងទាំង​អស់​គ្នា​មាន​មិត្តភ័ក្រ្ត ​និង​អ្នក​ជិត​ខាង​របស់​យើង​កំពុង​ព្យាយាម​ធ្វើ​ឲ្យជីវភាព​របស់​ពួក​គេ​មាន​ភាព​ដូច​ដើម​វិញ​ »។

ក្នុងសន្ទរកថា​ប្រចាំ​សប្តាហ៍​របស់លោក លោក​ Obama​ បាន​សន្យា​ខិត​ខំធ្វើការងារ​យ៉ាង​ខ្លាំង​ដើម្បី​ពង្រឹង​ការ​រើបឡើង​នូវ​សេដ្ឋកិច្ចដែល​មិន​ទាន់​រឹង​មាំ​នៅឡើយ​ក្នុង​ប្រទេស​ ហើយ​លោកមាន​ប្រសាសន៍​បន្ត​ទៀត​ថា ទិន្នន័យ​សេដ្ឋកិច្ចកាលពី​ពេល​ថ្មីៗ​នេះ​ បា្រប់​ឲ្យ​ដឹង​ថា​ ស្ថានភាព​កំពុង​ចាប់​ផ្តើមល្អ​ប្រសើរហើយ​។

លោក​ក៍​បាន​សន្យា​ធ្វើឲ្យការងារកាន់​តែ​ជិត​ស្និទ្ធឡើង​ថែម​ទៀត​ជា​មួយសមាជិកសភា​ខាង​គណៈ​បក្សសាធារណ​រដ្ឋ​និយម​ដែល​ជា​គណៈបក្ស​ប្រឆាំងដែលបាន​ទទួល​ការ​កើន​ឡើង​យ៉ាង​ខ្លាំង​នូវ​អាសនៈ​ក្នុងការ​បោះ​ឆ្នោត​កាល​ពី​ខែវិច្ឆិកា។

«ខ្ញុំ​មាន​ច្ឆន្ទៈ​ធ្វើ​ការ​ងារ​ជា​មួយ​ជន​ណា​នៃ​គណៈបក្ស​ណា​ក៍​ដោយ​ដែល​មានគំនិត​ល្អ​ ហើយ​នឹង​ការ​តាំងចិត្តធ្វើ​ឲ្យសម្រេច​ជោគ​ជ័យ។ ​ហើយ​ យើង​ទាំង​អស់គ្នា​ក៍​រំពឹង​ដែរ​ថា​ អស់​លោក​អ្នក នឹង​ធ្វើ​ឲ្យ​យើង​មាន​ការ​ទទួល​ខុស​ត្រូវ​ចំពោះ​ការ​ជឿន​លឿន​ហើយ​ ឬ​ការ​បរាជ័យ​របស់​យើង​ក្នុង​ការ​ទទួល​ខុស​ត្រូវនេះ​»​។

នៅ​ពេល​ដែល​សមាជិក​សភាវិលត្រឡប់​ទៅ​កាន់​រដ្ឋធានី​ Washington​ វិញ​នៅចុង​ខែ​នេះ ពួក​ខាង​គណៈបក្ស​សាធារណ​រដ្ឋ​និយមនឹង​ត្រួត​ត្រា​សភា​តំណាងរាស្រ្ត​ហើយ​មាន​អាសនៈ​បន្ថែម​ចំនួន​៦​ក្នុង​ព្រឹទ្ធសភា។

សមាជិក​ព្រឹទ្ធសភា​ទើប​ជាប់​ឆ្នោត​ថ្មី​ខាង​គណៈបក្ស​សាធារណៈ​រដ្ឋ​និយម​ លោក​ Kelly Ayotte​ និយាយ​ថា​៖ ការ​ផ្លាស់​ប្តូរ​កំពុង​កើត​មាន​ឡើងហើយ។

ទាំង​លោក​ប្រធានាធិបតី​ Obama​ និង​សមាជិក​ព្រឹទ្ធ​សភា​ទើប​ជាប់​ឆ្នោត​ និ​យាយ​ថា ក្នុង​ខណៈ​ពេល​ដែល​សហរដ្ឋ​អាមេរិក​ កំពុង​ប្រឈម​មុខ​បញ្ហា​ដ៍លំបាក​នៅ​ដើម​ទសវត្សរ៍​ថ្មី​នេះក៍​ដោយ​ អស់​លោក​អ្នក​នៅ​តែ​មានសង្ឃឹមនៅ​ឡើយ​។

លោក​ Obama​ មាន​ប្រសាសន៍​បន្តទៀត​ថា​ មាន​ហេតុ​ផល​នាំ​ឲ្យ​មាន​សុទិដ្ឋិ​និយម​។នៅ​ពេល​ដែល​ការ​ប្រារព្ឋ​បុណ្យ​ចូល​ឆ្នាំ​ថ្មី​ បាន​បញ្ចប់​ ហើយប្រជា​ពលរដ្ឋ​អាមេរិកាំង​វិល​ត្រឡប់​ទៅ​ធ្វើការ​ងារ​វិញ​ ហើយ​ការ​រស់​នៅ​ប្រចាំ​ថ្ងៃ​មាន​ភាព​ជាប្រក្រតី​ ពួក​គេនឹង​រង់​ចាំ​មើល​ថា​តើ​ប្រធានាធិបតី​និង​សមាជិក​សភា​ អាចធ្វើ​បាន​ល្អ​តាម​ការ​សន្យា​ឬ​ទេ៕

ប្រែ​សម្រួល​ដោយលោក​ជឹង​ ប៉ូ​ជីន

XS
SM
MD
LG