នៅថ្ងៃព្រហស្បតិ៍សប្តាហ៍មុននេះ គណៈកម្មាធិការជាតិរៀបចំការបោះឆ្នោតបានពន្យារពេលការពិនិត្យបញ្ជីឈ្មោះ និងចុះឈ្មោះអ្នកបោះឆ្នោតថ្មីចំនួនបីថ្ងៃបន្ថែមទៀតសម្រាប់ឃុំ សង្កាត់ចំនួន ៣១៦ ក្នុងខេត្តចំនួន១៣ដែលកំពុងលិចលង់ដោយទឹកជំនន់។ ការពន្យារពេលនេះត្រូវបានធ្វើឡើងស្របពេលដែលវិទ្យាស្ថានជាតិលទ្ធិប្រជាធិបតេយ្យ NDI របស់អាមេរិក និងអង្គការឃ្លាំមើលការបោះឆ្នោតមួយហៅថា និចហ្វិកបានចេញរបាយការណ៍មួយដែលបង្ហាញថា មានភាពមិនប្រក្រតីជាច្រើនកើតឡើងនៅក្នុងដំណើរការពិនិត្យបញ្ជីឈ្មោះ និងចុះឈ្មោះអ្នកបោះឆ្នោតនេះ។
គណៈកម្មាធិការជាតិរៀបចំការបោះឆ្នោត បានបញ្ជាក់នៅក្នុងសេចក្តីថ្លែងការណ៍របស់ខ្លួនថា ឃុំ សង្កាត់ទាំងនោះត្រូវបន្ថែមរយៈពេលសម្រាប់ ការពិនិត្យបញ្ជីឈ្មោះ និងការចុះឈ្មោះអ្នកបោះឆ្នោតថ្មីរហូតដល់ថ្ងៃទី១៨ ខែតុលា ខណៈដែលការចុះឈ្មោះអ្នកបោះឆ្នោតថ្មីនឹងត្រូវបិទបញ្ចប់ជាផ្លូវការនៅថ្ងៃទី១៥ ខែតុលា។
ក្នុងចំណោមខេត្តទាំង១៣ ខេត្តកំពង់ធំ មានចំនួនឃុំត្រូវពន្យារពេលច្រើនជាងគេគឺរហូតដល់៧១ឃុំ បន្ទាប់មកគឺខេត្តកំពង់ចាម មាន៥៦ឃុំ ខេត្តព្រៃវែង មាន៣៧ឃុំ។ ជាមួយនឹងការសម្រេចពន្យារការចុះឈ្មោះអ្នកបោះឆ្នោតថ្មីនេះ វិទ្យាស្ថាន NDI និងអង្គការនិចហ្វិច បានលើកឡើងថា ស្មៀនឃុំបានអនុញ្ញាតឲ្យអ្នកចុះឈ្មោះចុះឈ្មោះដោយគ្មានឯកសារគ្រប់គ្រាន់។ មានអ្នកចុះឈ្មោះបោះឆ្នោតថ្មីមួយចំនួនត្រូវបានអនុញ្ញាតឲ្យចុះបញ្ជីដោយមិនចាំបាច់បង្ហាញខ្លួនចំពោះ មុខស្មៀនឃុំនោះឡើយ។ម្យ៉ាងវិញទៀតស្មៀនឃុំ ក៏បានបដិសេធការចុះឈ្មោះឲ្យប្រជាពលរដ្ឋដែលកាន់អត្តសញ្ញាណប័ណ្ណផុតកំណត់ផងដែរ។
ការលើកឡើងបែបនេះបន្ទាប់ពី វិទ្យាស្ថាន NDI និងអង្គការនិចហ្វិច បានធ្វើការឃ្លាំមើលដំណើរការចុះបញ្ជីឈ្មោះអ្នកបោះឆ្នោតថ្មីរយៈពេល១០គឺចាប់ពីថ្ងៃទី១ដល់ថ្ងៃទី១០ខែតុលានេះ នៅក្នុងឃុំសង្កាត់ចំនួន២៩៩នៃឃុំ សង្កាត់សរុប១.៦២១ទូទាំងប្រទេសកម្ពុជា។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោត បានបដិសេធរបាយការណ៍របស់វិទ្យាស្ថាន NDI និងអង្គការនិកហ្វិច ដោយបញ្ជាក់ថា គ្មានមូលដ្ឋានច្បាស់លាស់។
«ស្មៀនក្រុមប្រឹក្សាឃុំ សង្កាត់ តំណាងគណបក្សប្រជាជនកម្ពុជា គណបក្សសម រង្សី គណបក្សហ៊្វុនស៊ិនប៉ិច និងអ្នកសង្កេតការណ៍នៅទីនោះបានរាយការណ៍ថា ពុំមានករណីនេះទេ។ យើងឃើញថារបាយការណ៍ដែលគាត់ថ្លែងការណ៍នេះមួយចំនួនមិនដូចគ្នាដែលកើតឡើងនៅមូលដ្ឋាន»។
លោក ទេព នីថា បានបញ្ជាក់ថា ប្រជាពលរដ្ឋជាង៦៦ម៉ឺននាក់ត្រូវបានចុះឈ្មោះបោះឆ្នោតរហូតដល់ថ្ងៃទី៥ ខែតុលានេះ គឺលើសចំនួនប៉ាន់ស្មានដែលមានតែជាង ៤៧ម៉ឺននាក់៕