ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលា​ក្រុង​និង​សហគមន៍​ខ្មែរ​គ្រោង​បង្កើត​កូន​ទីក្រុង​ខ្មែរ​ក្នុង​ក្រុង​ឡូវែល


លោក Bernard Lynch ដែល​ជា​នាយក​គ្រប់គ្រង​ទីក្រុង​ឡូវែល ​Lowell City Manager​បាន​ដឹកនាំ​មន្ត្រី​សាលា​ក្រុម​៥​នាក់​មក​​ធ្វើ​បទ​បង្ហាញ​ និងសួរ​យោបល់​ពលរដ្ឋ​ខ្មែរ-អាមេរិកាំង​ ដែល​ជា​ពាណិជ្ជករ​ តំណាង​សហគមន៍ ​និង​​សមាគម​ខ្មែរ។ ​​
លោក Bernard Lynch ដែល​ជា​នាយក​គ្រប់គ្រង​ទីក្រុង​ឡូវែល ​Lowell City Manager​បាន​ដឹកនាំ​មន្ត្រី​សាលា​ក្រុម​៥​នាក់​មក​​ធ្វើ​បទ​បង្ហាញ​ និងសួរ​យោបល់​ពលរដ្ឋ​ខ្មែរ-អាមេរិកាំង​ ដែល​ជា​ពាណិជ្ជករ​ តំណាង​សហគមន៍ ​និង​​សមាគម​ខ្មែរ។ ​​

កាល​ពី​ថ្ងៃ​ទី​៣១​មិនា​កន្លង​មក​នេះ​ ក្រុម​មន្ត្រី​សាលាក្រុង​ឡូវែល​ មក​ធ្វើ​បទបង្ហាញ​អំពី​គម្រោង​បង្កើត​ទីក្រុង​ខ្មែរ​ A Little Cambodia ​នៅ​មជ្ឈមណ្ឌល​គាំពារ​សុខភាព​មនុស្ស​ចាស់ ​គឺ ​Lowell Elder Care ​នៃ​ទីក្រុង​ឡូវែល។​ បទបង្ហាញ​នេះ​ពន្យល់​អំពី​ម្រោង​អភិវឌ្ឍន៍ ​Little Cambodia​ ឬ Cambodia Town។ ​ឈ្មោះ​ជា​ភាសា​ខ្មែរ​មិនទាន់​បាន​កំណត់​ច្បាស់លាស់​នៅ​ឡើយ​ទេ​ ប៉ុន្តែ​អាច​មាន​ឈ្មោះ​ថា​ ភូមិ​វប្បធម៌ខ្មែរ​នៃ​ក្រុង​ឡូវែល ​ភូមិខ្មែរ​នៃ​ក្រុង​ឡូវែល​ ឬ​កូន​ទីក្រុង​ខ្មែរ​នៃ​ក្រុង​ឡូវែល។

លោក Bernard Lynch ដែល​ជា​នាយក​គ្រប់គ្រង​ទីក្រុង​ឡូវែល ​Lowell City Manager​បាន​ដឹកនាំ​មន្ត្រី​សាលា​ក្រុម​៥​នាក់​មកធ្វើ​បទ​បង្ហាញ​ និងសួរ​យោបល់​ពលរដ្ឋ​ខ្មែរ-អាមេរិកាំង​ ដែល​ជា​ពាណិជ្ជករ​ តំណាង​សហគមន៍ ​និងសមាគម​ខ្មែរ។​លោក Lynch មាន​ប្រសាសន៍​ប្រាប់​អ្នក​ចូលរួម​ជិត​១០០​នាក់​យ៉ាង​ដូច្នេះ​ថា៖

«កន្លង​មក​សាលា​ក្រុង​បាន​ជួសជុល​ផ្លូវ​ កែ​លម្អ​ឧទ្យាន​ប៉ៃលិន​ ដែល​ជា​មណ្ឌល​កីឡា​ កន្លែង​លេង​បាល់ ​ហើយ​ការ​ខិតខំ​ប្រឹងប្រែង​ជា​បន្ត​នៅ​ថ្ងៃ​នេះ​គឺ​ការ​បង្កើត​តំបន់​ពិសេស​មួយ​ដែល​ហៅ​ថា​ ភូមិខ្មែរ​ ឬ​ទីក្រុង​ខ្មែរ​ដើម្បី​ជា​ការ​ទទួល​ស្គាល់​នូវ​ការ​ចូលរួម​ចំណែក​ទាំង​សេដ្ឋ​កិច្ច​ វប្បធម៌ ​នយោបាយ​របស់​សហគមន៍​ខ្មែរ​នៅ​ក្នុង​ទីក្រុង​ឡូវែល»។

លោក​បន្ថែម​ថា​ កន្លង​មក​សាលាក្រុង​បាន​ចំណាយ​ប្រហែល​៣០​ម៉ឺន​ដុល្លារ​ ហើយ​សាលា​ក្រុង​វាយ​តម្លៃ​ថា ​ក្នុង​ដំណាក់​កាល​ចាប់ផ្តើម​គម្រោងនេះ សាលាក្រុង​ឡូវែល​នឹង​ចំណាយ​រវាង​៦០០​០០០​ ឬ​៧០០០០០​ដុល្លារ ​គួប​ផ្សំ​នឹង​ថវិកាភាគទាន​ពី​សហគមន៍​ពាណិជ្ជករ​ខ្មែរ។​ គម្រោង​នេះ​នឹង​ចាប់​ផ្តើម​ជា​ផ្លូវការ​នៅ​រដូវក្តៅ​ក្នុង​ពេល​យ៉ាង​យូរ​៣​ខែ​ទៀត។​ ការ​អភិវឌ្ឍ​និងការកែ​លម្អ​ទីក្រុង​ខ្មែរ​នេះ​នឹង​បន្ត​រហូត​ ដូច្នេះ​មិន​អាច​កំណត់​ថា ​គ្រោងទាំងមូល​ចំណាយ​អស់​ប៉ុន្មាន​ទេ។

ក្នុង​ពេល​ធ្វើ​បទបង្ហាញ​អំពី​ម្រោង​អភិវឌ្ឍន៍​Little Cambodia ​ឬ Cambodia Town​នេះ ​ លោក ​Adam Baccke ​ជំនួយ​ការ​របស់​នាយក​គ្រប់គ្រង​ទីក្រុង​ឡូវែល​ មាន​ប្រសាសន៍​ថា​ នៅ​តាម​ផ្លូវ​សំខាន់​ចំនួន​៤​ចូល​ទីក្រុង​ខ្មែរ​ ឬ​ភូមិខ្មែរ​នេះ​ នឹង​មាន​ខ្លោង​ទ្វារ​ ឬ​ រូប​ចម្លាក់​ ឬ​ ស្លាក​សញ្ញា​ ដែល​មាន​រចនាបថ​វប្បធម៌​ខ្មែរ​ដើម្បី​បង្ហាញ​ប្រាប់​អ្នក​ដំណើរ​ថា​ គេ​បាន​ចូល​ដល់​ភូមិ​ខ្មែរ​ ឬ​ក្រុងខ្មែរ។

លោក​មាន​ប្រសាសន៍​ថា៖​ «នេះ​គឺ​ជា​គម្រោង​បង្កើត​ក្រុងខ្មែរ​របស់​យើង។​ ទីមួយ​នឹង​មាន​ការ​ដាក់​ស្លាក​សញ្ញា​សម្គាល់​ ដូចជា​ខ្លោង​ទ្វារ​សម្គាល់​ថា​ ហ្នឹង​គឺ​ជា​ខ្លោង​ទ្វារ​ចូល​ក្រុងខ្មែរ ​ឬ​ក៏​អ្វី​ផ្សេងៗ​ ដែល​មាន​រចនាបថ​ជា​ខ្មែរ»។

លោក​ Baccke​បន្ត​ថា​ សាលា​ក្រុង​និង​សហគមន៍​ខ្មែរ​គួរ​រៀបចំ​កម្ម​វិធី​កម្សាន្ត​ផ្សេងៗ​ដើម្បី​ផ្សព្វផ្សាយ​ និង​ទាក់ទាញ​ចំណាប់​អារម្មណ៍​ចំពោះ​គម្រោង​នេះ។

លោក​រ៉ាស៊ី អាន ​នាយក​ប្រតិបត្តិ​នៃ​សមាគម​ខ្មែរ​ក្រុង​ឡូវែល​ មាន​ប្រសាសន៍​ថា​ ខ្មែរ​ម្ចាស់​ហាង​ជា​ច្រើន​ចាប់​អារម្មណ៍​នឹង​គ្រោង​នេះ​ ហើយ​ចង់​កែ​លម្អ​កន្លែង​រកស៊ី​របស់​ខ្លួន​ឲ្យ​មាន​លក្ខណៈ​ជា​ខ្មែរ។​ លោក​សង្ឃឹម​ថា​ ការ​អភិវឌ្ឍ​ទីក្រុង​ខ្មែរ​នេះ​នឹង​បង្កើន​ការងារ​ធ្វើ​ បង្កើន​សកម្មភាព​រកស៊ី​ សកម្មភាព​ទេសចរណ៍​ សកម្មភាព​វប្បធម៌​ ហើយ​ជា​លទ្ធផល​ សាលាក្រុង​នឹង​កើន​ចំណូល​ពន្ធ​ពី​ការ​រីកចម្រើន​នេះ។

លោក​មាន​ប្រសាសន៍​ថា ​«សាលាក្រុង​បាន​ជម្រាប​ថា​ ដើម្បី​ឲ្យ​កិច្ចការ​នេះ​រីក​ចម្រើន​ គេ​ត្រូវការ​ឲ្យ​អ្នក​ណា​ចង់​ចូលរួម​ខាង​ហ្នឹង​ ដូចជា​យើង​មាន​មុខ​របរ​រកស៊ី​អ្វីមួយ​ យើង​ចង់ធ្វើ​ឲ្យ​ហាង​យើង​មាន​រចនា​ស្អាត​ យើង​ត្រូវ​ចំណាយ​២០%​ សាលាក្រុង​ចំណាយ​៨០%»។

លោក​ពន្យល់​ថា​ ម្ចាស់​ហាង​ត្រូវ​លើក​គម្រោង​កែ​លម្អ​ ឬ​គម្រោង​អភិវឌ្ឍន៍​កន្លែង​រកស៊ី​របស់​ខ្លួន​ជូន​ទៅ​សាលា​ក្រុង​ ហើយ​បើ​សាលាក្រុង​យល់​ថា​ វា​ទាក់ទង​នឹង​គម្រោង​អភិឌ្ឍន៍របស់​សាលាក្រុង​ នោះ​សាលាក្រុង​នឹង​ជួយ​ចំណាយ​៨០%។

អ្នក​ចូលរួម​ទាំងអស់​អបអរសាទរ​គម្រោង​នេះ។

លោក​ឈួរ ហេង​ អាយុ​ជាង​៥៤ឆ្នាំ ​បាន​សម្តែង​ការ​គាំទ្រ​ ហើយ​ប្តេជ្ញា​ថា​ នឹង​ចូលរួម​ភាគទាន​ដល់​គម្រោង​នេះ​ ជាពិសេស​ការ​ធ្វើ​ខ្លោងទ្វារ​ ឬ​រូប​ចម្លាក់​ជា​រចនាបថ​ខ្មែរ។

«មាន​ផ្សារ​ខ្មែរ​ បង​ប្អូន​ស្រុះស្រួល។ ​ លុយ​ខ្ញុំ​សុំ​ស្ម័គ្រ​ចិត្ត​ជួយ​មុន​គេ។​ បើ​ច្រើន​អត់​មាន​ទេ​ តែ​បើ​ល្មម​រត់រួច​ ខ្ញុំ​ស្ម័គ្រ​ចិត្ត​ជួយ។​ សូម​អរគុណ​ អស់​យោបល់»។

អ្នកស្រី​ហាក់​ ស៊ីផន​ មក​រស់នៅ​ស.រ.អា.ក្នុងឆ្នាំ​១៩៨៥​ជា​មួយ​ប្តី ​និង​កូន​៤​នាក់។​ អ្នក​ស្រី​និយាយ​ថា​៖

«ខ្ញុំ​ត្រេក​អរណាស់​ដែល​បាន​គេ​ធ្វើ​អញ្ចឹង​ សប្បាយ​ចិត្ត។​ គេ​ចង់​បាន​យោបល់​យើង»។

រីឯ​អ្នកស្រី ដាយអិន ហាំង ​ដែល​មក​រស់នៅ​ក្នុង​ស.រ.អា.​ក្នុង​ឆ្នាំ​១៩៨១​ បន្ថែម​ថា​ «ខ្ញុំ​គាំទ្រ​១០០%។​ ខ្ញុំ​សប្បាយ​ចិត្ត​មែន​ទែន​ ​ ហើយ​វា​ស្រួល​ សម្រាប់​អ្នក​មក​ពី​ក្រៅ គេ​ដឹង​ថា​ ចូល​កន្លែង​ហ្នឹង​គឺ​ចូល​ក្រុងខ្មែរ​យើង​ហើយ»។

លោក​រស់ វង្ស ​ប្រធានមណ្ឌល​គាំពារ​សុខភាព​មនុស្ស​ចាស់​នៃ​ក្រុង​Lowell និង​លោក​ Bernard Lynch​ បាន​សម្រេច​ឲ្យ​ធ្វើ​បទ​បង្ហាញ​និង​ពិភាក្សា​គម្រោង​ក្រុង​ខ្មែរ​នៅ​មណ្ឌល​គាំពារ​សុខភាព​មនុស្ស​ចាស់​ ព្រោះ​អតីត​ជន​ភៀសខ្លួន​ទាំងនេះ​ជា​អ្នក​បង្កើត​សហគមន៍​ខ្មែរ​នៅ​ទីនេះ។

លោក​រស់ វង្ស​ពន្យល់​ថា​ «យើង​ទទួលស្គាល់​ថា​ ចាស់ៗ​ដឹកនាំ​កូន​ខ្មែរ។​ ដូច្នេះ​ហើយ​គាត់​មក​ទីក្រុង​នេះ​៣០​ឆ្នាំ។ គាត់​រត់​ យក​ក្មេង​ជំនាន់​ខ្ញុំ​មក​ គេច​គ្រាប់​ គេច​អម្បែង​ ទម្រាំ​មក​ដល់​ស្រុក​នេះ។​ ហើយ​គាត់​អត់​ចេះ​ភាសា​ ខំ​ធ្វើការ​ឲ្យ​ក្មេង​ជំនាន់​ក្រោយ​ទៅ​រៀន​ មាន​ការងារ​ល្អ ​គ្រួសារ​ល្អ។ គាត់​ធ្វើការ​ច្រើន​ ដើម្បី​ជួយ​សង្គម​ខ្មែរ​ឲ្យ​លូតលាស់ ​សង្គម​ខ្មែរ​លូតលាស់​ ជួយ​ថែ​ទាំ​វប្បធម៌​ខ្មែរ។​ ដូច្នេះ​ហើយ​ បើ​គេ​បង្កើត Little Cambodia​ក្នុងទី​ក្រុង​ឡូវែល គេ​គួរ​មក​ទីនេះ​ ព្រោះ​ចាស់ៗ​យើង​នេះ​ជា​អ្នក​មេ​ដឹកនាំ»។

ម្ចាស់​ហាង​ដែល​រវល់ ​មិនមាន​ពេល​មក​ចូលរួម​ស្តាប់​គម្រោង​អភិវឌ្ឍន៍​នេះ​ក៏​បាន​សម្តែង​ការ​គាំទ្រ​ដែរ។

លោក​យុទ្ធ​គឺ​ជា​ម្ចាស់​ហាង​7 Video​ ស្ថិត​ក្នុង​តំបន់​គម្រោង​អភិវឌ្ឍន៍​នេះ។ ហាងរបស់លោក​មាន​លក់​ឌីវីឌី​ ខារ៉ាអូខេ​ កុនខ្មែរ​ និង​កុន​បរទេស​ ហើយ​នឹងផលិត​ផល​សិប្បកម្ម​ខ្មែរ​ជាដើម។

លោក​និយាយ​ថា ​«វា​ជា​មោទន​ភាព​សម្រាប់​ប្រជាជន​ខ្មែរ​រស់នៅ​ទីក្រុង​ឡូវែល​ផង​ដែរ​ ដែល​មាន​ទីក្រុង​ខ្មែរ។ ​រក​ចំណូល​កាន់តែ​ច្រើន​ ហាង​ ដូចជា​ហាង​ខ្ញុំ​ បង់​ពន្ធ​កាន់តែ​ច្រើន។​ ហើយ​សាលាក្រុង​យក​ចិត្ត​ទុកដាក់​នឹង​សមាគម​ សហគមន៍​ខ្មែរ​ ឲ្យ​មាន​មុខមាន​មាត់»។

អ្នកស្រី​ម៉ាលី ​ម្ចាស់​ហាង​លក់​ទំនិញ​ និង​ភោជនីយ​ដ្ឋាន​ប៉ៃលិន​ មាន​ប្រសាសន៍​ថា​ អ្នកស្រី​មាន​គំនិត​រៀបចំហាង​ទំនិញ​របស់​អ្នកស្រី​ឲ្យ​មាន​រចនា​បថ ​លក្ខណៈ​ខ្មែរ​តាំង​ពីមុន​គម្រោង​អភិវឌ្ឍន៍​របស់​សាលា​ក្រុង​ម៉្លេះ​ ពីព្រោះ​ហាង​របស់​អ្នកស្រី​បាន​រៀបចំ​កម្ម​វិធី​សិល្បៈ ​វប្បធម៌​ខ្មែរ​ជា​ច្រើន​ ដូចជា​ការ​សម្តែង​របស់​តារា​ចម្រៀង​ សិល្បៈករ​មក​ពី​ប្រទេស​កម្ពុជា។

អ្នកស្រី​មាន​ប្រសាសន៍​ថា​ «ខ្ញុំ​ពេញ​ចិត្ត​ណាស់​ក្មួយ។ ​ខ្ញុំ​គិត​ថា​ បើ​គេ​អត់​ជួយ​ចេញ​ ក៏​ខ្ញុំ​នៅ​តែ​ធ្វើ។​ គិត​អញ្ចឹង​រួច​ហើយ។ ​យើង​ចង់​បាន​កន្លែង​ហ្នឹង​ស្អាត​ ចង់​បាន​កន្លែង​ហ្នឹង​ជា​ខ្មែរ។​ ប៉ុន្តែ​ដល់​ឥឡូវ​សាលាក្រុង​គេ​ចាប់ផ្តើម​ធ្វើ​អញ្ចឹង​ ដូច​ថា​ ការ​ស្រម៉ៃ​របស់​យើង​បាន​សម្រេច»។

លោក​អ៊ូ សុវណ្ណ ​មន្ត្រី​កុងស៊ូ​ខ្មែរ​ប្រចាំ​ក្រុង​ឡូវែល​ និយាយ​ថា​ ការ​បង្កើត​ក្រុង​ខ្មែរ​នេះ​នឹង​ជួយ​ពង្រីក​ទំនាក់​ទំនង​ជំនួញ​រវាង​ជនជាតិ​ខ្មែរ​នៅ​ក្រុង​ឡូវែល​ និង​ពាណិជ្ជករ​ខ្មែរ​នៅ​ស្រុក​ខ្មែរ។

«​ការ​បង្កើត​ក្រុង​ខ្មែរ​ហ្នឹង​មាន​សារៈ​ប្រយោជន៍​ក្នុង​ការ​បង្កើន​មុខ​របរ​អ្នក​បើក​ហាង​លក់​ម្ហូប​ ជា​ពិសេស​ ថ្មីៗ​នេះ​អាជីវករ​យើង​ទើប​ចាប់​ផ្តើម​នាំ​អង្ករ​ខ្មែរ​ចូល​ទីក្រុង​ដែល​មាន​ខ្មែរ​រស់​នៅ​ ដូច​ជា​ក្រុង​ឡូវែល​នេះ​តែ​ម្តង។​ កាល​ណា​យើង​មាន​ហាង​លក់​ទំនិញ និង​សិប្ប​កម្ម​ច្រើន​ ​វា​នឹង​បង្កើត​ការងារ​ធ្វើ​សម្រាប់​ខ្មែរ​យើង​នៅ​ទី​នេះ»។

អ្នក​ចូលរួម​ទាំងអស់​មាន​មោទន​ភាព​នឹង​គម្រោង​នេះ ​ហើយ​គេ​ចាប់​អារម្មណ៍​ជា​ពិសេស​ទាក់ទង​នឹង​ការ​រៀបចំ​ឲ្យ​មាន​រចនាបថ​វប្បធម៌​ខ្មែរ​នៅទីក្រុង​ខ្មែរ ​ឬ​ភូមិខ្មែរ​នេះ៕

XS
SM
MD
LG