តុលាការអ៊ីស្រាអែលបើកសវនាការលើករណីពុករលួយរបស់លោកនាយរកដ្ឋមន្ត្រី Benjamin Netanyahu នៅថ្ងៃអាទិត្យនេះ។
លោក Netanyahu គឺជានាយករដ្ឋមន្ត្រីអ៊ីស្រាអែលដែលកំពុងកាន់អំណាចដំបូងគេបង្អស់ ដែលត្រូវប្រឈមនឹងការចោទប្រកាន់ពីបទឧក្រិដ្ឋ ដែលក្នុងនោះមានដូចជាការលួចបន្លំ ការធ្វើឲ្យបាត់បង់ទំនុកចិត្ត និងការទទួលសំណូកជាដើម។
លោកក៏ត្រូវបានចោទប្រកាន់ថាបានកែប្រែបទបញ្ញត្តិសម្រាប់ឧកញ៉ាដ៏មានអំណាចខាងប្រព័ន្ធផ្សព្វផ្សាយម្នាក់ ដើម្បីជាថ្នូរនឹងការផ្សាយព័ត៌មានល្អៗអំពីលោកផងដែរ។
លោក Netanyahu គឺជាប្រធានគណបក្ស Likud ដែលប្រកាន់ស្ដាំនិយម។ លោកបានបដិសេធរាល់ការចោទប្រកាន់ទាំងអស់ ហើយបានហៅសវនាការនេះថាជាការតាមព្យាបាទលើរូបលោកពីពួកឆ្វេងនិយម។
សវនាការនេះធ្វើឡើង បន្ទាប់ពីលោក Netanyahu បានស្បថចូលកាន់តំណែងក្នុងអាណត្តិទី ៥ ដែលមិនធ្លាប់មានពីមុនមក បានរយៈពេលមួយសប្ដាហ៍។
លោកមិនចង់បង្ហាញខ្លួននៅក្នុងតុលាការនៅថ្ងៃអាទិត្យនេះទេ ប៉ុន្តែតុលាការនៅទីក្រុង Jerusalem បានចេញសាលក្រមកាលពីសប្ដាហ៍មុនថា វត្តមានរបស់លោក Netanyahu គឺចាំបាច់៕
