មេដឹកនាំគណបក្សជំទាស់គឺលោក សម រង្ស៊ី និងលោក កឹម សុខា បានវិលត្រឡប់មកដល់កម្ពុជាវិញហើយកាលពីយប់ថ្ងៃអង្គារ គឺចំពេលដែលគណបក្សនេះ និងគណបក្សកាន់អំណាចមានភាពតានតឹងផ្នែកនយោបាយ។
មេដឹកនាំគណបក្សជំទាស់គឺលោក សម រង្ស៊ី បានមកដល់ប្រទេសកម្ពុជាហើយនៅយប់ថ្ងៃអង្គារនេះ ទោះជាលោករងការគំរាម ហើយមន្ត្រីគណបក្សរបស់លោករងការវាយប្រហារ និងចាប់ដាក់គុកក្តី។ លោក សម រង្ស៊ី និយាយថា លោកនឹងបន្តដោះស្រាយរឿងនយោបាយតាមរយៈវប្បធម៌សន្ទនាជាមួយនឹងគណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន។
«ខ្ញុំជឿជាក់ថា អត់មានជម្រើសអ្វីក្រៅពីការជជែកគ្នាទេ។ ការជជែកគ្នានេះនឹងធ្វើឲ្យស្ថានភាពត្រជាក់។ យើងកសាងវប្បធម៌សន្ទនានេះដើម្បីសុខសន្តិភាពរយៈពេលយូរអង្វែង»។
ក្រុមអ្នកគាំទ្រប្រមាណ១០០០នាក់បានទៅទទួលស្វាគមន៍មេដឹកនាំគណបក្សជំទាស់គឺលោក សម រង្ស៊ី និងលោក កឹម សុខា នៅព្រលានយន្តហោះអន្តរជាតិភ្នំពេញ។
អ្នកគាំទ្រគណបក្សសង្គ្រោះជាតិម្នាក់បានថ្លែងថា៖
«កុំឲ្យបោះបង់ចោលវប្បធម៌សន្ទនា ត្រូវយកវាមកនិយាយ បើអាចធ្វើបាន»។
អ្នកគាំទ្រម្នាក់ទៀតនិយាយថា៖
«ពេលស្ថានភាពនយោបាយកំពុងតែឡើងកំដៅ ជារឿយៗ គាត់តែងមានដំណោះស្រាយជានិច្ច បែបប្រជាធិបតេយ្យ អហិង្សា»។
លោក សម រង្ស៊ី បានថ្លែងថា គណបក្សរបស់លោកមានសាមគ្គីភាពរឹងមាំ ហើយថា បញ្ហានយោបាយចុងក្រោយ ដែលកើតឡើងនោះ គណបក្សរបស់លោកនឹងត្រូវពិភាក្សាជាមួយនឹងគណបក្សប្រជាជនកម្ពុជា។
គណបក្សជំទាស់នេះបានប្រឈមបញ្ហាជាច្រើន ដូចជាការដកលោក កឹម សុខា ពីតំណែងអនុប្រធានទី១រដ្ឋសភា ការវាយដំតំណាងរាស្ត្រពីររូបគឺលោក ញ៉យ ចំរើន និងលោក គង់ សភា ការគំរាមថា លោក សម រង្ស៉ី អាចជាប់គុកទាក់ទងនឹងបញ្ហាបង្ហោះឯកសារព្រំដែនលើទំព័រ Facebook។
ក្រៅពីចាត់ទុកថា ការដកលោក កឹម សុខា ពីមុខតំណែងអនុប្រធានទី១នៃរដ្ឋសភាគឺជាការរំលោភច្បាប់នោះ លោក សម រង្ស៊ី អំពាវនាវឲ្យមានការស៊ើបអង្កេតឲ្យបានត្រឹមត្រូវរកជនដៃដល់ និងអ្នកពាក់ព័ន្ធដែលបានបង្កការវាយដំធ្វើឲ្យតំណាងរាស្ត្ររងរបួស ហើយនឹងអំពាវនាវឲ្យដោះលែងសកម្មជន និងសមាជិកព្រឹទ្ធសភាគឺលោក ហុង សុខហួរ ដែលរងការចោទប្រកាន់រឿងព្រំដែនជាដើម៕
