ក្រោយការចាកចេញពីពន្ធនាគារកាលខែមិនា ឆ្នាំ២០១៦នេះ សកម្មជនការពារបរិស្ថានតំបន់អារ៉ែង នៅខេត្ត កោះកុង បានមកបង្ហាញខ្លួននៅសាលាឧទ្ធរណ៍ក្នុងរាជធានីភ្នំពេញនាថ្ងៃសុក្រនេះ តាមបណ្តឹងប្តឹងទាស់ប្រឆាំងការកាត់ទោសរូបលោកក្នុងសំណុំរឿងព្រៃឈើ ដែលធ្វើឡើងដោយតុលាការខេត្តកោះកុង។ មន្ត្រីសិទ្ធិមនុស្សប្រចាំខេត្តកោះកុងនិយាយថា សាលាឧទ្ធរណ៍នឹងពិចារណាផ្តល់យុត្តិធម៌ ដល់សកម្មជនបរិស្ថានរូបនេះ។
សាលាឧទ្ធរណ៍ នាព្រឹកថ្ងៃសុក្រនេះ បានបើកការជំនុំជម្រះ បណ្តឹងទាស់របស់លោក វ៉ែន វ៉ន ប្រឆាំងនឹងការសម្រេចដោយតុលាការខេត្តកោះកុង ដែលបានកាត់ទោសឲ្យលោក ជាប់ពន្ធនាគាររយៈពេលមួយឆ្នាំកាលពីខែមិនាកន្លងទៅ ក្នុងសំណុំរឿងព្រៃឈើតែទោសនេះត្រូវព្យួរ គឺមិនអនុវត្ត។
លោក វ៉ែន វ៉ន ជាជនជាតិដើមភាគតិចជង និងជាសកម្មជនបរិស្ថានតំបន់អារ៉ែងក្នុងខេត្តកោះកុង បានមកបង្ហាញខ្លួននៅសាលាឧទ្ធរណ៍ នៅម៉ោងប្រមាណជាង៨ព្រឹករង់ចាំការបើកសវនាការ។ បន្ទាប់ពីការសួរដេញដោលអស់រយៈពេល ជាង ៣០នាទី ដោយក្រុមប្រឹក្សាអង្គជំនុំជម្រះដែលមានអ្នកស្រី កឹម ដានី ជាប្រធាន លោក វ៉ែន វ៉ន ត្រូវបាន សាលាឧទ្ធរណ៍ប្រាប់ឲ្យមកស្តាប់ការប្រកាសសាលក្រម នៅថ្ងៃ ទី ២១ ខែ កញ្ញា។
ក្នុងពេលកំពុងរង់ចាំ ការបើកសវនាការដោយសាលាឧទ្ធរណ៍នោះ លោក វ៉ែន វ៉ន ប្រាប់ VOA ថាលោកមិនបានប្រព្រឹត្តបទល្មើស ដូចដែលតុលាការខេត្តកោះកុង ចោទប្រកាន់មកលើរូបលោកនោះ ទេ។
«បាទហ្នឹងហើយ ព្រោះរយៈកាលកន្លងមក ខ្ញុំអត់បានធ្វើដូចតាមការចោទប្រកាន់ហ្នឹងទេ ព្រោះអ្វីដែលយើងបានហ្នឹង គឺយើងទិញគេ មិនបានកាប់បំផ្លាញនោះទេបាទ»។
លោក វ៉ែន វ៉ន ដែលជាសមាជិកក្រុមប្រឹក្សាឃុំមកពីគណបក្សប្រជាជនកម្ពុជា ក្នុងឃុំ ជំនាប់ ស្រុកថ្មបាំង ខេត្តកោះកុង បន្ថែមថា លោកមិនទាន់អាចនិយាយបានថា សាលាទ្ធរណ៍សម្រេចយ៉ាងណានោះឡើយ។ ប៉ុន្តែលោកថា លោកនឹងប្តឹងទៅតុលាការកំពូលបន្តទៀត ប្រសិនបើសាលាឧទ្ធរណ៍ មិនអាចទម្លាក់ចោលការទោស មកលើរូបលោកនោះ។
VOA មិនទាន់អាចទាក់ទងលោក ទូច ថាវរិទ្ធ អ្នកនាំពាក្យតុលាការឧទ្ធរណ៍បានទេ នារសៀល ថ្ងៃសុក្រនេះ ដោយទូរស័ព្ទលោករោទិ៍តែគ្មានអ្នកទទួល។
នៅមុនការកាត់ទោសលោក វ៉ែន វ៉ន កាលពីខែមិនា តុលាការខេត្តកោះកុង នាខែកុម្ភៈ បានបើកសវនាការជំនុំជម្រះសំណុំរឿងលោកវ៉ែន វ៉ន ក្រោមបទចោទ ប្រមូលផល អនុផលព្រៃឈើ ដោយគ្មានលិខិតអនុញ្ញាត និងពីបទលុបបំបាត់ភស្តុតាង។
ការកាត់ទោសនៅខែមិនានោះបានលុបចោលបទចោទដែលថាលោក វ៉ែន វ៉ន បានលុបបំបាត់ភស្តុតាង។ ការកាត់ទោសដដែលនេះ បានធ្វើឡើងក្រោយ ពីតុលាការខេត្តកោះកុង សម្រេចឃុំខ្លួនលោក កាលពីដើមខែតុលា ឆ្នាំ២០១៥ ដោយចោទថា លោកបានប្រព្រឹត្តបទល្មើសទាំងនោះ កាលពីថ្ងៃទី ៨ ខែមករា ឆ្នាំ២០១៥។
លោក អ៊ិន គង់ជិតមន្ត្រីសិទិ្ធមនុស្សអង្គការការពារសិទ្ធិមនុស្សលីកាដូ (Licadho) ប្រាប់ VOA ថា សាលាឧទ្ធរណ៍ត្រូវវិនិច្ឆ័យក្តីនេះឲ្យបានត្រឹមត្រូវមួយ ដោយសារលោក វ៉ែន វ៉ន គឺជាអ្នកអភិរក្សបរិស្ថានពិតប្រាកដ មិនមែនជាអ្នកបំផ្លិចបំផ្លាញបរិស្ថាននោះឡើយ។
«បាទនេះ រឿងនេះយើង វាយើងពិបាកនឹងសង្ឃឹមទៅលើសាលាឧទ្ធរណ៍ណាស់ ប៉ុន្តែទោះបីយ៉ាងណា ក៏យើងមានការសង្ឃឹម ទៅលើការពិចារណារបស់ ចៅក្រមសាលាឧទ្ធរណ៍ ដែលអាចនឹងផ្តល់ភាពយុត្តិធម៌ ដល់លោក វ៉ែន វ៉ន នៅពេលខាងមុខបាទ»។
លោក វ៉ែន វ៉ន រងការយាយីតាមផ្លូវច្បាប់ពីអាជ្ញាធរស្រុកថ្មបាំង និងមន្ត្រីរដ្ឋបាលព្រៃឈើមួយចំនួនក្នុងខេត្តកោះកុង ដោយសារលោកមានភាពសកម្មក្នុងការការពារផលប្រយោជន៍សហគមន៍ជនជាតិ ដើមភាគតិច ជង និងការចូលរួមការពារបរិស្ថានតំបន់អារ៉ែង ជាមួយ ស្ថាបនិក និងជានាយកអង្គការ«មាតាធម្មជាតិ» លោកAlejandro Gonzalez-Davdison ដែល ត្រូវបានអាជ្ញាធរកម្ពុជាបណ្តេញចេញពីប្រទេសកម្ពុជាកាលពីខែកុម្ភៈឆ្នាំ២០១៥ ដោយសារស្នាក់នៅហួសទិដ្ឋាការ។ នេះបើយោងតាមបញ្ជាក់ពីលោក អ៊ិន គង់ជិត អ្នកសម្របសម្រួលសិទ្ធិមនុស្សនៃអង្គការការពារសិទ្ធិមនុស្សលីកាដូប្រចាំខេត្តកោះកុង៕
