ស្នងការអង្គការសហប្រជាជាតិទទួលបន្ទុកសិទ្ធិមនុស្សបានសម្តែងការព្រួយបារម្ភចំពោះស្ថានភាពសិទ្ធិសេរីភាពនយោបាយ សារព័ត៌មាន និងសង្គមស៊ីវិលនៅប្រទេសកម្ពុជាខណៈការបោះឆ្នោតជាតិកាន់តែជិតមកដល់។
លោក Volker Turk ស្នងការនៃស្នងការជាន់ខ្ពស់អង្គការសហប្រជាជាតិទទួលបន្ទុកសិទ្ធិមនុស្ស បានថ្លែងប្រាប់ដល់សម័យប្រជុំរបស់ក្រុមប្រឹក្សាសិទ្ធិមនុស្សនៅទីក្រុងហ្សឺណែវ នៅថ្ងៃអង្គារ ទី ៧ ខែមីនា ថា៖ «នៅកម្ពុជា រដ្ឋាភិបាលនៅតែបន្តគាបសង្កត់អ្នកនយោបាយប្រឆាំង អ្នកការពារសិទ្ធិមនុស្ស និងប្រព័ន្ធផ្សព្វផ្សាយឯករាជ្យ។ វិធានការនេះត្រូវបានបន្ទរដោយការបិទប្រព័ន្ធផ្សព្វផ្សាយមួយគឺវិទ្យុសំឡេងប្រជាធិបតេយ្យ (VOD) និងការកាត់ទោសធ្ងន់ធ្ងរមិនធម្មតាកាលពីសប្តាហ៍មុនលើលោក កឹម សុខា ប្រធានគណបក្សប្រឆាំងពីបទចោទប្រកាន់ដែលគួរឱ្យចោទសួរ»។
លោក កឹម សុខា អតីតមេដឹកនាំគណបក្សសង្រ្គោះជាតិត្រូវបានតុលាការកាត់ទោសកាលពីថ្ងៃសុក្រសប្តាហ៍មុនឱ្យជាប់ពន្ធនាគាររយៈពេល ២៧ ឆ្នាំ ពីបទ «ក្បត់ជាតិ»។ តុលាការក៏បានហាមឃាត់លោកមិនឱ្យធ្វើនយោបាយ និងមិនត្រូវបានអនុញ្ញាតឲ្យជួបជនបរទេសឡើយ លើកលែងតែមានការអនុញ្ញាតពីតុលាការ។
ក្រសួងព័ត៌មានកម្ពុជាបានលុបចោលអាជ្ញាបណ្ណរបស់វិទ្យុសំឡេងប្រជាធិបតេយ្យ (VOD) កាលពីពាក់កណ្តាលខែកុម្ភៈ ក្រោយពីបានផ្សាយព័ត៌មានពាក់ព័ន្ធនឹងជំនួយរបស់កម្ពុជាដល់ជនរងគ្រោះដោយសារគ្រោះរញ្ជួយដីនៅប្រទេសតួកគី ដែលថាលោកឧត្តមសេនីយ៍ឯក ហ៊ុន ម៉ាណែត បានចុះហត្ថលេខាលើលិខិតជំនួយជំនួសលោកនាយករដ្ឋមន្ត្រី ហ៊ុន សែន ដែលជាឪពុក។ ប៉ុន្តែអ្នកទាំងពីរបានបដិសេធនិងទាមទារឱ្យ VOD សុំទោស។ រដ្ឋាភិបាលបានបិទសារព័ត៌មាននេះបើទោះជាមានការសុំទោសពីថ្នាក់ដឹកនាំនៃស្ថាប័នវិទ្យុឯករាជ្យនេះក៏ដោយ។
លោក Volker Turk បានបន្ថែមថា៖ «សកម្មភាពទាំងនេះប៉ះពាល់យ៉ាងធ្ងន់ធ្ងរដល់លម្ហស៊ីវិល និងនយោបាយ រួមទាំងបរិយាកាសសម្រាប់ការបោះឆ្នោតដោយសេរី និងយុត្តិធម៌នៅខែកក្កដាខាងមុខនេះផងដែរ»។
លោក Volker Turk បានបញ្ជូនសារដល់មេដឹកនាំកម្ពុជា ក៏ដូចជាមេដឹកនាំប្រទេសមួយចំនួនដែលនៅមិនទាន់គោរពសិទ្ធិមនុស្ស និងសិទ្ធិនយោបាយបក្សប្រឆាំងឱ្យស្តាប់ប្រជាជន និងជាពិសេសជនរងគ្រោះ និងអ្នកការពារសិទ្ធិមនុស្ស។
លោកបានបន្ថែមថា៖ «អ្នកទាំងនេះគឺជាមនុស្សដែលមានបទពិសោធន៍យ៉ាងស៊ីជម្រៅអំពីបញ្ហាទាំងនេះ ហើយពួកគេមានអ្វីដែលត្រូវនិយាយថាអ្នកត្រូវស្តាប់»៕
