នៅក្នុងប្រទេសសេណេហ្គាល់«ផ្ទះបៃតង» គំរូមួយត្រូវបានសង់ឡើងដើម្បីបង្ហាញពីបច្ចេកវិទ្យានៃឋាមពលកកើតឡើងវិញ ដែលជាផ្នែកមួយនៃកិច្ចប្រឹងប្រែងរវាងរដ្ឋាភិបាលអ៊ីស្រាអែល និងសេណេហ្គាល់ ដើម្បីធ្វើឲ្យប្រសើរឡើងនូវផលិតកម្មអាហារ និងកាត់បន្ថយការពឹងផ្អែកទៅលើឥន្ធនៈផូស៊ីល។
និវេសនដ្ឋានរបស់ឯកអគ្គរដ្ឋទូតអ៊ីស្រាអែលនៅទីក្រុងដាការ បានធ្វើការកែលម្អឲ្យស្របទៅតាមភាពអំណោយផលខាងបរិស្ថានដើម្បីប្រើប្រាស់ឋាមពលកកើតឡើងវិញឲ្យកាន់តែប្រសើរជាងមុន។ លោកឯកអគ្គរដ្ឋទូត ហ្គាយដេអុន បេហារ (Gideon Behar) មានប្រសាសន៍ថា និវេសនដ្ឋាននោះជាគំរូមួយស្តីពី ថាតើមនុស្សអាចរស់នៅ ដោយមានតុល្យភាពជាមួយបរិស្ថានយ៉ាងដូចម្តេច។
«ជាបឋម យើងបានបន្ថែមប្រព័ន្ធមួយ ដែលត្រូវបានហៅថាជាប្រព័ន្ធបិទបើកបង្ហូរទឹកដែលប្រើប្រាស់ទឹកតិចជាងមុន និងកាន់តែមានប្រសិទ្ធភាព។ ដូច្នេះ សួនច្បារទាំងអស់ ត្រូវបានបំពាក់ប្រព័ន្ធបិទបើកបង្ហូរទឹក។ បន្ថែមពីនោះទៀត យើងបានបន្ថែមឋាមពលប្រើពន្លឺព្រះអាទិត្យ ដើម្បីកំដៅទឹកសម្រាប់ងូត ឬការប្រើប្រាស់ក្នុងផ្ទះបាយ ហើយក៏ប្រើប្រព័ន្ធព្រះអាទិត្យសម្រាប់ចរន្តអគ្គិសនីនៅក្នុងផ្ទះជាដើម»។
ផ្ទះគំរូ មានរាប់បញ្ចូលទាំងគម្រោងលើវារីកសិកម្ម ដែលលោកឯកអគ្គរដ្ឋទូត បេហារ ថ្លែងថា គំរូនេះក៏អាចជួយធ្វើឲ្យប្រសើរឡើងនូវអាហារូបត្ថម្ភនៅសេណេហ្គាល់ដែរ។
«យើងកំពុងចិញ្ចឹមត្រី។ យើងចង់បង្ហាញប្រាប់ប្រជាពលរដ្ឋនៅសេណេហ្គាល់នេះថា ដោយគ្រាន់តែមានស្រះទឹកតូចមួយដែលឃើញមាននៅគ្រប់ទីកន្លែងនៅសេណេហ្គាល់ និងនៅទី្វបអាហ្រ្វិក វាជាការអាចអនុវត្តទៅរួច ដែលអ្នកអាចបង្កើនអាហារគ្រប់គ្រាន់ និងជាតិប្រូតេអ៊ីនគ្រប់គ្រាន់ដើម្បីបំពេញតម្រូវការក្នុងគ្រួសារនីមួយៗ»។
ការចាប់ផ្តើមគំរូ «ផ្ទះបៃតង» នៅស្ថានទូតអ៊ីស្រាអែល គូសបញ្ជាក់ឲ្យឃើញពីកិច្ចការរបស់អ៊ីស្រាអែល ដែលកំពុងវិនិយោគលើថាមពលកកើតឡើងវិញ។ លោក ឡូវីស សេក (Louis Seck) រដ្ឋមន្ត្រីក្រសួងថាមពលកកើតឡើងវិញរបស់សេណេហ្គាល់ ថ្លែងថា វាមានសារៈសំខាន់យ៉ាងពិសេសនៅក្នុងតំបន់សាហេល (Sahel)នេះ។
លោក សេក បានឲ្យដឹងថា សេណេហ្គាល់ មានថាមពលពន្លឺព្រះអាទិត្យដ៏សម្បូណ៌បែប ដើម្បីបូមទឹក កំដៅទឹក និងដំណើរការឧបករណ៍ជាច្រើន មានដូចជាម៉ាស៊ីនកុំព្យូទ័រជាដើម។ ដូច្នេះ លោកជឿជាក់ថា ការផ្តួចផ្តើមគំនិតរបស់អ៊ីស្រាអែល គឺជាចំណែកមួយដ៏អស្ចារ្យ ដើម្បីអភិវឌ្ឍថាមពលកកើតឡើងវិញនៅក្នុងប្រទេស។
លោក សេក ថ្លែងទៀតថា ថាមពលពន្លឺព្រះអាទិត្យ អាចធ្វើឲ្យជីវភាពប្រចាំថ្ងៃរបស់ពលរដ្ឋសេណេហ្គាល់ ប្រសើរឡើង។
លោក សេក និយាយថា រដ្ឋាភិបាលកំពុងស្នើឲ្យពលរដ្ឋគ្រប់រូបនៅសេណេហ្គាល់ ទទួលយកគម្រោងរបស់អ៊ីស្រាអែល ដែលលើកកម្ពស់ផ្ទះប្រភេទថ្មី ដែលចំណែកថាមពលមួយភាគធំសម្រាប់ប្រើប្រាស់ ត្រូវបានផលិតចេញពីថាមពលពន្លឺព្រះអាទិត្យ។
រដ្ឋាភិបាលអ៊ីស្រាអែល និងសេណេហ្គាល់ ក៏កំពុងធ្វើការសម្របទៅតាមបច្ចេកវិទ្យាថ្មី ដើម្បីដោះស្រាយវិបត្តិថាមពលរបស់ប្រទេស ខណៈដែលការដាច់ចរន្តអគ្គិសនីជារៀងរាល់ថ្ងៃ បង្ហាញពីអសមត្ថភាពរបស់រោងចក្រអគ្គិសនីសេណេហ្គាល់ ក្នុងការឆ្លើយតបតាមសេចក្តីត្រូវការដែលចេះតែកើនឡើងខាងចរន្តអគ្គិសនី ក្នុងពេលដែលតម្លៃប្រេងកើនឡើងខ្ពស់៕
ប្រែសម្រួលដោយ លី សុខឃាង
