វ៉ាស៊ីនតោន៖ ជម្ងឺគ្រុនចាញ់សម្លាប់មនុស្សប្រមាណមួយលាន និងធ្វើឲ្យមនុស្សឈឺ ២៥០ លាននាក់ទៀត ក្នុងមួយឆ្នាំៗ។ អ្នកស្លាប់ភាគច្រើនគឺកុមារនៅក្នុងទ្វីបអាហ្វ្រិក។ ជម្ងឺគ្រុនចាញ់បណ្តាលឲ្យកុមារចំនួន ២០ភាគរយស្លាប់ នៅក្នុងទ្វីបអាហ្វ្រិក។ មនុស្សកើតជម្ងឺគ្រុនចាញ់ នៅពេលណា ពួកគេត្រូវបានសត្វមូស ដែលមានផ្ទុកប៉ារាស៊ីតនៃជម្ងឺគ្រុនចាញ់ខាំ។
ការសិក្សាថ្មីមួយស្ទង់មើលលទ្ធភាពនៃការបញ្ចប់ជម្ងឺគ្រុនចាញ់នៅក្នុងប្រទេសទាំងឡាយដែលមានប្រភេទជម្ងឺមានគ្រោះថ្នាក់ស្លាប់ខ្លាំងបំផុត។ ក្រុមអ្នកស្រាវជ្រាវបានរកឃើញថា លទ្ធភាពនៃការបញ្ចប់ជម្ងឺគ្រុនចាញ់នេះ អាចសម្រេចបាននៅក្នុងកន្លែងជាច្រើននៃពិភពលោក ក្នុងកម្លុងពី១០ទៅ១៥ឆ្នាំ។
ក្រុមអ្នកស្រាវជ្រាវ និយាយថា អ្វីដែលត្រូវធ្វើនោះ គឺកាត់បន្ថយការរាលដាលជម្ងឺគ្រុនចាញ់ឲ្យបាន៩០ភាគរយពីអត្រាជម្ងឺគ្រុនចាញ់ឆ្នាំ២០០៧។
ក្រុមអន្តរជាតិមួយបានបង្កើតគំរូគណិតសាស្ត្រនិងផែនទីនៃតំបន់ទាំងឡាយដែលជម្ងឺនេះត្រូវបំបាត់អស់ ឬក្បែរនឹងអស់។ លោក Andrew Tatem សាស្ត្រាចារ្យជំនួយនៅសាកលវិទ្យាល័យ Florida បានដឹកនាំការសិក្សានេះ។ សាស្ត្រាចារ្យ Tatem មានប្រសាសន៍ថា កិច្ចការមួយចំនួនបានជួយប្រទេសទាំងឡាយ ប្រយុទ្ធជម្ងឺគ្រុនចាញ់ដោយមានជោគជ័យ។
«ដូចជា ការចាប់ផ្តើមធ្វើឲ្យមានកម្រិតទាបនៃគ្រោះថ្នាក់ជម្ងឺគ្រុនចាញ់ ស្ថេរភាពនៃនយោបាយ ប្រព័ន្ធសុខភាពល្អ,និងចលនាប្រជាជននាំជម្ងឺមកពីកន្លែងផ្សេងៗមានកម្រិតទាបជាដើម»។
ការសិក្សានិយាយថា ជម្ងឺគ្រុនចាញ់អាចកំចាត់បាន ប្រសិនបើប្រទេសទាំងឡាយ យកចិត្តទុកដាក់ប្រើវិធានការត្រួតពិនិត្យដែលមានប្រសិទ្ធភាព។ វិធានការទាំងនេះរួមមានការប្រើថ្នាំសម្លាប់សត្វល្អិត និងការប្រើមុងដេក។ មូលនិធិ Bill and Melinda Gates បានផ្តល់ប្រាក់ដោយភាគខ្លះដល់ការសិក្សា។ ការសិក្សាមានចេញផ្សាយនៅក្នុងទស្សនាវដ្តីពេទ្យ The Lancet នៅក្នុងសេចក្តីរាយការណ៍មួយឈុតនៃសេចក្តីរាយការណ៍ស្តីអំពីការកំចាត់ជម្ងឺគ្រុនចាញ់។
ក្រុមអ្នកជំនាញការផ្សេងទៀតដែលសរសេរនៅក្នុងទស្សនាវដ្តី The Lancet ដែរ បានបញ្ចេញការព្រួយបារម្ភអំពីការផ្តោតការយកចិត្តទុកដាក់ខ្លាំងពេកទៅលើការកំចាត់ជម្ងឺគ្រុនចាញ់។ ក្រុមអ្នកជំនាញការទាំងនោះនិយាយថា គោលដៅមួយនេះអាចប្រើពេលច្រើនឆ្នាំ ប្រសិនបើវាមានលទ្ធភាពធ្វើបានទាំងស្រុង។ ការបារម្ភនោះគឺថា ធនធានសម្រាប់ត្រួតត្រាជម្ងឺគ្រុនចាញ់ អាចត្រូវខាតបង់ ប្រសិនបើប្រាក់កាសនេះត្រូវចំណាយបានជាជំនួសទៅលើការព្យាយាមបំបាត់ជម្ងឺគ្រុនចាញ់វិញនោះ។
ជាច្រើនឆ្នាំនៃកិច្ចប្រឹងប្រែងដើម្បីកំចាត់ជម្ងឺមួយទៀត គឺ Polio ភាគច្រើនបានទទួលជោគជ័យ។ ឥឡូវនេះ អង្គការសុខភាពពិភពលោកនិយាយថា មានថ្នាំវ៉ាក់សាំងផ្សំគ្នាថ្មីមួយនឹងជួយនៅក្នុងការប្រយុទ្ធដល់ទីបញ្ចប់នៃជម្ងឺ Polio នៅក្នុងប្រទេសទាំងឡាយដែលនៅតែរកឃើញថាមានជម្ងឺនេះ។
សេចក្តីរាយការណ៍នោះ ដែលយោងតាមការសិក្សាមួយមកពីប្រទេសឥណ្ឌា ក៏មាននៅក្នុងទស្សនាវដ្តី The Lancet ដែរ។
មេរោគនៃជម្ងឺ Polio មានបីប្រភេទ។ យុទ្ធនាការផ្តល់ថ្នាំវ៉ាក់សាំង ជាប្រក្រតី គេប្រើថ្នាំវ៉ាក់សាំងដែលធ្វើសំរាប់ការពារជម្ងឺ Polio ទាំងបីប្រភេទនោះ។
ប៉ុន្តែករណីនៃ Virus ជម្ងឺ Polio ប្រភេទទី២ មិនដែលបានឃើញទេក្នុងពេលច្រើនឆ្នាំកន្លងមកនេះ។ ហើយការសិក្សាថ្មីបានបញ្ជាក់ថា ថ្នាំវ៉ាក់សាំងសំរាប់ការពារ Polio ប្រភេទទី២ បានធ្វើឲ្យចុះថយប្រសិទ្ធិភាពថ្នាំវ៉ាក់សាំងដទៃទៀត នៅពេលណាប្រើជាមួយគ្នា។
ដើម្បីជៀសវាងកុះឲ្យបញ្ហា ថ្នាំផ្សំថ្មី មានថ្នាំវ៉ាក់សាំងតែពីរមុខទេគឺសំរាប់ការពារVirus ជម្ងឺ Polio ប្រភេទ១ និងVirus ជម្ងឺ Polio ប្រភេទ៣៕
ប្រែសម្រួលដោយ នុច សារីតា
