ភ្ជាប់​ទៅ​គេហទំព័រ​ទាក់ទង

ប្រទេស​លាវ​ប្រឈម​មុខ​នឹង​ប្រទេស​ជិតខាង​ក្នុង​ជម្លោះ​ទំនប់ទឹក​នៅ​ទន្លេ​មេគង្គ​

  • Daniel Schearf

ខ្មែរ​អ្នក​នេសាទ​ត្រីម្នាក់​ដែល​រស់​នៅ​តាម​ដង​ទន្លេ​មេគង្គ​បោះ​សំណាញ់​​នៅ​ជាយ​រាជធានី​ភ្នំពេញ​ ថ្ងៃ​ទី​១៩​ ខែមេសា​ ឆ្នាំ​២០១១។​ផែនការ​របស់​ប្រទេស​លាវ​ដើម្បី​សង់​ទំនប់​ទឹក​នៅ​ផ្នែក​ខាង​ក្រោម​ទន្លេ​នេះ​ធ្វើ​ឲ្យ​លាវ​ ប្រឈម​មុខ​ទល់​​នឹង​ប្រទេស​ជិត​ខាង​របស់​ខ្

ក្រុម​ប្រទេស​ស្ថិតនៅ​តាម​ទន្លេ​មេគង្គ​ មិន​បាន​ព្រមព្រៀង​ជា​មួយ​ប្រទេស​លាវ​ អំពី​សេចក្ដី​ស្នើ​របស់​ប្រទេស​នេះ​ ចង់​សាង​សង់​ទំនប់​ទឹកវារីអគ្គីសនី​ នៅ​លើ​ខ្សែ​ទឹកធំ​នៅ​ផ្នែក​ខាង​ក្រោម​នៃ​ទន្លេ​ទេ។ ​ប្រទេស​លាវ​ឲ្យ​ដឹង​ថា​ ទំនប់​ទឹក​នេះ​ នឹង​មិន​ធ្វើ​ឲ្យមាន​បញ្ហា​ធ្ងន់​ធ្ងរទេ​ ចំណែក​ឯ​ប្រទេស​ជិត​ខាងរបស់​ខ្លួន​វិញ​ឲ្យ​ដឹង​ថា​ ខ្លួន​ត្រូវ​ការ​ព័ត៌មាន​បន្ថែម​ទៀតអំពី​ផល​ប៉ះ​ទង្គិចផ្នែក​បរិស្ថាន​ហើយនឹង​សេដ្ឋកិច្ច​នៃ​ទំនប់​ទឹក​នេះ។

ប្រតិភូ​មក​ពី​ប្រទេស​កម្ពុជា​ លាវ​ ថៃ​ និង​វៀតណាម​ នៅ​ថ្ងៃ​អង្គារ បាន​ពន្យារ​ពេល​ធ្វើ​សេចក្ដី​សម្រេចអំពី​ផែនការ​របស់​ប្រទេស​លាវ​សាងសង់​ ទំនប់​ទឹកវារី​អគ្គីសនី​នៅ​តាម​ ផ្នែក​ខាង​ក្រោម​នៃ ទន្លេ មេគង្គ។

នៅ​ឯ​កិច្ច​ប្រជុំ​របស់​គណ:កម្មការ​ទន្លេមេគង្គ​នៅ​ក្នុង​រដ្ឋធានី​វៀងច័ន្ទ​នៃ​ប្រទេស​លាវ​ ប្រទេស​លាវ​ទទូច​ថា​ ទំនប់ទឹក​សាយ៉ាប៊ូរី​ នឹង​ត្រូវ​សាង​សង់​ឡើង​ ដោយ​បាន​ឲ្យ​ដឹង​ថា​ ទំនប់ទឹកនេះ​នឹង​ស្រប​ទៅ​តាម​បទ​ដ្ឋាន​អន្ដរជាតិ។

ប្រតិភូ​លាវ​និយាយ​ថា​ទំនប់​ទឹក​នេះ​ទំនង​ដូច​ជា​នឹង​មិន​មាន​ផល​ប៉ះ​ទង្គិច​ទៅ​លើ​បរិស្ថាន​របស់​ប្រទេស​ជិត​ខាង​របស់​ខ្លួន​ទេ។

ក៏​ប៉ុន្ដែ​លោក​តែ​ណាវុទ្ធ​ ប្រធាន​គណ:កម្មាធិការរួម​របស់គណ:កម្មការ​ទន្លេមេគង្គនិយាយ​ថា​ ប្រទេស​កម្ពុជា​ ថៃ​ និង​វៀតណាម​មាន​ការ​សង្ស័យ​មិន​ជឿ​អំពីការ​អះអាង​ថា​គ្មាន​ផល​ប៉ះ​ទង្គិច​នោះ។

«ប្រទេស​ទាំង​បី​ចង់​បាន​ព័ត៌មាន​ថែម​ទៀត​ នៅ​ពេល​ដែល​ប្រទេស​លាវ…ប្រទេស​លាវ​មាន​បំណង​ចង់​ឲ្យ​ដំណើរការនោះ​ចប់​សព្វ​គ្រប់​ទៅក្នុងរយ:​ពេល​៦​ខែ»។

ប្រទេស​កម្ពុជា​ ថៃ​ និង​វៀតណាម​ចង់​បាន​ការ​វាយ​តម្លៃ​យ៉ាង​លម្អិតនូវ​ ផល​ប៉ះ​ទង្គិច​ទៅ​លើ​បរិស្ថាន​ឆ្លង​កាត់​ព្រំ​ប្រទល់។

ប្រទេស​ទាំង​បួន​ព្រម​ព្រៀង​គ្នា​ធ្វើ​កិច្ច​ប្រជុំ​លំដាប់​ថ្នាក់​រដ្ឋមន្ដ្រី​ ក្រោយ​មក​ទៀត​នៅ​ឆ្នាំ​នេះ​ ដើម្បី​ឲ្យ​បាន​សម្រេច​កិច្ចព្រម​ព្រៀងមួយ។​ នៅ​ក្នុង​ក្រប​ខ័ណ្ឌគណ:កម្មការ​នេះ​ ប្រទេស​ទាំង​បួន​នៅ​ជិតខាង​គ្នា​នេះ​ សួរ​យោបល់​គ្នា​អំពី​គម្រោង​នោះ​សម្រាប់​ទំនប់​ទឹក​នៅ​តាម​ដង​ទន្លេ​មេគង្គ​ ក៏​ប៉ុន្ដែ​មិន​ត្រូវ​ការ​ការ​អនុញ្ញាត​ទៅ​វិញ​ទៅ​មក​ទេ។

ប្រទេស​វៀតណាម​រិះ​គន់​ខ្លាំង​ជាង​គេ​អំពី​គម្រោង​នោះ​ ហើយ​ស្នើ​យោបល់​ថា​ គួរ​បញ្ឈប់​ផែនការ​ទាំង​អស់​សម្រាប់​ទំនប់​ទឹក​នោះ​នៅ​តាម​ខ្សែ​ទឹក​ធំ​នៃ​ទន្លេ​មេគង្គ​ សម្រាប់​រយ: ពេល​យ៉ាង​តិច​ដប់​ឆ្នាំ។

ប្រទេស​កម្ពុជា​ហើយនឹង​ប្រទេស​វៀតណាម​ ព្រួយ​បារម្ភ​ថា​ទំនប់​ទឹក​នេះ​ ដែល​ជាទំនប់​ទឹក​មួយ​ពី​បណ្ដា​ទំនប់​ទឹក​១១​ដែល​គេ​គ្រោង​សង់​នៅ​ទន្លេ​មេគង្គ​ អាច​មាន​ផល​ប៉ះពាល់​ទៅលើចំនួន​ត្រី​ ហើយនឹង​ផលិតកម្ម​ស្រូវ។​ ការ​សិក្សា​មួយ​របស់​គណ:​កម្មការ​នោះ​សន្និដ្ឋាន​ថា​ទំនប់​ទឹក​នេះ​ នឹង​មាន​ផល​ប៉ះ​ទង្គិច​ទៅ​លើ​ចរាចរណ៍របស់​ត្រី​ ហើយ​អាច​ជំរុញ​ឲ្យ​ប្រភេទ​សត្វ​ដែល​ជិត​ផុត​ពូជ​ ដូច​ជា​ត្រី​រាជ​នៅ​ទន្លេ​មេគង្គទៅ​ជា​ផុត​ពូជអស់​រលីង។

ប្រទេស​ថៃ​លើក​ឡើង​នូវ​ការ​ព្រួយ​បារម្ភ​របស់​ខ្លួន​អំពី​និរន្ដរភាព​នៃ​គម្រោង​ តម្លៃ​៣ពាន់​៥០០​លាន​ដុល្លារ​នេះ។

គម្រោង​នេះ​ត្រូវ​គេ​រំពឹង​ថា​នឹង​ផ្ដល់​ភ្លើង​អគ្គីសនី​មាន​កម្លាំង​១.២៦០​មេហ្កា​វ៉ាត់ ដែល៩៥%គេ​អាច​លក់​ទៅ​ឲ្យ​ប្រទេស​ថៃ។

ក៏​ប៉ុន្ដែ​របាយការណ៍​មួយ​របស់​គណ:កម្មការ​នេះ​ឲ្យ​ដឹង​ថា​ ទំនប់ទឹក​នេះ​អាច​ខាត​បង់​សមត្ថភាព​ប្រតិបត្ដិការ​របស់​ខ្លួន​រហូត​ដល់​ទៅ​៦០% ក្នុង​រយ:​ពេល​៣០​ឆ្នាំ​ ដោយ​សារ​កករ​ដែល​នៅ​កក​ជាប់​នៅ​ក្នុង​អាង​ទឹក។

មនុស្ស​ប្រមាណ​៦០​លាន​នាក់​ពឹង​ពាក់​ទៅ​លើ​ទន្លេ​មេគង្គ​សម្រាប់​ជីវភាព​រស់​នៅ​របស់​ពួក​គេ។

ប្រទេស​លាវ​ដែល​ជា​ប្រទេស​ក្រីក្រ​មួយ​ ជា​រដ្ឋមួយ​ឥត​មាន​ជាប់​នឹង​សមុទ្រ​នោះ​ហើយ​ត្រូវ​គ្រប់​គ្រង​ដោយ​គណបក្ស​កុម្មុយនិស្ដ​ ឲ្យ​ដឹង​ថា​ទំនប់​ទឹក​នេះ​ជា​ការ​ចាំបាច់​ដើម្បី​ឲ្យ​មាន​ប្រាក់​ចំណូល។

ទំនប់​ទឹក​ដែល​ត្រូវ​បាន​សាង​សង់​នៅ​តាម​ទន្លេ​មេទឹកនៃ​ទន្លេ​មេគង្គ​រហូត​មក​ទល់​ពេល​នេះ​ ស្ថិត​នៅ​ផ្នែក​ខាង​លើ​នៃ​ទន្លេ​នេះ​នៅ​ក្នុង​ប្រទេស​ចិន​ ដែល​នៅ​ក្នុង​ប្រទេសនេះ​ ទន្លេ​នេះ​គេ​ស្គាល់​ហៅ​ថា​ទន្លេ​ (Lancang) ឡាញ់ថ្សាំង។

រដ្ឋាភិបាល​ទីក្រុង​ប៉េកាំងសាងសង់​ទំនប់ទឹក​៤​ ដោយ​មិន​បាន​សួរ​យោបល់​ប្រទេស​ជិត​ខាង​ទេ​ ហើយ​មាន​ផែនការសាងសង់​ទំនប់ទឹក​៤​ថែម​ទៀត​នៅ​ក្នុង​រយ:ពេល​ដប់​ឆ្នាំ​ខាង​មុខ​នេះ។

ភាព​ទាល់​ច្រក​នេះ​កើត​មាន​ឡើង​ក្រោយ​ពី​សេចក្ដីរាយការណ៍នៅ​ក្នុង​សប្ដាហ៍​នេះ​ថា​ប្រទេស​លាវ​ចាប់​ផ្ដើម​សាងសង់​ផ្លូវ​ថ្នល់​កាល​ពី​ឆ្នាំ​ទៅ​សម្រាប់​គម្រោង​នេះ ។

លោក​តែ​ណាវុទ្ធ​មាន​ប្រសាសន៍​ថា​ គណ:កម្មការ​នេះ​បាន​សុំ​ឲ្យ​មាន​ការ​បំភ្លឺ​ពី​ប្រទេស​លាវ៕

ប្រែ​សម្រួល​ដោយ​ កងស៊ីវន

XS
SM
MD
LG