សូមរង់ចាំតាមដានព័ត៌មានផ្សេងៗជុំវិញដំណើរការបោះឆ្នោត និងលទ្ធផលបឋមនៃការបោះឆ្នោតឃុំសង្កាត់ អាណត្តិទី៤ ឆ្នាំ២០១៧ តាមរយៈ Live Blog របស់ VOA នាពេលខាងមុខនេះ។
ប្រជាពលរដ្ឋនៅរាជធានីភ្នំពេញ កំពុងចូលរួមបោះឆ្នោតនៅការិយាល័យនៅតាមមាត់ទន្លេ នៅសង្កាត់ផ្សារកណ្តាលទី១ នៅរាជធានីភ្នំពេញ។ ការិយាល័យបោះឆ្នោត ចាប់ផ្តើមបើកនៅម៉ោង៧ព្រឹក។ លោក សុខ ខេមរា នៃ VOA និងកញ្ញា ហ៊ាន សុជាតា កំពុងយកសេចក្តីរាយការណ៍ផ្សាយផ្ទាល់តាមហ្វេសប៊ុក។
ប្រជាពលរដ្ឋនាំគ្នាទៅបោះឆ្នោតនៅឃុំសំរោងក្នុង ស្រុកឯកភ្នំ ខេត្តបាត់ដំបង។ លោក អ៊ិត សូធឿត នៃ VOA កំពុងចុះយកព័ត៌មានផ្ទាល់នៅការិយាល័យសាលាធម្មសភាវត្តកែវ នៅព្រឹកថ្ងៃអាទិត្យ ទី៤ ខែមិថុនា ឆ្នាំ២០១៧។
លោកនាយករដ្ឋមន្ត្រី ហ៊ុន សែន ដែលជាប្រធានគណបក្សប្រជាជនកម្ពុជា និងភរិយា លោកស្រី ប៊ុនរ៉ានី ហ៊ុនសែន ចូលរួមបោះឆ្នោត ដើម្បីជ្រើសរើសក្រុមប្រឹក្សាឃុំ-សង្កាត់ នៅសង្កាត់តាខ្មៅនៃក្រុងតាខ្មៅ នៅខេត្តកណ្តាលនៅថ្ងៃទី៤ ខែមិថុនា ឆ្នាំ២០១៧។ កញ្ញា កាន់ វិច្ឆិកា និងកញ្ញា ខាន់ សុគុំមនោ នៃ VOA កំពុងយកសេចក្តីរាយការណ៍ពីការិយាល័យនោះ។
