កាលពីដើមសប្តាហ៍នេះ ពេលដែលប្រទេសចិនបានចេញផ្សាយនូវតួលេខសេដ្ឋកិច្ច របស់ខ្លួនសម្រាប់ខែកក្កដា ថ្លៃទំនិញជាមធ្យម ឬ សន្ទស្សន៍ថ្លៃទំនិញប្រើប្រាស់ បានកើនឡើង ៦.៥ ភាគរយ ដែលជាការកើនឡើងដ៏ខ្ពស់បំផុតនៅក្នុងរយៈពេល ៣ ឆ្នាំនេះ។ ការកើនឡើងថ្លៃចំណីអាហារ រួមទាំងការកើនឡើងនៃថ្លៃសាច់ជ្រូក គឺកំពុងតែនាំមុខគេ។ មធ្យោបាយមួយ ក្នុងចំណោមមធ្យោបាយផ្សេងៗ ដែលអ្នកប្រើប្រាស់ជនជាតិចិនកំពុងតែដោះស្រាយជាមួយ នឹងការចំណាយក្នុងកម្រិតតិចតួចដែលបណ្តាលមកពីអតិផរណា គឺការបែរទៅរកប្រព័ន្ធអ៊ីនធឺណែត និង ការទិញទំនិញជាក្រុម។
ចាប់ពីការផ្តល់ឲ្យពិសេសលើវិស្សមកាល រហូតដល់សណ្ឋាគារ ភោជនីយដ្ឋាន អាហារ និង ការសម្តែងនៅតាមរោងមហោស្រព វិបសាយទិញទំនិញជាក្រុមនៅក្នុងប្រទេសចិនកំពុងតែផ្តល់ឲ្យអ្នកប្រើប្រាស់ដែលចង់ចំណាយលុយតិចទិញតាមវិបសាយនូវក្រុមតម្លៃផ្សេងៗដែលមើលទៅគួរឲ្យវិលមុខ។
ជាងនេះទៅទៀត ការប្រកួតប្រជែងតាមប្រព័ន្ធអ៊ីនធឺណែតមានលក្ខណៈខ្លាំងក្លាបំផុត។ យោងទៅលើរបាយការណ៍ថ្មីៗនេះដែលចេញផ្សាយដោយ Technode.com ដែលជា Blog តាមប្រព័ន្ធអ៊ីនធឺណែតផ្តោតលើព័ត៌មានពីបច្ចេកវិទ្យា និង មតិយោបល់នៅក្នុងប្រទេសចិន គេឃើញមានវិបសាយទិញទំនិញជាក្រុមតាមប្រព័ន្ធអ៊ីនធឺណែតចំនួនជាង ១០០០ នៅក្នុងប្រទេសចិន។
លោក Wu Bo នាយកប្រតិបត្តិរបស់ក្រុមហ៊ុន Lashouដែលជាវិបសាយទិញទំនិញជាក្រុមនាំមុខគេមួយនៅក្នុងប្រទេសចិន និយាយថា ទីផ្សារកំពុងអភិវឌ្ឍយ៉ាងរហ័សនៅក្នុងប្រទេសចិន ហើយនៅមានឱកាសសំរាប់ទីផ្សាររីកចម្រើនបន្ថែមទៀត។
“ការទិញជាក្រុមគឺត្រូវនឹងទម្លាប់របស់ប្រជាពលរដ្ឋចិនមែនទែន។ ពួកគេឆ្លាតណាស់ក្នុងការសន្សំលុយ ហើយក៏ជាអ្នកប្រើប្រាស់ដ៏ឆ្លាតផងដែរ។ ជាងនេះទៅទៀត ដោយសារតែការរីកចម្រើននៃប្រព័ន្ធអ៊ីនធឺណែត គេអាចស្វែងរកផលិតផលថោកៗ និងទុកចិត្តបានជាច្រើនតាមអ៊ីនធឺណែត។មួយថ្លៃៗ វិបសាយទិញទំនិញជាក្រុមភាគច្រើនផ្សព្វផ្សាយពីប័ណ្ណបញ្ចុះតម្លៃជាច្រើនដែលផ្តល់ជូនពីហាងលក់ផលិតផលផ្សេងៗតាមប្រព័ន្ធអ៊ីនធឺណែត ដោយផ្តល់ការបញ្ចុះតម្លៃឲ្យអ្នកប្រើប្រាស់ ពេលដែលអ្នកទិញគ្រប់ចំនួនកំណត់ចុះឈ្មោះចូលរួមក្នុងការផ្តល់ឲ្យនេះ។
កាលពីថ្ងៃព្រហស្បតិ៍ ទំព័រមុខរបស់វិបសាយ Lashou បង្ហាញពីការផ្តល់ឲ្យពិសេសចំពោះអាហារប៊ូហ្វេរពេលល្ងាច និង ស្ប៉ា នៅសណ្ឋាគារប៉េកាំង សំបុត្រទស្សនាទៅកាន់សួនតាមសមុទ្រនៅទីក្រុងសៀងហៃ និង គ្រឿងសម្អាង។
អ្នកផ្តល់ឲ្យភាគច្រើនផ្សព្វផ្សាយពីការបញ្ចុះតម្លៃយ៉ាងតិច ៥០ ភាគរយ។
Dataotuan.com ជាវិបសាយដែលវិភាគពីសហគមន៍ផ្តល់ការបញ្ចុះតម្លៃទ្រង់ទ្រាយធំប្រចាំថ្ងៃរបស់ប្រទេសចិន បានឲ្យដឹងថា បើនិយាយពីចំណូលវិញ Lashou គឺជាទីផ្សារទិញទំនិញជាក្រុមនាំមុខគេរបស់ប្រទេសចិន។
នាយកប្រតិបត្តិ Wu Bo និយាយថា Lashou បានចាប់ផ្តើមធ្វើការតាមប្រព័ន្ធអ៊ីនធឺណែតតាំងពីខែមិនា ឆ្នាំទៅ ហើយឥឡូវនេះ Lashou កំពុងប្រតិបត្តិការនៅក្នុងទីក្រុងចំនួន ១៨០ ក្នុងប្រទេសចិន ដោយជួលបុគ្គលិកច្រើនជាង ៦០០០ នាក់៕
ប្រែសម្រួលដោយ ភី សុភាដា
