- ដោយ Reuters
មេដឹកនាំអាស៊ានមួយចំនួននិងមេដឹកនាំមកពីបណ្តាប្រទេសផ្សេងៗទៀត បានជួបពិភាក្សាគ្នានៅក្នុងកិច្ចប្រជុំកំពូលអាស៊ីបូព៌ា លើកទី ១៧ នៅរាជធានីភ្នំពេញ នៅថ្ងៃអាទិត្យនេះ។ មេដឹកនាំកូរ៉េខាងត្បូង ជប៉ុន ចិន អូស្ត្រាលី និងណូវែលសេឡង់ មានវត្តមានក្នុងកិច្ចប្រជុំកំពូលនេះ រួមទាំងរដ្ឋមន្ត្រីការបរទេសរុស្ស៊ី។ ក៏ប៉ុន្តែ ប្រធានាធិបតីសហរដ្ឋអាមេរិកលោក Joe Biden មិនបានចូលរួមកិច្ចប្រជុំនេះទេ ហើយបានធ្វើសន្និសីទសារព័ត៌មានអំពីការបោះឆ្នោតពាក់កណ្តាលអាណត្តិប្រធានាធិបតីនៅសហរដ្ឋអាមេរិក។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មាន Reuters៕
ប្រធានាធិបតីសហរដ្ឋអាមេរិកលោក Joe Biden បានបញ្ចប់ទស្សនកិច្ចរបស់លោកនៅរាជធានីភ្នំពេញដើម្បីចូលរួមកិច្ចប្រជុំកំពូលអាស៊ាន អាមេរិក និងកិច្ចប្រជុំកំពូលពាក់ព័ន្ធ នៅរាជធានីភ្នំពេញ នារសៀលថ្ងៃអាទិត្យ ទី១៣ ខែវិច្ឆិកា។ លោក Biden ធ្វើដំណើរឆ្ពោះទៅកាន់ប្រទេសឥណ្ឌូណេស៊ី ដើម្បីចូលរួមកិច្ចប្រជុំកំពូលរបស់បណ្តាប្រទេសមានសេដ្ឋកិច្ចជឿនលឿនទាំង ២០ ហៅថា G-20 ដែលនៅទីនោះលោកនឹងជួបពិភាក្សាទ្វេភាគីជាមួយប្រធានាធិបតីចិនលោក Xi Jinping៕
- ដោយ Reuters
ប្រធានាធិបតីឥណ្ឌូណេស៊ីប្តេជ្ញាថាមិនធ្វើឲ្យតំបន់អាស៊ីអាគ្នេយ៍ក្លាយជាសមរភូមិប្រយុទ្ធជួរមុខនៃសង្គ្រាមត្រជាក់ថ្មីមួយជាដាច់ខាត ខណៈភាពតានតឹងកំពុងកើនឡើងរវាងសហរដ្ឋអាមេរិកនិងចិន។ ខណៈឥណ្ឌូណេស៊ីក្លាយជាប្រធានអាស៊ាន លោក Joko Widodo បានថ្លែងថា អាស៊ានមិនអាចក្លាយជា «ភ្នាក់ងាររបស់មហាអំណាចណាមួយឡើយ»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។ លោកបញ្ជាក់ថា តំបន់អាស៊ីអាគេ្នយ៍ដែលមានពលរដ្ឋសរុបជាង ៧០០ លាននាក់ «ចាំបាច់ត្រូវតែជាតំបន់ដ៏ថ្លែថ្នូរមួយ» ហើយ «ប្រកាន់ខ្ជាប់នូវតម្លៃមនុស្សធម៌និងលទ្ធិប្រជាធិបតេយ្យ»។ គោលការណ៍ទាំងនេះកំពុងប្រឈមនឹងបញ្ហាក្តោបក្តាប់យោធានៅមីយ៉ាន់ម៉ា និងក្តីបារម្ភអំពីបញ្ហាសិទ្ធិមនុស្សនៅកម្ពុជា។ កាលពីថ្ងៃអាទិត្យ ក្នុងកិច្ចប្រជុំកំពូលអាស៊ីបូព៌ា លោកនាយករដ្ឋមន្ត្រី ហ៊ុន សែន ក៏បានថ្លែងថា ភាពតានតឹងសកលបច្ចុប្បន្នកំពុងក្លាយជាបន្ទុកដល់ប្រទេសជាច្រើនក្នុងតំបន់៕
លោក Fumio Kishida នាយករដ្ឋមន្ត្រីជប៉ុន បានថ្លែងប្រាប់បណ្តាមេដឹកនាំនៅតំបន់អាស៊ីនៅថ្ងៃអាទិត្យថា ចិនកំពុងធ្វើសកម្មភាពកាន់តែច្រើននិងឥតឈប់ឈរដែលរំលោភលើអធិបតេយ្យភាពរបស់ប្រទេសជប៉ុន ហើយបញ្ឆេះភាពតានតឹងថែមទៀតនៅក្នុងតំបន់។ ថ្លែងក្នុងកិច្ចប្រជុំកំពូលអាស៊ីបូព៌ាលើកទី ១៧ លោក Kishida ថា ការធានាឲ្យបាននូវសន្តិភាពនិងស្ថិរភាពនៅតំបន់កោះតៃវ៉ាន់មានសារៈសំខាន់សម្រាប់សន្តិសុខក្នុងតំបន់ ដោយលោកក៏បាន«ក្តីបារម្ភធ្ងន់ធ្ងរ»លើស្ថានភាពសិទ្ធិមនុស្សរបស់ក្រុមជនជាតិអ៊ុយហ្គ័រ (Uyghur)។ នេះបើយោងតាមសេចក្តីថ្លែងការណ៍មួយដែលចេញផ្សាយដោយក្រសួងការបរទេសជប៉ុន ហើយត្រូវបានរាយការណ៍ដោយទីភ្នាក់ងារព័ត៌មាន Reuters៕
