នៅមុនការសម្រាកសម្រាប់ពិធីបុណ្យណូអែលនេះ សហរដ្ឋអាមេរិក កំពុងទទួលរងនូវព្យុះដ៏ធំមួយ។ ជើងយន្តហោះរាប់ពាន់របស់យន្តហោះដឹកអ្នកដំណើរ ត្រូវបានលុបចោលកាលពីថ្ងៃព្រហស្បតិ៍ម្សិលមិញ។
ទីភ្នាក់ងារអាកាសធាតុជាតិអាមេរិក និយាយថា ព្យុះជាប្រវត្តិសាស្ត្រនៃរដូវរងាមួយ កំពុងបន្ទុចបង្អាក់សកម្មភាពដឹកជញ្ជូនតាមផ្លូវអាកាស នៅក្នុងផ្នែកជាច្រើនរបស់ប្រទេសអាមេរិក ហើយអាចឆ្លងចូលដល់ចុងសប្តាហ៍នេះដែលជាថ្ងៃបុណ្យណូអែលផងដែរ។ មនុស្សប្រមាណជាង២០០លាននាក់ ឬប្រហែល៦០ភាគរយក្នុងសហរដ្ឋអាមេរិក កំពុងស្ថិតក្រោមការជូនដំណឹងឬការព្រមានពីអាកាសធាតុនៃរដូវរងានេះ។
ទីភ្នាក់ងារសារព័ត៌មាន AP រាយការណ៍ថា ក្នុងរដ្ឋ South Dakota អាជ្ញាធរក្នុងតំបន់ជនជាតិដើមកុលសម្ព័ន្ធអាមេរិក Rosebud Sioux និយាយថា គេកំពុងប្រឈមនឹងខ្យល់បក់ខ្លាំងឥតឈប់ឈរ ដែលធ្វើឱ្យមានការប៉ើងរបស់របររហូតដល់ជាង៣ម៉ែត្រក្នុងកន្លែងមួយចំនួន ស្របពេលដែលពួកគេកំពុងព្យាយាមសម្អាតផ្លូវ និងដឹកជញ្ជូនអុសនិងហ្គាសទៅឱ្យផ្ទះពលរដ្ឋជាច្រើន។
ទីភ្នាក់ងារអាកាសធាតុជាតិអាមេរិកនិយាយថា ខ្លួនបានចេញសារព្រមាននិងការណែនាំជាច្រើន ជុំវិញអាកាសធាតុដែលមិនធ្លាប់មានក្នុងពេលកន្លងទៅ។
ប្រធានាធិបតីសហរដ្ឋអាមេរិក លោក Joe Biden បានព្រមានកាលពីថ្ងៃព្រហស្បតិ៍ម្សិលមិញ ពីព្យុះដែលអាចបណ្តាលឱ្យគ្រោះថ្នាក់មួយ ដោយនិយាយថា៖ «នេះជាសារព្រមានដ៏ខ្លាំងមួយនៃអាកាសធាតុមិនល្អ ហើយអាចនឹងធ្វើឱ្យមានការប៉ះពាល់ជាខ្លាំង»។ លោក Biden ក៏បានលើកទឹកចិត្តដល់ពលរដ្ឋអាមេរិកទាំងអស់ឱ្យយកចិត្តទុកដាក់តាមដាននូវការព្រមានជូនដំណឹងរបស់អាជ្ញាធរមូលដ្ឋានផងដែរ៕
