ភ្ជាប់​ទៅ​គេហទំព័រ​ទាក់ទង

ផ្កាយរណប​ឥណ្ឌា​បញ្ជាក់​ថា​ចិន​មិន​បានបង្វែរ​ផ្លូវ​ទឹក​ទន្លេ​ទេ


អ្នក​នេសាទត្រី​ចំអិន​អាហារ​នៅ​លើ​ទូក​របស់​គេ​នៅ​លើ​ទន្លេ​ប្រាម៉ាពុត្រានៅទីក្រុងហ្គោហាទី នៅក្នុង​រដ្ឋ​អាសាម​នៅ​ភាគ​​ឦសាន​ប្រទេស​ឥណ្ឌា​ នៅថ្ងៃទី​១៥​ខែមិថុនា ឆ្នាំ ​២០១១។​

រដ្ឋាភិបាល​របស់​ប្រទេស​ឥណ្ឌា​និយាយ​ថា​ខ្លួន​មិន​ខ្វាយខ្វល់​អំពី​ការណ៍​ដែល​ចិន​បង្វែរ​ផ្លូវ​ទឹក​ឬ​កាត់​បន្ថយ​ចំនួន​ទឹក​ហូរពី​ទន្លេ​ដ៏​ធំ​មួយ​ដែល​ចិន​ប្រើ​ប្រាស់​ជា​មួយ​ឥណ្ឌា​នោះ​ទេ។ ការ​វាយ​តម្លៃ​នោះ​ធ្វើ​ឡើង ​មួយ​ផ្នែក​ធំ​ដោយ​ប្រើ​ផ្កាយ​រណប​ឃ្លាំ​មើល​របស់​ឥណ្ឌា​ពី​លើ​ដែន​ដី​ចិនដែល​មាន​សមត្ថភាព​ខ្លាំង​ពូកែ។

ប្រភព​ចេញ​ពី​រដ្ឋាភិបាល​ឥណ្ឌា​និយាយ​ថា​ «បច្ចេកវិទ្យា​ថ្នាក់​ខ្ពស់​ខ្លាំង​អស្ចារ្យ» អាច​បង្ហាញ​ រូបភាព​ «ច្បាស់​ចែស» ​អំពី​អ្វី​ដែល​ចិន​បាន​ធ្វើ​នៅ​លើ​តំបន់​ព្រំដែន​ទិសឦសាន​ប្រទេស។ ប្រភព​នោះ​និយាយ​ថា​ដោយ​សារ​តែ​មូលហេតុ​ដូច្នោះ​ហើយ ​ទើប​រដ្ឋាភិបាល​ទី​ក្រុង​New ​Delhi ​មិន​មាន​ការ​ព្រួយបារម្ភ​អ្វី​ទាំង​អស់​នៅ​ពេល​នេះ អំពី​សេចក្ដី​ប្រាថ្នា​របស់​ចិន​ដែល​ចង់​ កាត់​បន្ថយ​ចំនួន​ទឹក​ហូរ​នៅ​ក្នុង​ទន្លេ​ធំៗ ចូល​ទៅ​ក្នុង​ប្រទេស​ឥណ្ឌា​ ពី​ដែនដី​ទីបេ​ ដែល​ចិន​ត្រួតត្រា។

រដ្ឋម​ន្ដ្រី​ក្រសួង​ការ​បរទេស​ឥណ្ឌា​ លោក​ស.ម. គ្រិស្នា​ (S.M. Krishna)​ បាន​ធ្វើ​ជា​ម្ចាស់​ផ្ទះ​ដែល​ទទួល​ភ្ងៀវ​ លោក​ប្រមុខ​ របស់​រដ្ឋ​ អាសាម​ នៃ​តំបន់​ឦសាន​ប្រទេស​ឥណ្ឌា​Tarun ​Gogoi​ នៅ​ក្នុង​ទី​ក្រុង​ New ​Delhi​ កាល​ពី​ថ្ងៃ​ព្រហស្សតិ៍។​ លោក​ Gogoi​ បាន​សម្ដែង​ការ​ព្រួយ បារម្ភ​ជា​សាធារណៈ ​អំពី​សេចក្ដី​រាយការណ៍​ប្រមើល​មើល​ របស់​បណ្ដាញ​ព័ត៌មាន​ជា​ញឹក​ញាប់​ថា​ ទំនប់​ចិន​បាន​សង់​ឡើង​នៅ​ពី​លើ​ខ្សែ​ទឹក​ទន្លេ​ រួម​ជា​មួយ​គ្នា​ ដែល​នឹង​នាំ​ឲ្យ​ទឹក​ហូរ​តិច​ជាង​មុន។ ទន្លេ​ Brahmaputra ​របស់​ប្រទេស​ឥណ្ឌា​ ហៅ​ទន្លេ Yarlung​Tsangpo ជា​ភាសា​ចិន​ មាន​សារៈ​សំខាន់​ដល់​អាយុ​ជីវិត​ ដល់​ការ​បង្ហូរ​ទឹក​ចូល​ស្រែ​និង​ផ្ដល់​កម្លំាង​វារីអគ្គីសនី​ប្រើ​ប្រាស់​នៅ​ក្នុង​រដ្ឋ​ឥណ្ឌា​ជា​ច្រើន ​និង​នៅ​ក្នុង​ប្រទេស​ បឹងក្លាដេស្ហ។

លោក​រដ្ឋមន្ដ្រី​ គ្រិស្នា​ថ្លែង​ថា​ការ​ធានា​ពី​ប្រទេស​ចិន​ជា​មួយ​នឹង​ព័ត៌​មាន​ដែល​ឥណ្ឌា​ខ្លួន​ឯង​អាច​បញ្ជាក់​ បាន​បង្ហាញ​ថា​គំរោងការ​ទំនប់​វារីគ្គីសនី​ចិន​មិន​គំរាម​ដល់​ផល​ប្រយោជន៍​របស់​ទន្លេ​ឥណ្ឌា​ទេ។

«បញ្ហា​នៃ​ការ​បង្វែរ​ទឹក​ហូរ​ ឬ ​បញ្ហា​នៃ​ការ​ឃាត់​ទឺក​ទុក​មិន​កើត​ឡើង​ទេ»។

ចិន​ និង​ ឥណ្ឌា​ បាន​ធ្វើ​ការ​ពិពណ៌នា​អំពី​ទំនប់​ចិន​ថា​ជា​ប្រភេទ​វារីអគ្គីសនី​ធុន​ថ្មី​ ដែល​គេ​យក​ទឹក​ហូរ​ជា​ធម្មជាតិ​ និង​ កំពស់​ផ្ទៃ​ដី​ទាប​របស់​ទន្លេ​មក​ប្រើ​ប្រាស់​ដើម្បី​ផលិត​អគ្គីសនីដែល​ជា​គំរោងការ​វារី​អគ្គីសនី ​មិន​រាំង​ខ្ទប់​ការ​ទឹក​ហូរ​ជា​ធម្មជាតិ​របស់​ទន្លេ​ តែ​ផ្ទុយ​ទៅ​វិញ​គេ​ប្រើ​ការ​ហូរ​ទឹក​ជាធ​ម្មជាតិ​ របស់​ទន្លេ​ដើម្បី​ផលិត​ថាមពល។

លោក​ប្រមុខ​នៃ​រដ្ឋ​អាសាម Gogoi ដើរ​ចេញ​ពី​កិច្ច​ប្រជុំ​ ជា​មួយលោក​គ្រិស្នា​ប្រកប​ទៅ​ដោយ​ការ​ទុក​ចិត្ដ។

«ខ្ញុំ​មាន​ការ​ទុក​ចិត្ដ​ថា នឹង​មិន​មាន​ការ​ខ្វះ​ទឹក​ប្រើ​ទេ ដោយ​សារ​តែ​គេ​មិន​មាន​ការ​បង្វែរ​ទឹក​ទេ​ ហើយ​វា​មិន​ជា​មូល​ហេតុ​ធ្វើ​ឲ្យ​មាន​ការ​ព្រួយបារម្ភ»។

គេ​មិន​ឃើញ​មាន​កិច្ច​ព្រមព្រៀង​តាម​ផ្លូវ​ការ​ណា​មួយ​ទេ​ រវាង​ឥណ្ឌា​ និង​ ចិន​ ក្នុង​ការ​ប្រើ​ប្រាស់​រួម​នៃ​ទឹក​ទន្លេ​ Brahmaputra។ តែ​យ៉ាង​ណា​ម៉ិញ ​ប្រភព​របស់​រដ្ឋាភិបាល​ឥណ្ឌា​ និយាយ​តាម​ពាក្យ​ផ្ទាល់​ថា​ ប្រទេស​ទាំង​ពីរ​ «នឹង​ពិភាក្សា​អំពី​អ្វី​ដែល​ជា​ការ​ចាំ​បាច់​«តាម​រយៈ​ ក្រុម​ការងារ​ អំពី​ទឹក ​ដែល​ គេ​ជួប​ប្រជុំ​ជា​ញឹកញាប់។

រដ្ឋ​ឥណ្ឌា​មួយ​ដែល​ប្រើ​ប្រាស់​ទឹក​ទន្លេ គឺ​រដ្ឋ Arunachal​ Pradesh ​មិន​បាន​ត្រូវ​ ចិន​ទទួល​ស្គាល់​តាម​ផ្លូវការទេ​ ថា​ជា​ផ្នែក​មួយ​របស់​ប្រទេសឥណ្ឌា។ ផែនទី​ចិន​បាន​បង្ហាញ​រដ្ឋ​នោះ​ ជា​ «ទីបេ​ភាគ​ខាង​ត្បូង»។

ដោយ​សារ​តែ​មូលហេតុដូច្នោះ​ និង​មូល​ហេតុ​ដទៃ​ទើប​រឿង​ពាក់​ព័ន្ធ​នឹង​ព្រំដែន​ភ្នំ​ហេមពាន្ដ​រវាង​ចិន​ និង​ ឥណ្ឌា​មាន​ភាព​តានតឹង​តិចតួច​ជាយូរ​មក​ហើយ។

ប្រភព​រដ្ឋាភិបាល​ឥណ្ឌា​ និយាយ​ថា​គេ​នឹង​បន្ដ​តាម​ឃ្លាំ​មើល​សកម្ម​ភាព​ របស់​រដ្ឋាភិបាល​ចិន​នៅ​តាម​បណ្ដោយ​ទន្លេ​ Brahmaputra ​ដោយ​ប្រើ​ឧបករណ៍​ផ្កាយ​រណប​ដែល​មាន​សមត្ថភាព​កាន់​តែ​ខ្ពស់​ឡើង​ក្នុង​រយៈ​ពេល​ពីរ​ឆ្នាំ​កន្លង​ទៅ​នេះ។ ប្រភព​នោះ​ចង្អុល​បង្ហាញ​ថា​សមត្ថភាព​ទាំង​នោះ​ក៏​អាច​អនុញ្ញាត​ឲ្យ​ឥណ្ឌា​តាម​ឃ្លាំ​មើល​ចលនា​យោធា​របស់​ប្រទេស​ចិន​នៅ​តាម​បណ្ដោយ​ព្រំដែន​បាន​ផង​ដែរ។

ប្រែ​សម្រួល​ដោយ​ អ៊ូ ធួក

XS
SM
MD
LG