ភ្ជាប់​ទៅ​គេហទំព័រ​ទាក់ទង

យល់​ដឹង​អំពី​ជំហាន​ដំបូង​ក្នុង​ការ​ទប់ស្កាត់​ការ​ឆ្លង​មេរោគ​អេដស៍

  • Carol Preason

(រូបភាព​ឯកសារ) Reggie Batiste នាយក​គ្រប់គ្រង​កម្មវិធី​នៃមូល​និធិ​ថែទាំ​សុខភាព​ជំងឺអេដស៍​ ផ្តល់​សេវា​ធ្វើតេស្ត​ឈាម​រកមេរោគ​អេដស៍ក្នុង​ទិវាជាតិ​ធ្វើតេស្ត​ឈាមរក​មេរោគ​អេដស៍។ ថ្ងៃ​ទី២៧ ខែ​មិថុនា ឆ្នាំ​២០១៣​ ក្នុង​ទីក្រុង Atlanta រដ្ឋ​ Georgia ស.រ.អា.​។

សន្និសីទ​អន្តរជាតិ​ស្តី​អំពី​ជំងឺ​អេដស៍​ នឹង​ត្រូវ​ធ្វើ​ឡើង​ក្នុង​ខែ​នេះ​ (ពី​ថ្ងៃ​ទី​១៨​ ដល់​ថ្ងៃ​ទី​២២​ ខែ​កក្កដា) នៅ​ទីក្រុង​ Durban ប្រទេស​អាហ្រ្វិក​ខាង​ត្បូង។​ សមិទ្ធផល​ធំ​បំផុត​ក្នុង​ការ​ប្រយុទ្ធ​ប្រឆាំង​នឹងជំងឺ​អេដស៍​/មេរោគ​អេដស៍ នោះ​ប្រហែល​គឺ​ ថា​ជំងឺ​នេះ​លែង​ជា​​ទោស​​ប្រហារ​ជីវិត​ទៀត​ហើយ។​ ផ្ទុយ​ទៅ​វិញ​ ជំងឺ​អេដស៍​ អាច​ជា​ជំងឺ​រ៉ាំ​រ៉ៃ​ដែល​អាច​គ្រប់គ្រង​បាន​ ប្រសិនបើ​ប្រជាជន​ទទួល​ការ​ព្យាបាល​តាម​តម្រូវការ​​​ចាំបាច់។​ Carol Pearsonនៃ​​ VOAជូន​សេចក្តី​រាយការណ៍​លម្អិត។

ប្រជាជន​ដែល​ធ្វើ​តេស្ត​ឈាម​រក​មេរោគ​អេដស៍​ គឺ​មាន​មូលហេតុ​មួយ​ចំនួន។​ ការធ្វើ​តេស្ត​ឈាម​រក​មេរោគ​អេដស៍ ​គឺ​ជា​ការ​ការធ្វើ​តេស្ត​សាមញ្ញ​មួយ​ ហើយ​អ្នកមក​ធ្វើតេស្ត​អាច​ដឹង​ពី​លទ្ធផល​របស់​ខ្លួន​ ក្នុង​រយៈពេល​ត្រឹម​តែ​ប្រាំ​នាទី​ប៉ុណ្ណោះ។​ បុរស​ម្នាក់​ដែល​ឲ្យ​ស្គាល់​តែ​ឈ្មោះ​របស់​គាត់​ថា​ «Rigo»​ បាន​និយាយ​ថា​គាត់​លើក​ទឹក​ចិត្ត​ឲ្យ​ប្រជាជន​មាន​ដើម​កំណើត​អាមេរិក​ឡាទីន​ទាំង​អស់​ទៅ​ធ្វើ​តេស្ត​ឈាម​រក​មេរោគ​អេដស៍។

RIGO និយាយ​ថា​៖ «វា​ជារឿង​សំខាន់​ ពីព្រោះ​យើង​មិន​ដឹង​ថា​ដៃគូ ឬ​អតីត​ដៃ​គូ​របស់​យើង​មាន​ផ្ទុក​ជំងឺអ្វី​ខ្លះ»។

Maria មក​ដល់​កន្លែង​ធ្វើតេស្ត​ជាមួយ​កូន​តូច​ដ៏​ស្អាត​ម្នាក់​ឈ្មោះ​ Zoey។

នាង​បាន​និយាយ​ថា៖ «ចំពោះ​ខ្ញុំ​ វា​សំខាន់​ខ្លាំង​ណាស់​ក្នុង​ការ​ធ្វើ​តេស្ត​ឈាមរក​មេរោគ​អេដស៍​ ពីព្រោះ​យើង​យក​ចិត្ត​ទុក​ដាក់​ចំពោះ​គ្រួសារ​ និង​មិត្ត​ភក្តិ​របស់​យើង​។ ប្រសិន​បើ​យើង​មិន​ដឹង​ទេថា​ខ្លួនយើង​ផ្ទុក​ឬមិនផ្ទុក​មេរោគ​អេដស៍​ ធ្វើ​ម៉េច​យើង​ដឹង​ទៅ​ថា​យើង​កំពុងតែ​ចម្លង​រោគ​ទៅ​មនុស្ស​ជាទី​ស្រឡាញ់​ឬ​អត់​នោះ?»។

ជំងឺអេដស៍​/មេរោគអេដស៍ គឺ​អាច​ការពារ​ និង​ព្យាបាល​បាន។ អ្នក​ផ្ទុកមេរោគ​អេដស៍ អាច​រស់​នៅ​ធម្មតា​ ដរាបណា​ពួក​គេ​បន្ត​ការ​ព្យាបាល។​ ការ​ព្យាបាល​ ក៏​អាច​ជួយ​ដល់​អ្នក​ដែល​ប្រឈម​នឹង​ការ​ផ្ទុក​មេរោគ​អេដស៍ ឲ្យស្ថិត​ក្នុង​ស្ថានភាព​គ្មាន​ជំងឺ​អេដស៍​ផងដែរ។​ យោង​តាម​ប្រសាសន៍​របស់​លោក​បណ្ឌិត​ Tom Frieden ជា​នាយក​មជ្ឈមណ្ឌលទប់ស្កាត់ និង​បង្ការ​មេរោគ​ បាន​និយាយ​ប្រាប់​ VOAតាមរយៈ​ប្រព័ន្ធ​ Skypeថា​ នៅ​ក្នុងសង្គម​អាមេរិក​ភាគ​ច្រើន​ អត្រា​ឆ្លង​មេរោគ​អេដស៍​កំពុងតែ​ធ្លាក់​ចុះ។

លោក​បណ្ឌិត​បាន​បន្តថា៖ «យើង​បានឃើញការ​ថយ​ចុះ​យ៉ាង​ខ្លាំង​នៃការ​ឆ្លង​មេរោគ​តាម​រយៈ​ការ​រួម​ភេទ​ផ្ទុយ​គ្នា គឺ​ថយ​ចុះ​ជាង​ពីរ​ភាគ​បី ស្មើ​នឹង​៨០​ភាគ​រយ... ជាទូទៅ ​យើង​ឃើញ​មាន​ការ​ថយ​ចុះ​ខ្លាំង​នៃការ​ឆ្លងមេរោគ​តាមរយៈការ​ប្រើ​ប្រាស់​ម្ជុល​ចាក់​ថ្នាំ ប៉ុន្តែ​ក្នុង​ចំណោម​បុរស​ក្មេងៗ​ដែល​រួម​ភេទ​ជាមួយ​បុរស​ដូច​គ្នា​ យើង​ឃើញ​ថាការ​ឆ្លង​មេរោគ​អេដស៍​នេះ​ មាន​ការ​កើន​ឡើង»។

នៅសហ​រដ្ឋ​អាមេរិក​ ក្រុមមនុស្សដែល​ប្រឈម​នឹង​មេរោគ​នេះ​ខ្លាំង​ជាង​គេ​ គឺ​ក្រុម​មនុស្ស​និយាយ​ភាសា​អេស្ប៉ាញ​ និងក្រុម​ជនជាតិ​អាមេរិក​ដើម​កំណើត​អាហ្រ្វិក។​ លោក​ Rodney McCoy អ្នក​ផ្តល់​ប្រឹក្សា​ដល់​ក្រុម​ទាំង​ពីរ​នេះ​ នៅ​អង្គការ​ Nova Salud បាន​ឲ្យ​ដឹង​ថា៖« ស្រ្តីដែល​គ្រប់អាយុ​មាន​ផ្ទៃ​ពោះ និង​ស្រ្តីក្មេង​ៗ ប្រជាជន​មាន​ដើម​កំណើត​អាមេរិក​ឡាទីន​ដែល​ស្រឡាញ់​ភេទដូចគ្នា និង​ស្រឡាញ់​ភេទ​ទាំង​ពីរ​ គឺ​កំពុង​ស្ថិត​ក្នុង​ការ​ប្រឈម​នឹង​បញ្ហា​នេះ​ខ្លាំង​បំផុត។​ យើង​ក៏​បាន​កត់​សម្គាល់​និន្នាការ​ស្រដៀង​នេះ​ក្នុង​ចំណោម​ប្រជាជាន​អាមេរិក​ដើម​កំណើត​អាហ្រ្វិក​ផង​ដែរ។ នៅ​ពេល​ដែល​យើង​ពិនិត្យ​មើល​អ្នកផ្ទុក​មេរោគ​អេដស៍​វិវឌ្ឍ​ទៅជា​អ្នកកើត​ជំងឺអេដស៍​ ​ ប្រជាជន​ដើម​កំណើត​ជនជាតិ​ស្បែក​ខ្មៅ និង​ដើម​កំណើត​អាមេរិក​ឡាទីន​ស្ថិត​ក្នុង​ការ​ប្រឈម​ខ្ពស់​បំផុត។​»

អង្គការ​ Nova Salud បាន​ជួយ​មនុស្ស​ឲ្យ​ចៀស​ផុត​ពី​ការ​ផ្ទុក​មេរោគ​អេដស៍ ឬ​ក៏​ប្រសិនបើ​មាន​មនុស្ស​ផ្ទុកមេរោគ​អេដស៍​ អង្គការ​នេះ​ នឹង​ជួយ​ពួក​គេ​ឲ្យ​ទទួល​បាន​ការ​ព្យាបាល​ និងសិក្សា​បន្ថែម​អំពី​មេរោគនេះ។ ធ្វើ​ដូច្នេះ​ ពួក​គេ​នឹង​នៅ​តែ​មាន​សុខភាព​ល្អ ហើយ​ដៃគូ​របស់​ពួក​គេ​ចៀស​ផុត​ពី​ការ​ឆ្លងមេរ​រោគ​នេះ។

ពេល​ខ្លះ​ ការ​បញ្ចុះ​បញ្ចូល​ឲ្យ​មនុស្ស​មក​ធ្វើ​តេស្ត​ឈាម​ដើម្បី​ឲ្យ​ពួក​ដឹង​ពី​ស្ថានភាព​របស់​ពួក​គេ​ ក៏​ជា​រឿង​ពិបាក​ដែរ។​ លោក​ McCoyបាន​និយាយ​ថា​អង្គការ​ Nova Salud ប្រើ​វិធីសាស្រ្ត​មួយ​ផ្សេងទៀត។

លោក​បាន​និយាយ​ថា៖ «រឿង​ទី​មួយ​ដែល​យើង​ធ្វើ​ គឺ​យើង​ទទួល​ស្គាល់​ថា​មាន​ការ​រើស​អើង​មាក់​ងាយ​»។

លោក ​McCoyនិយាយ​ថា​ មធ្យោបាយ​មួយ​ដើម្បី​ចៀស​វាង​បញ្ហា​រើសអើង​នេះ​ គឺ​ត្រូវ​ធ្វើ​ឲ្យ​ការ​ធ្វើ​តេស្ត​ឈាម​រកមេរោគ​អេដស៍​ក្លាយ​ជា​ទម្លាប់​ធម្មតា។

លោក​បាន​ពន្យល់​ថា៖ «ប្រសិនបើ​អ្នក​ទៅ​ជួប​វេជ្ជ​បណ្ឌិត​ធ្វើ​តេស្ត​ឈាម​រក​មើល​ជាតិ​ខ្លាញ់​ក្នុង​ឈាម រក​មើល​ការ​ឡើង​សម្ពាធ​ឈាម​...​អ៊ីចឹង​ហេតុ​អ្វី​មិន​ចាប់​ផ្តើម​ដាក់​បញ្ចូល​ការ​ធ្វើ​តេស្ត​ឈាម​រកមេរោគ​អេដស៍​ និង​ជំងឺ​កាម​រោគ?»។

​គោលដៅ គឺ​ត្រូវ​ឈាន​ទៅ​ដល់​ចំណុច​ដែល៩០ភាគរយ​នៃអ្នក​ផ្ទុកមេរោគ​អេដស៍​បាន​ដឹង​ខ្លួន​នៅ​គ្រប់​ទី​កន្លែងទាំងអស់​ ហើយ​អ្នក​ដែល​ផ្ទុក​មេរោគ​នេះ​នឹង​ទទួល​ការ​ព្យាបាល​ ហើយ​ទី​បំផុត​ គឺ​ធ្វើឲ្យ​មេរោគ​នេះ​ នឹង​បានថយ​ចុះ​នៅ​ត្រឹម​កម្រិតដែល​មើល​លែង​ឃើញ​ នៅ​ក្នុង​ចំណោម​៩០​ភាគ​រយ​នៃ​អ្នក​កំពុង​ព្យាបាល។​ វិធី​សាស្រ្ត​នេះ​នឹង​បញ្ចប់​ការ​រីក​រាល​ដាល​នៃ​ជំងឺ​អេដស៍​ ដែល​ជា​ការ​គំរាម​កំហែង​សុខភាព​សាធារណៈ​ នៅ​ទូទាំង​សកល​លោក ត្រឹម​ឆ្នាំ​២០៣០។

ប្រែសម្រួល​ដោយ៖​ សើ​ សាយ្យាណា

XS
SM
MD
LG