កាលពីប៉ុន្មានខែថ្មីៗនេះតម្លៃប្រេងឆៅបានជួបប្រទះនូវការធ្លាក់ចុះយ៉ាងខ្លាំងបំផុតចាប់តាំងពីមានវិបត្តិហរិញ្ញវត្ថុក្នុងឆ្នាំ២០០៨ ហើយឥឡូវនេះមានតម្លៃប្រហែល៨០ដុល្លារក្នុងមួយធុង។ តើអត្ថន័យនៃការចុះតម្លៃប្រេងចំពោះអតិថិជននិងសេដ្ឋកិច្ចសហរដ្ឋអាមេរិកយ៉ាងដូចម្ដេចដែរ?។
នៅតាមបណ្តោយផ្លូវយន្តបថ(ហៃវ៉េ)ដ៏សំខាន់មួយឡើងទៅកាន់រដ្ឋធានីរបស់សហរដ្ឋអាមេរិក អ្នកទេសចរណ៍ម្នាក់មកពីទ្វីបអឺរ៉ុបកំពុងចាក់សាំងឡានជួលរបស់លោក នៅឯស្ថានីយ៍បេ្រងឥន្ធនៈមួយកន្លែង។
លោក ហ្វើលីក្ស ប្រាហ្វ (Felix Braz) ជឿថាការបញ្ចុះតម្លៃប្រេងឥន្ធនៈនឹងមិនអាចឋិតឋេរយូរបានទេ។
«ជាការពិតណាស់ តម្លៃប្រេងនឹងស្ទុះឡើងវិញដោយសារតែតម្រូវការកំពុងកើនឡើងនៅទូទាំងពិភពលោក ហើយធនធានបម្រុងទាំងអស់នោះមិនបានកើនឡើងទេ ហើយវាមិនពិបាកយល់ទេថា នៅថ្ងៃណាមួយឬថ្ងៃក្រោយទៀត យើងនឹងអស់ប្រេងឥន្ធនៈជាក់ជាពុំខាន»។
លោកប្រាហ្វ មកពីប្រទេសលុច្សហ្សាមប៊ួ (Luxembourg) ដែលនៅទីនោះ តម្លៃប្រេងថ្លៃជាងជិតពីរដងបើប្រៀបធៀបជាមួយតម្លៃនៅសហរដ្ឋអាមេរិក ដោយសារតែពន្ធលើប្រេងឥន្ធនៈ។
អតិថិជនម្នាក់ទៀតនៅស្ថានីយ៍ប្រេងឥន្ធនៈនេះដែរ គឺឈ្មោះ អាកមេឌ អាល់ ហេលូ (Ahmed Al Hellu) មានដើមកំណើតពីប្រទេសហ្ស៊កដានី (Jordan)។ លោកគិតថា ឥន្ធនៈនៅសហរដ្ឋអាមេរិកមានតម្លៃថ្លៃហួសពេកទៅហើយ។
«កាលពីម្ង៉ៃណោះ ខ្ញុំបាននិយាយជាមួយមិត្តភ័ក្ដិម្នាក់នៅកាតា (Qatar) ហើយគាត់បានថ្លែងថា ប្រេងមួយហ្គាឡុងមានតម្លៃ៧៥សេន បើប្រៀបធៀបទៅនឹងអ្វីដែលយើងមាននៅទីនេះ គឺ៣.៩៩ដុល្លារ ដែលឡើងជិត៤ដុល្លារក្នុងមួយហ្គាឡុង។ នោះគឺជាតម្លៃខុសគ្នាខ្លាំងណាស់ លោកដឹងទេ។ ប្រការនោះនាំឲ្យយើងមានវិបត្តិថវិកា»។
អាល់ហេលូ បើកមុខជំនួញសម្រាប់ទំនិញនាំចូល ហើយបាននិយាយថាតម្លៃឥន្ធនៈថោកជាងនេះនឹងផ្តល់ឲ្យលោកនូវភាពធូរស្រាលដែលត្រូវការយ៉ាងខ្លាំង។
«មិនគ្រាន់តែសម្រាប់ខ្ញុំនោះទេ។ វានឹងមានលទ្ធផលធំធេងសម្រាប់ប្រទេសទាំងមូល ដោយសារតែថា នៅពេលដែលតម្លៃប្រេងធ្លាក់ចុះ អ្នកនឹងមានមនុស្សដឹកទំនិញ ឬរបស់របបរផ្សេងៗមកឲ្យហាងរបស់ពួកគេ។ តម្លៃនឹងចុះថោក។ ការលក់ដុំនឹងចុះថ្លៃដែរ សណ្ឋាគារ និងអ្វីៗគ្រប់យ៉ាងនឹងចុះថ្លៃ ដោយសារតែអ្វីៗទាំងអស់មានទំនាក់ទំនងជាមួយគ្នាទៅវិញទៅមក»។
ចាប់តាំងពីខែមេសាមក តម្លៃប្រេងឆៅក្នុងមួយធុងបានធ្លាក់ចុះចំនួនប្រហែល៣០ដុល្លារ។ សេដ្ឋវិទូបានថ្លែងថា តម្លៃប្រេងចុះថោកនេះ គឺជាប់ទាក់ទងជាមួយការព្រួយបារម្ភថាសេដ្ឋកិច្ចដែលកាន់តែយឺតយ៉ាវ នឹងធ្វើឲ្យថយចុះនូវការបញ្ជាទិញប្រេងដែរ៕
ប្រែសម្រួលដោយ លី សុខឃាង
