នៅខែនេះ ប្រទេសកូរ៉េខាងត្បូងនិងប្រទេសផ្សេងៗទៀតក្នុងពិភពលោក នឹងប្រារព្ធខួបលើកទី៦០នៃការចាប់ផ្តើមសង្គ្រាមកូរ៉េ។ ប្រទេសភាគច្រើនក្នុងពិភពលោកយល់ស្របគ្នាថា តើសង្គ្រាមចាប់ផ្តើមនៅពេលណា ហើយនរណាជាអ្នកចាប់ផ្តើមសង្គ្រាមនោះ។ ក៏ប៉ុន្តែកូរ៉េខាងជើងមានការបកស្រាយរឿងនោះដោយខ្លួនឯងផ្ទាល់ ដែលខុសពីអ្នកដទៃ។
គឺនៅថ្ងៃទី ២៥ ខែមិថុនា ឆ្នាំ១៩៥០ ដែលកងពលវាយលុករបស់កូរ៉េខាងជើង បានឆ្លងកាត់ខ្សែស្របទី ៣៨ ដែលបែងចែកឧបទ្វីបកូរ៉េ។ ពួកគេចាប់យកបានរដ្ឋធានីសេអ៊ូលក្នុងរយៈពេលតែប៉ុន្មានថ្ងៃប៉ុណ្ណោះ។
ប្រទេសកូរ៉េខាងត្បូង រួមជាមួយប្រទេសជាតិផ្សេងៗទៀតស្ទើរតែទាំងអស់នៅលើផែនដី ទទួលស្គាល់ថា ការវាយប្រហារនេះជាការចាប់ផ្តើមសង្គ្រាមកូរ៉េ ដែលមានរយៈពេល ៣ ឆ្នាំ។ ក៏ប៉ុន្តែ រដ្ឋាភិបាលទីក្រុងព្យូងយ៉ាងមើលឃើញសង្គ្រាមកូរ៉េផ្សេងពីនេះ។
លោក Yang Moo-jin នៅសកលវិទ្យាល័យនៃការសិក្សារអំពីកិច្ចការកូរ៉េខាងជើង នៅរដ្ឋធានីសេអ៊ូល មានប្រសាសន៍ថា កូរ៉េខាងជើងហៅសង្គ្រាមនេះថាជា ‘សង្គ្រាមរំដោះមាតុភូមិ ’។ លោកមានប្រសាសន៍បន្តទៀតថា កូរ៉េខាងជើងបង្រៀនប្រជាពលរដ្ឋរបស់ខ្លួនថា កូរ៉េខាងត្បូងនិងសហរដ្ឋអាមេរិក បានវាយប្រហារប្រទេសកូរ៉េខាងជើងជាមុន។ កូរ៉េខាងជើងនិយាយថា ខ្លួនត្រូវតែធ្វើការឆ្លើយតបដើម្បីរំដោះប្រទេសជាតិ។
បណ្តាញផ្សាយព៌តមានកូរ៉េខាងជើង បានប្រៀបធៀបទាហានសហរដ្ឋអាមេរិកទៅនិងខ្មោចបីសាចអស់រយៈពេលរាប់ទសវត្សរ៍ ថាជាពួកអ្នកឈ្លានពាន។ ក៏ប៉ុន្តែ លោក Brian Myers អ្នកសិក្សាស្រាវជ្រាវជាន់ខ្ពស់អំពីការឃោសនារបស់ប្រទេសកូរ៉េខាងជើងនៅសកលវិទ្យាល័យ Dongseo របស់កូរ៉េខាងត្បូងនិយាយថា កាលពីដំបូងកូរ៉េខាងជើងមិនបានស្តីបន្ទោសប្រទេសអាមេរិកចំពោះការចាប់ផ្តើមសង្គ្រាមនេះទេ។
“គេពិតជាមិនបានធ្វើទេ រហូតទាល់តែដល់ក្រោយសង្គ្រាមកូរ៉េ រហូតទាល់តែគេទុកប្រជាពលរដ្ឋកូរ៉េខាងជើងឲ្យនៅក្រតោកយ៉ាក ដូចដែលពួកគេបានចាប់ផ្តើមកាលពីមុនសង្គ្រាម ទើបពួកគេបានចាប់ផ្តើមប្រឌិតប្រវត្តិសាស្រ្តឡើងវិញ”។
អស់មួយរយៈពេល ពួកអ្នកប្រវត្តិសាស្រ្តខ្លះបានគាំទ្រការអះអាងរបស់កូរ៉េខាងជើងដែលថា ខ្លួនគ្រាន់តែការពារខ្លួនឯងប៉ុណ្ណោះ។ លោក Myers មានប្រសាសន៍ថា ស្ថានការណ៍នេះមានការផ្លាស់ប្តូរយ៉ាងខ្លាំង នៅពេលដែលរនាំងវាំងននដែកបានរលំដួល។
“លទ្ធិសើរើនិយមបានត្រូវគេទាត់ចោលជាទួទៅ ចាប់តាំងពីដើមទសវត្សរ៍១៩៩០មក នៅពេលដែលលោក Boris Yeltsin ដែល នៅពេលនោះ ជាមេដឹកនាំរបស់សហភាពសូវៀតនិងប្រទេសរុស្ស៊ី បានបើកប័ណ្ណសារចាស់ៗរបស់សូវៀតឱ្យប្រទេសលោកខាងលិចនិងកូរ៉េខាងត្បូងអាចពិនិត្យមើល។ គឺនៅទីនោះហើយ ដែលពួកយើងបានឃើញយ៉ាងច្បាស់ថា ប្រទេសកូរ៉េខាងជើងនិងពួកសូវៀតពិតជាបានរៀបចំផែនការរួមគ្នា ដើម្បីធ្វើការវាយប្រហារនៅថ្ងៃទី ២៥ ខែមិថុនា" ។
កូរ៉េខាងជើងក៏មិនដែលបានចែកចាយពត៌មានលំអិតជាមួយប្រជាពលរដ្ឋរបស់ខ្លួន អំពីយុទ្ធសន្តិភាព ដែលរដ្ឋាភិបាលក្រុងព្យូងយ៉ាង បានចុះហត្ថលេខាដើម្បីបញ្ឈប់សង្គ្រាមកូរ៉េនោះដែរ។ ជាជំនួសទៅវិញ កូរ៉េខាងជើងបានព៌ណនាអំពីការបញ្ឈប់ការវាយប្រយុទ្ធគ្នាក្នុងឆ្នាំ ១៩៥៣ ថាជាជ័យជំនះដ៏មហស្ចារ្យសម្រាប់កងទ័ពរបស់ខ្លួនលើសហរដ្ឋអាមេរិក និងប្រទេសកូរ៉េខាងត្បូង៕
ប្រែសម្រួលដោយ ជឹង ប៉ូជីន
