ប្រទេសបេឡារុសបាននិយាយនៅថ្ងៃអង្គារនេះថាសម្ពាធនយោបាយនិងសេដ្ឋកិច្ចពីសហរដ្ឋអាមេរិក ចក្រភពអង់គ្លេស អង្គការអូតង់និងសហភាពអឺរ៉ុបបណ្តាលឱ្យខ្លួនសម្រេចចិត្តទទួលដាក់អាវុធនុយក្លេអ៊ែររុស្ស៊ីលើដែនដីខ្លួន។
ក្រសួងការបរទេសបេឡារុសបាននិយាយនៅក្នុងសេចក្តីថ្លែងការណ៍មួយថា៖«ដោយសារស្ថានភាពក្នុងកាលៈទេសៈនេះនិងកង្វល់ត្រឹមត្រូវតាមច្បាប់ ព្រមទាំងការប្រថុយប្រថានខាងសន្តិសុខជាតិកើតមានឡើងដោយសារបញ្ហាទាំងនេះ ប្រទេសបេឡារុសត្រូវបានបង្ខំឱ្យឆ្លើយតបដោយពង្រឹងសន្តិសុខនិងសមត្ថភាពការពាររបស់ផងខ្លួនផ្ទាល់»។
បេឡារុសបាននិយាយថែមទៀតថាផែនការរបស់រុស្ស៊ីក្នុងការដាក់អាវុធនុយក្លេអ៊ែរកលយុទ្ធក្នុងប្រទេសបេឡារុសមិនប្រឆាំងនឹងកិច្ចព្រមព្រៀងមិនរីកសាយអាវុធនុយក្លេអ៊ែរអន្តរជាតិទេ ហើយថារដ្ឋាភិបាលបេឡារុសមិនគ្រប់គ្រងអាវុធទាំងនេះទេ។
លោក Putin បានប្រកាសកាលពីថ្ងៃសៅរ៍អំពីការដាក់អាវុធនុយក្លេអ៊ែរកលយុទ្ធ ដោយនិយាយថាការធ្វើដូច្នេះជាការធ្វើត្រូវដោយសារកំណើនការគាំទ្រយោធារបស់ពួកប្រទេសលោកខាងលិចដល់កងកម្លាំងអ៊ុយក្រែន មានរួមសេចក្តីសម្រេចរបស់អង់គ្លេសកាលពីសប្តាហ៍មុនថានឹងបញ្ជូនគ្រាប់កាំភ្លើងមានសារធាតុកាកអ៊ុយរ៉ានីញ៉ូមអាចបាញ់ទម្លុះរថពាសដែកបានទៅឱ្យអ៊ុយក្រែន។
ប្រធានាធិបតីអ៊ុយក្រែនលោក Volodymyr Zelenskyy មានកំណត់នឹងថ្លែងសុន្ទរកថាក្នុងការប្រជុំមួយតាមវីដេអូនៅថ្ងៃអង្គារនេះ ដែលចាត់ចែងដោយស.រ.អ.ដើម្បីពិភាក្សាអំពីអ្វីដែលលោកយល់ថាជាមាគ៌ាទៅកាន់សន្តិភាពឋិតថេរមួយ។
ក្រសួងការបរទេសស.រ.អ.បាននិយាយថាលោករដ្ឋមន្ត្រីការបរទេស Antony Blinken នឹងរៀបចំការប្រជុំនេះដោយមានពួករដ្ឋមន្ត្រីការបរទេសមកពីប្រទេសជាតិនានាចូលរួម ដើម្បីផ្តល់ទស្សនៈវិស័យរបស់ពួកគេអំពីអ្វីដែលជាការចាំបាច់ដើម្បីបញ្ឈប់សង្គ្រាមដែលរុស្ស៊ីបានធ្វើកាលពីជាងមួយឆ្នាំមុននេះ។
ការប្រជុំនៅថ្ងៃអង្គារនេះមានធ្វើមុនសន្និសីទកំពូលអំពីលទ្ធិប្រជាធិបតេយ្យដែលប្រទេសអ៊ុយក្រែនក៏នឹងចូលរួមដែរ៕
ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មានAP, AFP និងReuters។
