ភ្ជាប់​ទៅ​គេហទំព័រ​ទាក់ទង

ក្រុម​ប្រឆាំង​លីប៊ី​ចង់​ឈប់​ប្រយុទ្ធ​គ្នា​ និង​ចាប់ផ្តើម​កសាង​ប្រទេស


អ្នក​​ប្រយុទ្ធ​ឧទ្ទាម​លីប៊ី​​ កំពុង​​ប្រយុទ្ធ​​នៅ​សណ្ឋាគារ​​ទីក្រុង​​ទ្រីប៉ូលី​ ថ្ងៃទី​២៥​​ ខែ​​សីហា​​ ឆ្នាំ​​២០១១។

សាកសព​ពលរដ្ឋ​លីប៊ី​ដែល​បាន​ស្លាប់​នៅ​ក្នុង​ការ​ប្រយុទ្ធ​របស់​ពួក​ឧទ្ទាម​ក្នុង​ការ​ដណ្តើម​ទីក្រុង​ ទ្រីប៉ូលី​ នៅ​ដេក​រណូក​រណែក​តាម​ដង​ផ្លូវ​ខាង​ក្រៅ​អតីត​អាគារ​ស្នាក់ការ​កណ្តាល​របស់​លោក​ ម៉ូអាម៉ារ​ ហ្កាដាហ្វី​ (Moammar​ Gadhafi)។​ ប៉ុន្តែ​ខណៈពេល​ដែល​ក្រុម​ប្រឆាំង​ប្រឹងប្រែង​ប្រយុទ្ធ​ប្រឆាំង​នឹង​ការ​តបត​របស់​ក្រុម​រដ្ឋាភិបាល​តាម​កន្លែង​មួយ​ចំនួន​នោះ​ក៏ដោយ​ ក៏​ប្រជាពលរដ្ឋ​ លីប៊ី​ ភាគច្រើន​ ប្រមើល​មើល​ហូសពី​ព្រឹត្តិការណ៍​ដ៏​ខ្លោចផ្សា​កាលពី​សប្តាហ៍​មុន​ ដោយ​ពួកគេ​សង្ឈឹម​ថា​ប្រទេស​ លីប៊ី​ នឹង​ក្លាយ​ជា​ប្រទេស​ដ៏​ថ្មី​ស្រឡាង​បំផុត​ និង​ធម្មតា​មួយ។

ហេឋារចនាសម្ព័ន្ធ​ភាគ​ច្រើន​ឋិត​នៅ​ដដែល។​ យន្តហោះ​ចម្បាំង​របស់​អង្គការ​ អូតង់​ បាន​បំផ្លាញ​ហេឋារចនាសម្ព័ន្ធ​របស់​រដ្ឋាភិបាល​ជា​ច្រើន​ ប៉ុន្តែ​ ហេឋារចនាសម្ព័ន្ធ​ជា​មូលដ្ឋាន​សម្រាប់​ការ​រស់នៅ​របស់​ប្រជាពលរដ្ឋ​ គឺ​ទឹក​ អគ្គីសនី​ អាហារ​ ដែល​កំពុងតែ​ខ្វះខាត​នោះ​ កំពុង​ចាប់​មាន​ឡើង​វិញ​ហើយ។

លោក​ ហ្វីតូរី​ អាប៊ុល​ ខាដឺរ៍​ (Fitori​ Abdl​ Khadr)​ ដែល​ជា​អ្នក​រស់នៅ​ក្នុង​រដ្ឋធានី​ដែល​ភាគច្រើន​កាន់កាប់​ដោយ​ពួកឧទ្ទាម​ ចង់​រក្សា​ចលនា​វិវត្ត​នេះ​ឲ្យ​មាន​បន្ត​ទៅ​មុខ។

«ពួក​យើង​ត្រូវ​ឈប់​ប្រយុទ្ធ​គ្នា​ ហើយ​ពួកយើង​ត្រូវ​ចាប់ផ្តើម​កសាង​ប្រទេស»។

ឈរ​ក្បែរ​ឆ្នេរ​សមុទ្រ​ មេឌីទែរ៉ាណេ​ (Mediterranean)​ លោក​ អាប៊ុល​ ខាដឺរ៍​ (Abdl​ Khadr)​ អាយុ​២៣​ឆ្នាំ​ ដែល​មាន​ស្ពាយ​កាំភ្លើង​លើ​ស្មា​ទទួល​ស្គាល់​ថា​ការ​ប្រយុទ្ធ​គ្នា​មិន​ទាន់​ចប់​សព្វ​គ្រប់​នៅ​ឡើយ​ទេ។​ ពួក​ឧទ្ទាម​ទន្ទ្រាំ​ជើង​ជាន់​ពីលើ​បដា​រូប​លោក​ហ្កាដាហ្វី​ដោយ​មោទនភាព​ ខណៈ​ពេល​ដែល​ប៉ុស្តិ៍​ត្រួត​ពិនិត្យ​ដែល​មើល​ទៅ​គ្មាន​របៀប​រៀបរយ​ភាគ​ច្រើន​នៅ​ជុំវិញ​រដ្ឋធានី​មិន​មាន​បុគ្គលិក​ធ្វើការ​នោះ។​ លោក​ អាប៊ុល​ ខាដឺរ៍​ (Abdl​ Khadr)​ គិត​ថា​វា​ស៊ី​ពេល​ ប្រហែល​មួយ​សប្តាហ៍​ទៀត​សម្រាប់​ការ​វាយ​ប្រយុទ្ធ​គ្នា​នេះ​ឲ្យ​បាន​ចប់​សព្វ​គ្រប់។​ ក្នុង​អំឡុង​ពេល​នេះ​ គាត់​គិត​ថា​កង​កម្លាំង​ប្រឆាំង​អាច​ចែក​កិច្ចការ​គ្នា​ធ្វើ​បាន។

«យើង​អាច​បង្កើត​ក្រុម​ខ្លះ​សម្រាប់​ប្រយុទ្ធ​ និង​ក្រុម​ខ្លះ​ទៀត​សម្រាប់​ការ​កសាង​ ប្រទេស។​ យើង​ត្រូវការ​ឲ្យ​ប្រទេស​លីប៊ី​ត្រឡប់​ទៅរក​ភាពដើម​វិញ​ឲ្យ​បាន​ឆាប់​ដូច​ដែល​យើង​អាច​ធ្វើ​ទៅ​បាន»។

ដោយ​ធ្លាប់​ធ្វើ​ជា​អ្នក​បច្ចេកទេស​កុំព្យូទ័រ​ គាត់​សង្ឈឹម​ថា​គាត់​អាច​ចូលរួម​ក្នុង​ក្រុម​ទាំង​ពីរ។​ លោក​ អាប៊ុល​ ខាដឺរ៍​ (Abdl​ Khadr)​ បាន​ឈប់​ធ្វើការ​ជា​មួយ​និង​ស្ថានីយ៍​ទូរទស្សន៍​រដ្ឋ​ដែល​ឥឡូវ​នេះ​លែង​មាន​ដំណើរការ​ទៅ​ហើយ​នោះ​ ហើយ​បាន​ទៅ​ចូលរួម​ជាមួយ​នឹង​គោល​គំនិត​របស់​ក្រុម​ប្រឆាំង​កាល​ពី​ ៣​ខែ​មុន។​ ប៉ុន្តែ​គាត់​និយាយ​ថា​ភាព​ស្មោះស្ម័គ្រ​របស់​គាត់​ជាមួយ​និង​ក្រុម​ប្រឆាំង​មាន​តាំងពី​ការ​ចាប់​ផ្តើម​មាន​ ការ​បះបោរ​ដំបូង​ម្ល៉េះ​កាល​ពី​ខែ​កុម្ភៈ។

«ពេល​ដែល​ខ្ញុំ​ធ្វើការ​ជាមួយ​រដ្ឋាភិបាល​ ខ្ញុំ​មើល​ឃើញ​ព្រឹត្តិការណ៍​ទាំងអស់។​ ខ្ញុំ​ដឹង​រឿង​ធ្វើ​បដិវត្តន៍​ ប៉ុន្តែ​រដ្ឋាភិបាល​មិន​ដឹង​ទេ»។

លោក​ អាប៊ុល​ ខាដឺរ៍​ (Abdl​ Khadr)​ ពន្យល់​ពី​មូលហេតុ​ដែល​គាត់​ពន្យា​ពេល​ក្នុងការ​ចូលរួម​ដោយ​ចំហរ​ជាមួយ​និង​ក្រុម​ប្រឆាំង។​ ឪពុក​របស់​គាត់​បាន​អំពាវនាវ​ឲ្យ​មាន​កំណែ​ទម្រង់​នៅ​ក្នុង​វេទិកា​តាម​ប្រព័ន្ធ​អ៊ីនធឺណែត​ ហើយ​រឿង​នេះ​បាន​ដឹង​ដល់​រដ្ឋាភិបាល។​ គាត់​និយាយ​ថា​ គាត់​និង​ឪពុក​របស់​គាត់​ត្រូវបាន​គេ​ចាប់​ឃុំ​ បន្ទាប់​ពី​ការ​តវ៉ា​បាន​ចាប់​ផ្តើម​ឡើង។​ គាត់​និយាយ​ថា​ គាត់​ទទួល​បាន​សារ​ព្រមាន​ពី​វរសេនីយឯក​ហ្កាដាហ្វី។

«ខ្ញុំ​មាន​ការ​ភ័យខ្លាច​ចំពោះ​គ្រួសារ​ និង​ឪពុក​របស់​ខ្ញុំ។​ ប្រហែល​ជា​គេ​សម្លាប់​គាត់​ ហើយ។​ អ្នក​ដឹង​ទេ​លោក​ ហ្កាដាហ្វី​ជា​មនុស្ស​ឆ្កួត។​ គាត់​សម្លាប់​គេ​គ្រប់​គ្នា​ដោយ​មិន​រុញរា»។

អារម្មណ៍​ខ្លាច​ស្លាប់​នេះ​បាន​ជួយ​លោក​វរសេនីយឯក​ ហ្កាដាហ្វី​ ឲ្យ​ដឹកនាំ​ប្រទេស​ លីប៊ី​ អស់​រយៈ​ពេល​ ៤២​ ឆ្នាំ​ ដែល​ជា​ការ​ដឹកនាំ​ផ្តាច់ការ​បំផុត​មួយ​ធ្វើ​ឡើង​តាម​ភាព​ចម្លែក​ខុស​គេ​របស់​បុរស​ម្នាក់​នេះ។​ ស្ថាប័ន​រដ្ឋាភិបាល​ដែល​ប្រជាពលរដ្ឋ​ធ្លាប់​ស្គាល់​មិនមាន​ទៀត​ទេ។​ ចំពោះ​សង្គម​ស៊ីវិល​ដ៏​ដូច​គ្នា​នេះ​ដែរ។​ ប៉ុន្តែ​ ក្តី​សង្ឈឹម​សម្រាប់​ប្រទេស​ លីប៊ី​ ថ្មី​របស់​លោក​ អាប៊ុល​ ខាដឺរ៍​ (Abdl​ Khadr)​ មាន​គុណ​ប្រយោជន៍​មួយ។

«អ្នក​ដឹង​ទេ​ អ្នក​ដែល​ប្រយុទ្ធ​នៅ​ក្នុង​ការ​បដិវត្តន៍​នេះ​គឺ​មិនមែន​ជា​អ្នក​ល្ងង់ខ្លៅ​នោះ​ទេ។​ ពួកគេ​ជា​អ្នក​មាន​ជំនាញ​ច្បាស់លាស់។​ យើង​មាន​តាំង​ពី​វេជ្ជបណ្ឌិត​ដែល​មាន​កាំភ្លើង​ និង​ចូលរួម​ប្រយុទ្ធ​ជាមួយ​ពួក​យើង។​ យើង​មាន​តាំងពី​វិស្វករ។​ អ្នក​គ្រប់​គ្នា​ដែល​ចូលរួម​ក្នុង​បដិវត្តន៍​នេះ​សុទ្ធតែ​ជា​អ្នក​ដែល​មាន​ជំនាញ​ទាំងអស់»។

សម្រាប់​លោក​ អាប៊ុល​ ខាដឺរ៍​ (Abdl​ Khadr)​ ប្រសិនបើ​អ្នក​ជំនាញ​ទាំងនេះ​អាច​ដាក់​អាវុធ​ចុះ​ និង​ចាប់​ផ្តើម​កសាង​ប្រទេស​កាន់តែ​ឆាប់​ពេល​ណា​ គឺ​កាន់តែ​ល្អ​ពេល​ហ្នឹង។​ សម្រាប់​រូប​លោក​ផ្ទាល់​ លោក​បាន​ត្រឡប់​ទៅ​ធ្វើការ​នៅ​ឯ​ស្ថានីយ៍​ទូរទស្សន៍​រដ្ឋ​ក្នុង​ សប្តាហ៍​នេះ​ហើយ​ ដើម្បី​ធានា​ថា​អង់តែន​សម្រាប់​ការ​ផ្សាយ​បន្ទាប់​ពី​របប​លោក​ ហ្កាដាហ្វី​ បាន​រលំ​នោះ​ មាន​ដំណើរការ​ស្រួលបួល៕

ប្រែសម្រួល​ដោយ​ ភី​ សុភាដា

XS
SM
MD
LG