នៅព្រឹកថ្ងៃសុក្រនេះ រដ្ឋសភាបានបើកសម័យប្រជុំលើកទី៨ នីតិកាលទី៥ ដោយមានការចូលរួមពីសមាជិកសមាជិកាសរុប៩៩រូប។ អង្គប្រជុំបានលើកយកសេចក្ដីស្នើច្បាប់ស្ដីពីវិសោធនកម្មច្បាប់ស្ដីពីលក្ខន្តិកៈមន្រ្តីរាជការនៃក្រុមនីតិប្បញ្ញត្តិ ដែលត្រូវបានស្នើឡើងដោយតំណាងរាស្ត្រ២៩រូប យកមកពិភាក្សា និងអនុម័ត។
មន្ត្រីរាជការនៃក្រុមនីតិប្បញ្ញត្តិសំដៅលើមន្ត្រីក្នុងក្របខ័ណ្ឌរដ្ឋនៃអគ្គលេខាធិការដ្ឋានព្រឹទ្ធសភា អគ្គលេខាធិការដ្ឋានរដ្ឋសភា និងអគ្គលេខាធិការដ្ឋានក្រុមប្រឹក្សាធម្មនុញ្ញ។
ក្នុងកិច្ចពិភាក្សានេះ លោក ងឹម ញេង តំណាងរាស្ត្រគណបក្សសង្គ្រោះជាតិបានឡើងបញ្ចេញមតិទៅលើមាត្រាមួយចំនួននៃសេចក្ដីស្នើវិសោធនកម្មច្បាប់នេះ។
លោក ងឹម ញេង បានលើកឡើងពីមាត្រា៦៥ថ្មីនៃច្បាប់នេះដែលបានចែងពីអាយុសម្រាប់មន្ត្រីរាជការនៃក្រុមនីតិប្បញ្ញត្តិចូលនិវត្តន៍ ដោយបានកំណត់អាយុ៦០ឆ្នាំសម្រាប់ក្របខ័ណ្ឌអភិបាល (ប្រភេទ ក) ៥៨ឆ្នាំសម្រាប់ក្របខ័ណ្ឌឧបការី (ប្រភេទ ខ) និង៥៥ឆ្នាំត្រូវចូលនិវត្តន៍សម្រាប់ក្របខ័ណ្ឌលេខាធិការ (ប្រភេទ គ)។
មាត្រា៦៥ថ្មីដដែលនេះក៏បានចែងផងដែរថា អ្នករាជការក្នុងក្របខ័ណ្ឌទាំង៣ខាងលើដែលដល់អាយុចូលនិវត្តន៍ អាចត្រូវអនុញ្ញាតឱ្យបន្តការងារតាមការស្នើរបស់សាមីខ្លួន និងតាមសេចក្ដីសម្រេចរបស់ប្រធានស្ថាប័ន។ ការបន្តការងារនេះមានរយៈពេល១ឆ្នាំម្ដង តែមិនឱ្យលើសពី៣ដង។
លោក ងឹម ញេង ស្នើឱ្យលុបចោលគោលការណ៍ដែលអនុញ្ញាតឱ្យបន្តការងាររយៈពេល១ឆ្នាំ ចំនួន៣ដងនេះចេញ។
«ការដាក់កន្លែងនេះហាក់បីដូចជាបើកច្រកមួយ ឱ្យមន្ត្រីដែលជាពិសេសដែលមានអំពើពុករលួយនិងបក្សពួកនិយមហ្នឹងមានឱកាសបន្តធ្វើការងារតទៅទៀត»។
លោក ងឹម ញេង ថ្លែងបន្តថា អាយុដែលបានកំណត់សម្រាប់ចូលនិវត្តន៍នេះគឺសមរម្យ និងជាការទុកឱកាសឱ្យអ្នកជំនាន់ក្រោយដើម្បីបន្តតំណែង។
«ហើយបើចង់ឱ្យក្មេងជំនាន់ក្រោយបានចូលកាន់តំណែងជំនួស ហេតុអីបានបើកឱកាសឱ្យគាត់តមួយឆ្នាំម្ដងៗដល់ទៅ៣ឆ្នាំ?»
ជាការឆ្លើយតប លោក ឡេង ប៉េងឡុង អគ្គលេខាធិការរដ្ឋសភា និងជាសមាជិកនៃក្រុមអ្នកការពារសេចក្ដីស្នើច្បាប់នេះបានមានប្រសាសន៍ថា គោលការណ៍អនុញ្ញាតឱ្យបន្តការងារនេះគឺសម្រាប់មន្ត្រីសំខាន់ដែលចាំបាច់សម្រាប់ស្ថាប័ន និងមិនទាន់មានមន្ត្រីមកជំនួស។ លោកថា ការអនុញ្ញាតឱ្យមន្ត្រីណាមួយអាចបន្តការងារពេលដល់អាយុចូលនិវត្តន៍នេះគឺជាឆន្ទានុសិទ្ធិរបស់ប្រធានស្ថាប័ន។
«ប្រសិនបើមានអ្នកថ្មីដែលមានសមត្ថភាពត្រឹមត្រូវ ប្រហាក់ប្រហែលហើយ អាចជំនួសបាន មិនបាច់ទុកអ្នកហ្នឹងក៏បានដែរ។ ប៉ុន្តែបើសិនជាប្រធានស្ថាប័នយល់ថា លោកហ្នឹងគាត់សំខាន់នៅកន្លែងហ្នឹង ជាចាំបាច់គាត់កាន់កូនសោ គាត់មានប្រវត្តិគាត់ស្អីៗច្បាស់ អាហ្នឹងជាការចាំបាច់ ប្រធានស្ថាប័នមានសិទ្ធិទុកឱ្យគាត់បម្រើការ១ឆ្នាំទៀត ដើម្បីឱ្យស្ថាប័នដំណើរការបានល្អ»។
ក្រោយកិច្ចពិភាក្សា អង្គសភាបានសម្រេចអនុម័តយល់ព្រមលើសេចក្ដីស្នើច្បាប់ស្ដីពីវិសោធនកម្មច្បាប់ស្ដីពីលក្ខន្តិកៈមន្ត្រីរាជការនៃក្រុមនីតិប្បញ្ញត្តិនេះ ដោយទទួលបានសំឡេង៩៣។
លោក ឱក សេរីសោភក្តិ៍ អ្នកឯកទេសខាងអភិបាលកិច្ចល្អមានប្រសាសន៍ថា ការអនុញ្ញាតឱ្យមន្ត្រីដែលដល់អាយុចូលនិវត្តន៍អាចស្នើសុំបន្តការងារបាន អាចជារឿងល្អចំពោះមន្ត្រីខ្លួនឯងផង ដោយពួគគាត់អាចទទួលបានប្រាក់បៀវត្សរ៍សម្រាប់ជីវភាព និងល្អសម្រាប់ស្ថាប័នទៅតាមតម្រូវស្ថានភាពជាក់ស្ដែង។
ទោះយ៉ាងណា លោកបន្ថែមថា ការអនុញ្ញាតឲ្យមន្ត្រីដែលគ្រប់អាយុចូលនិវត្តន៍បន្តការងារនេះត្រូវឈរលើគោលការណ៍នៃភាពចាំបាច់ និងតម្លាភាព។
«ក៏ប៉ុន្តែការដែលធ្វើហ្នឹងគឺតោងធ្វើនៅក្នុងលក្ខណៈសុចរិតភាព ហើយនិងសមភាព ដើម្បីឱ្យភ្នែកសាធារណជនទាំងអស់ហ្នឹងមើលទៅឃើញថា អ្នកហ្នឹងសមនឹងទុកមែន»។
លោក ឱក សេរីសោភក្តិ៍ បន្តទៀតថា មន្ត្រីដែលត្រូវចូលនិវត្តន៍ គួរត្រូវបានអនុញ្ញាតឱ្យស្នើសុំបន្តការងារម្ដងឬ២ដង ដែលមានរយៈពេលសរុប២ឆ្នាំជាការគ្រប់គ្រាន់ សម្រាប់ស្ថាប័នដើម្បីរកមន្ត្រីមកជំនួសនិងបន្តការងារនេះ៕
