ក្រុមហ៊ុន Meta ដែលជាក្រុមហ៊ុនមេរបស់ក្រុមហ៊ុន Facebook និង Instagram បានថ្លែងថា ខ្លួនបានឧបត្ថម្ភថវិកា១លានដុល្លារដល់មូលនិធីស្បថចូលកាន់តំណែងរបស់លោកប្រធានាធិបតីជាប់ឆ្នោត Donald Trump។
ការឧបត្ថម្ភនេះធ្វើឡើងប៉ុន្មានសប្តាហ៍បន្ទាប់ពីនាយកប្រតិបត្តិក្រុមហ៊ុន Meta លោក Mark Zuckerberg បានជួបជាមួយលោក Trump លក្ខណៈឯកជននៅវិមានMar-a-Lago។ អ្នកនាំពាក្យក្រុមហ៊ុន Meta មួយរូបបានបញ្ជាក់អំពីការផ្តល់ថវិកានេះនៅថ្ងៃព្រហស្បតិ៍។ ព័ត៌មាននេះត្រូវបានរាយការណ៍ដំបូងដោយសារព័ត៌មាន The Wall Street Journal។
លោក Stephen Miller ដែលត្រូវបានតែងតាំងជានាយខុទ្ទកាល័យរងរបស់លោក Trump ក្នុងអាណត្តិទី២នោះបានថ្លែងថា លោក Zuckerberg ដូចមេដឹកនាំពាណិជ្ជកម្មដទៃទៀតដែរ ចង់គាំទ្រផែនការសេដ្ឋកិច្ចរបស់លោក Trump។ នាយកប្រតិបត្តិក្រុមហ៊ុនបច្ចេកវិទ្យារូបនេះចង់កែប្រែទស្សនៈក្រុមហ៊ុនរបស់លោកទៅលើខាងស្តាំនិយម ក្រោយមានទំនាក់ទំនងរង្គោះរង្គើជាមួយលោក Trump។
លោក Trump ត្រូវបានដកចេញពីហ្វេសប៊ុកក្រោយការវាយប្រហារថ្ងៃ៦ មករា ឆ្នាំ ២០២១ ទៅលើវិមានសភាសហរដ្ឋអាមេរិក។ ក្រុមហ៊ុននេះបានអនុញ្ញាតឱ្យគណនីរបស់លោកដំណើរការឡើងវិញកាលពីដើមឆ្នាំ២០២៣៕
