ភ្ជាប់​ទៅ​គេហទំព័រ​ទាក់ទង

រដ្ឋាភិបាល​នីហ្សេរីយ៉ា​លំបាក​ពង្រឹង​សេដ្ឋកិច្ច​តាម​បំណង​ពលរដ្ឋ


លោក​ប្រធានាធិបតី​នៃ​ប្រទេស​នីហ្សេរីយ៉ា​ហ្គូដឡាក់​ ចនណាថាន់ (Goodluck Jonathan) (ស្តាំ) នៅ​ពេល​លោក​ចាកចេញ​ពី​ ជំនួបកំពូលសហភាពអាហ្រ្វិកលើទី១៧ នៅ​មជ្ឈមណ្ឌល​សន្និសីទស៊ីពប៉ូ (Sipopo) នៅ​ប្រទេស​ហ្គីណី។​​​​

លោក​ប្រធានាធិបតី​នៃ​ប្រទេស​នីហ្សេរីយ៉ា​ហ្គូដឡាក់​ ចនណាថាន់​ (Goodluck ​Jonathan)​ មាន​ប្រសាសន៍​ថា​ ខុទ្ទកាល័យ​ថ្មី​របស់​លោក​កំពុង​ប្រឈម​នឹង​ការ​រំពឹង​យ៉ាងខ្ពស់​ពី​សំណាក់​ពលរដ្ឋ​នីហ្សេរីយ៉ា​ ដែល​ចង់​ឲ្យ​មាន​សេដ្ឋកិច្ច​ និង​សន្តិសុខ​រឹងមាំ​ជាង​មុន។

លោក​ប្រសាសន៍​ថា​ ខុទ្ទកាល័យ​ថ្មី​របស់​លោក​ត្រូវតែ​គិត​គូរ​ជា​ថ្មី​អំពី​របៀប​ដែល​ប្រទេស​នីហ្សេរីយ៉ា​ត្រូវ​ធ្វើ​យ៉ាងណា​ដើម្បី​ឲ្យ​ស្រប​ទៅ​តាម​អ្វី​ដែល​លោក​និយាយ​ថា​ ការ​រំពឹង​ទុក​ដែល​គួរ​ឲ្យ​ពិចារណា​ពី​សំណាក់​ម្ចាស់​សន្លឹក​ឆ្នោត​ ដែល​ទាមទារ​ឲ្យ​មាន​ការងារ​បន្ថែម​ទៀត​ និង​សេវា​កម្ម​សង្គម​ប្រសើរ​ជាង​មុន។

«គេ​រំពឹង​ថា​ យើង​នឹង​បង្កើត​ឲ្យ​មាន​ការងារ​ធ្វើ​សម្រាប់​យុវជន​ដែល​គ្មាន​ការងារ​ធ្វើ​នៅ​ក្នុង​ប្រទេស។ ​គេ​រំពឹង​ថា​ យើង​នឹង​ធ្វើការ​កែប្រែ​នៅ​ក្នុង​វិស័យ​កសិកម្ម​ និង​ធានា​សន្តិសុខ​ស្បៀង​អាហារ​សម្រាប់​ប្រជា​ពលរដ្ឋ។​ គេ​រំពឹង​ថា​ យើង​នឹង​ធ្វើ​ឲ្យ​វិស័យ​ប្រេង​និង​ឧស្ម័ន​មាន​ការ​គិតគូរ​ដល់​បរិស្ថាន​ដោយ​ធ្វើ​ឲ្យ​បាន​ស្អាត។ ​ប្រជា​ពលរដ្ឋ​ក៏​ចង់​ឲ្យ​មាន​ផ្លូវ​ថ្នល់​ល្អ​ ប្រព័ន្ធ​សាលា​រដ្ឋ​មាន​គុណភាព​ប្រសើរ​ជាង​មុន​ និង​ប្រព័ន្ធ​ដឹក​ជញ្ជូន​និង​សុខភាព​មាន​ប្រសិទ្ធិ​ភាព​ជាង​មុន»។

សេដ្ឋ​វិទូ​អ្នកស្រី​ អូដឺហូវ៉ូ​ អូហ្កិនវ័រហេ​ (Oderhohwo Oghenevwarhe) ​មាន​ប្រសាសន៍​ថា​ និស្សិត​ដែល​បញ្ចប់​ការសិក្សា​ពី​សាកល​វិទ្យាល័យ​កំពុង​ប្រឈម​នឹង​បញ្ហា​សេដ្ឋ​កិច្ច​មិន​រីក​ចម្រើន​ ដែល​ប្រធាន​ជាច្រើន​ទាមទារ​ឲ្យ​ពួកគេ​បង់ប្រាក់​ជា​ថ្នូរ​នឹង​ការងារ។

«មាន​យុវជន​ជាច្រើន​បាន​បញ្ចប់​ការសិក្សា​ ហើយ​មាន​យុវជន​ខ្លះ​បាន​បញ្ចប់​ការសិក្សា​ជាច្រើន​ឆ្នាំ​ហើយ។​ ពេល​ពួក​គេ​ទៅ​ការិយាល័យ​ដើម្បី​រក​ការងារ​ធ្វើ​ មាន​គេ​ប្រាប់​យុវជន​ទាំងនោះ​ថា​ អ្នក​ត្រូវតែ​មាន​ប្រាក់​មួយ​ចំនួន​ធំ​ដើម្បី​ជា​ថ្នូរ​នឹង​ការងារ។ ​តើ​គេ​រំពឹង​ថា​ និស្សិត​ទើបតែ​បញ្ចប់​ការសិក្សា​អាច​មាន​ប្រាក់​ចំនួន​ច្រើន​យ៉ាង​ដូច​នោះ​ម្តេច​ទៅ?»

អ្នកស្រី​មាន​ប្រសាសន៍​ថា​ ពលរដ្ឋ​នីហ្សេរីយ៉ា​ចង់​ឲ្យ​ខុទ្ទកាល័យ​ថ្មី​របស់​លោក​ប្រធានាធិបតី​អនុវត្ត​ឲ្យ​បាន​ច្រើន​ជាង​ពាក្យ​សម្តី​និយាយ។

ប្រែសម្រួល​ដោយ​ លី​ ម៉ូរីវ៉ាន់

XS
SM
MD
LG