ប៉ុន្មានម៉ោងក្រោយពីក្រុមហ៊ុន AstraZeneca និយាយថា ការសាកល្បងចុងក្រោយនូវវ៉ាក់សាំងកូវីដ១៩របស់ខ្លួនមានប្រសិទ្ធភាព១០០% ប្រឆាំងនឹងករណីឈឺធ្ងន់ធ្ងរ ឬត្រូវចូលសម្រាកនៅមន្ទីរពេទ្យ ទីភ្នាក់ងារត្រួតពិនិត្យទិន្នន័យនិងសុវត្ថិភាពរបស់រដ្ឋាភិបាលអាមេរិកបានសម្តែងការព្រួយបារម្ភអំពីព័ត៌មានដែលចេញដោយក្រុមហ៊ុនផលិតវ៉ាក់សាំងនេះ។
ទីភ្នាក់ងារត្រួតពិនិត្យទិន្នន័យនិងសុវត្ថិភាពរបស់សហរដ្ឋអាមេរិកបានចេញសេចក្តីថ្លែងការណ៍មួយកាលពីព្រឹកថ្ងៃអង្គារថា ក្រុមហ៊ុនឱសថរបស់អង់គ្លេស-ស៊ុយអែតនេះ «ប្រហែលជាបញ្ចូលទាំងព័ត៌មានដែលមិនបានធ្វើបច្ចុប្បន្នភាព» អំពីការសាកល្បងព្យាបាលនៅដំណាក់កាលចុងក្រោយដែលមិនផ្តល់ពេញលេញនូវទិន្នន័យដែលបង្ហាញពីប្រសិទ្ធភាព។
ក្រុមហ៊ុន AstraZeneca បាននិយាយកាលពីថ្ងៃច័ន្ទថា ការវិភាគរបស់ខ្លួនអំពីសុវត្ថិភាពនិងប្រសិទ្ធភាពវ៉ាក់សាំងរបស់ខ្លួនផ្អែកលើអ្នកចូលរួមជាង ៣០.០០០ នាក់នៅក្នុងការសាកល្បងនៅសហរដ្ឋអាមេរិក។
ក្រុមអ្នកស្រាវជ្រាវនៅសាកលវិទ្យាល័យ Oxford ក៏បាននិយាយដែរថា វ៉ាក់សាំងនេះមានប្រសិទ្ធភាព៧៩% ប្រឆាំងនឹងវីរុសកូរ៉ូណា។ ទីភ្នាក់ងារត្រួតពិនិត្យទិន្នន័យនិងសុវត្ថិភាពបានជំរុញឱ្យក្រុមហ៊ុន AstraZeneca ធ្វើការជាមួយខ្លួនដើម្បីពិនិត្យមើលទិន្នន័យនេះឡើងវិញដើម្បី«បញ្ជាក់ទិន្ន័យដែលបង្ហាញប្រសិទ្ធភាពដែលមានភាពត្រឹមត្រូវនិងបានធ្វើបច្ចុប្បន្នភាពរួចហើយ ដើម្បីឲ្យសាធារណជនបានដឹងឱ្យបានឆាប់តាមដែលអាចធ្វើទៅបាន»។
សេចក្តីថ្លែងការណ៍របស់ក្រុមប្រឹក្សាអ្នកជំនាញឯករាជ្យបង្ហាញបញ្ហាបង្អាក់ចុងក្រោយសម្រាប់វ៉ាក់សាំងកូវីដ១៩របស់ក្រុមហ៊ុន AstraZeneca ដែលមានបញ្ហាក្នុងការចែកចាយនៅទូទាំងពិភពលោក។
ថ្មីៗនេះបណ្តាប្រទេសអឺរ៉ុបមួយចំនួនបានឈប់ប្រើប្រាស់វ៉ាក់សាំងនេះ ដោយសារតែមានរបាយការណ៍ថា វាជាប់ទាក់ទងនឹងការកកឈាមរបស់អ្នកចាក់វ៉ាក់សាំងនេះ។
ប្រទេសមួយចំនួននៅអាហ្រ្វិកខាងត្បូងបានឈប់ចាក់វ៉ាក់សាំងបង្ការនេះ ដោយសារតែព្រួយបារម្ភអំពីប្រសិទ្ធភាពរបស់វ៉ាក់សាំងនេះប្រឆាំងនឹងប្រភេទវីរុសវិវត្តថ្មីនៅក្នុងស្រុក៕
