ភ្ជាប់​ទៅ​គេហទំព័រ​ទាក់ទង

ពួក​សកម្មជន​ស៊ីរី​និយាយ​ថា ស្ត្រី និង​កូន​ក្មេង ត្រូវ​បាន​សម្លាប់​រង្គាល​ក្នុង​ទីក្រុង​ហូមស៏


រូបភាព​នៃ​អាគារ​បាក់​បែក​នៅ​ក្នុង​សង្កាត់​អ៊ីនសាអាត​នៃ​ទីក្រុង​ហូមស៍ ថ្ងៃ​ទី​៧ ខែ​មិនា​ ឆ្នាំ​២០១២។

ពួក​សកម្ម​ជន​ស៊ីរី​និយាយ​ថា​សាកសព​ស្រ្តី​និង​កូន​ក្មេង​យ៉ាង​ហោច​ណាស់​ក៏​៤៥​នាក់​ដែរ បាន​ត្រូវ​គេ​រក​ឃើញនៅ​ក្នុង​ទីក្រុង​ហូមស៏។

ពួក​សកម្ម​ជន​និយាយ​ទៀត​ថា​សាក​សព​ខ្លះ បាន​ដាច់​ខ្ទេចខ្ទី​យ៉ាង​ខ្លាំង​ហើយ​ថា​សាក​សព​ស្រ្តី​ខ្លះ​បាន​ត្រូវ​គេ​ចាប់​រំលោភ។ ពួកគេ​បាន​ស្តី​បន្ទោស​ទៅ​កងកម្លាំង​ដែល​គាំទ្រ​រដ្ឋាភិបាល​ចំពោះ​ការ​សម្លាប់​រង្គាល​នេះ។

ពួក​មន្រ្តី​ស៊ីរី​បាន​បញ្ជាក់​ពី​ការ​ស្លាប់​នេះ ប៉ុន្តែ​ បាន​ទម្លាក់​កំហុស​ការ​សម្លាប់​នោះ​ទៅ​លើ​អ្វី​ដែល​ពួកគេ​ហៅ​ថា​ភេរវករ​ប្រដាប់​អាវុធ។

មិន​មាន​ការ​បញ្ជាក់​ឯករាជ្យ​ណា​មួយ​ពី​ការ​សម្លាប់​នោះ​ទេ។

សេចក្តី​រាយការណ៍​ពី​ការ​ចោទ​ប្រកាន់​នៃ​អំពើ​ព្រៃផ្សៃ​បាន​កើត​មាន​ឡើង​នៅពេល​ដែល​រដ្ឋ​មន្រ្តី​ក្រសួង​ការបរទេស​របស់​ក្រុម​ប្រឹក្សា​សន្តិសុខអង្គការ​សហប្រជាជាតិ​ប្រុង​ប្រៀប​ជួប​គ្នានៅ​ក្នុង​ទីក្រុង​ញូវយ៉ក បន្ទាប់​ពី​បេសកជន​សន្តិភាព​ទៅ​ប្រទេស​ស៊ីរីបាន​បញ្ចប់​ដោយ​បរាជ័យ។

ព័ត៌មាន​អន្តរជាតិសំខាន់​ៗ​ផ្សេងទៀត៖

កម្ពុជា៖ លោក នួន ជា អតីត​បងធំ​ទី​ពីរ​នៃ​របប​ខ្មែរ​ក្រហមបាន​ស្នើ​ឱ្យ​ប្រធាន​មន្ទីរ​ឃុំឃាំង​នៃ​សាលាក្តី​ខ្មែរ​ក្រហម​ចាក់​សោរ​បន្ទប់​របស់​គាត់​ដោយ​ព្រួយ​បារម្ភ​ថា​អាច​នឹង​ត្រូវ​ឌុច​អតីត​មេគុក​ទួលស្លែង​មាន​ចេតនា​ប្រព្រឹត្ត​អាក្រក់​មកលើ​ជីវិត​គាត់។

ប្រធានាធិបតី​ បារ៉ាក់​ អូបាម៉ា​ ជាមួយ​ទាហាន​អាមេរិកាំង​នៅ​ទី​តាំង​ទ័ពអាកាស​ Osan នៅ​ខាង​ក្រៅ​រដ្ឋ​ធានី​សេអ៊ូល​ ។​
ប្រធានាធិបតី​ បារ៉ាក់​ អូបាម៉ា​ ជាមួយ​ទាហាន​អាមេរិកាំង​នៅ​ទី​តាំង​ទ័ពអាកាស​ Osan នៅ​ខាង​ក្រៅ​រដ្ឋ​ធានី​សេអ៊ូល​ ។​
ស.រ.អា/កូរ៉េខាងត្បូង៖ បណ្តាញ​ផ្សាយ​ព័ត៌មាន​កូរ៉េខាង​ត្បូង​ បាន​ឲ្យ​ដឹង​ថា​លោក​ប្រធានាធិបតី​ស.រ.អា កំពុង​ពិចារណា​អញ្ជើញ​ទៅ​បំពេញ​ទស្សនកិច្ច​តំបន់គ្មាន​យោធា​ដែល​មាន​ការ​តាន​តឹងដែល​បាន​បែង​ចែក​រវាង​ប្រទេស​កូរ៉េ​ខាងជើង​និង​ខាងត្បូង​ក្នុង​អំឡុង​ពេល​នៃ​ដំណើរ​បំពេញ​ទស្សនកិច្ច​ដែល​បាន​គ្រោង​ទុក​ទៅ​កាន់​រដ្ឋធានី​សេអ៊ូល (Seoul) នៅ​ចុង​ខែ​នេះ។

វៀតណាម៖ រដ្ឋ​មន្រ្តី​និង​មន្រ្តី​ជាន់​ខ្ពស់​មក​ពី​ប្រទេស​៤៤​បាន​ស្ថិត​នៅ​ក្នុង​ទីក្រុង​ហាណូយ​នៅ​ថ្ងៃ​ច័ន្ទ​នេះ​ដើម្បី​ចាប់​ផ្តើមសន្និសិទ​រយៈពេល​៥​ថ្ងៃ​ដែល​រៀប​ចំ​ឡើង​ដោយ​អង្គការ​ម្ហូប​អាហារ​និង​កសិកម្ម​របស់​អង្គការ​សហប្រជាជាតិ (U.N. Food and Agriculture Organization)។

អាហ្វហ្គានីស្ថាន៖ ពួក​តាលីបង់ (Taliban) បាន​សន្យា​ស្វះ​ស្វែង​ធ្វើ​ការ​សងសឹក​ដល់​ភាព​ឃោរឃៅ​របស់​អាមេរិកាំង​បន្ទាប់​ពី​ទាហាន​សហរដ្ឋ​អាមេរិក​ម្នាក់ បាន​ដើរ​ចូល​ក្នុង​ផ្ទះ​ជន​ជាតិ​អាហ្វហ្គានីស្ថាន​ដែល​កំពុង​ទទួល​ទាន​ដំណេក​កាល​ពី​ថ្ងៃ​អាទិត្យ​ហើយ​បាន​សម្លាប់​ពួកគេ។

អ៊ីស្រាអែល/ប៉ាឡេស្ទីន៖ ក្រុម​បុគ្គលិក​សុខាភិបាល​និយាយ​ថា​ការ​វាយ​ប្រហារ​តាម​អាកាស​របស់​អ៊ីស្រាអែល​បាន​សម្លាប់​កង​ជីវពលប៉ាឡេស្ទីន​២​នាក់​ថែម​ទៀតនៅ​ក្នុង​តំបន់​ហ្គាស្សា (Gaza) នៅ​ថ្ងៃ​ច័ន្ទ​នេះ ដែល​ជា​ការ​ឆ្លើយ​តប​មួយ​ទៀត​របស់​អ៊ីស្រាអែល​ចំពោះ​ការ​វាយ​ប្រហារ​ដោយ​គ្រាប់​រ៉ុកកែត​នោះ។

ស.រ.អា៖ នាវា​ផ្ទុក​យន្តហោះ​ប្រើ​ដោយ​កម្លាំង​ថាមពល​នុយក្លេអ៊ែរ​លើក​ទី​១​របស់​កង​នាវា​សហរដ្ឋ​អាមេរិក​បាន​ចាក​ចេញ​ដើម្បី​បំពេញ​បេសកម្ម​ចុង​ក្រោយ​របស់​ខ្លួន។

ចិន៖ ធនាគារ​កណ្តាល​ចិន​បាន​ប្រាប់​ឲ្យ​ដឹង​ថាខ្លួន​កំពុង​ពិចារណា​វិធានការ​បន្ធូរបន្ថយឥណទាន​ដែល​ទើប​តែ​ប៉ុន្មាន​ថ្ងៃប៉ុណ្ណោះ បន្ទាប់​ពី​ប្រទេស​នេះ​បាន​ចុះ​ផ្សាយ​ឱនភាព​ពាណិជ្ជកម្ម​ដ៏​ធំ​បំផុត​នៅ​ក្នុង​រយៈពេល​ជាង​១​ទសវត្សរ៍​នេះ។

ស.រ.អា/អាហ្វហ្គានីស្ថាន៖ ការ​ស្ទង់​មតិ​របស់បណ្តាញ​សារព័ត៌មាន ABC News និង​កាសែត Washington Post បង្ហាញ​ឲ្យ​ដឹងថា​ពលរដ្ឋ​អាមេរិកាំង​៦០​ភាគរយ​ជឿ​ជាក់​ថា​សង្គ្រាម​ក្នុង​ប្រទេសអាហ្វហ្គានីស្ថាន គឺ​គ្មាន​តម្លៃ​ទេ។ ការ​ស្ទង់​មតិ​បាន​រក​ឃើញ​ថាប្រជាពលរដ្ឋ​អាមេរិកាំង​៣៥​ភាគរយ​តែ​ប៉ុណ្ណោះ ជឿ​ជាក់​ថា​កិច្ច​ខិត​ខំ​ប្រឹង​ប្រែង​រយៈពេល​១​ទស​វត្សរ៍​បាន​ធ្វើ​ឲ្យ​មាន​ការ​ចំណាយ​និង​បាត់​បង់​ជីវិត​ច្រើន។

ពិភពលោក៖ បាតុករ​ប្រឆាំង​នុយក្លេអ៊ែរ​រាប់​ពាន់​នាក់​បាន​ប្រមូល​ផ្តុំ​គ្នានៅ​ក្នុង​ទីក្រុង​នានា​នៅជុំ​វិញ​ពិភពលោក​កាល​ពី​ថ្ងៃ​អាទិត្យ​ដើម្បី​ប្រារព្ធ​ខួប​លើក​ទី​មួយនៃ​ការ​រញ្ជូយ​ផែនដីនិង​រលក​យក្ស​ ស៊ូណាមី (Stunami) នៅ​ក្នុង​ប្រទេស​ជប៉ុន​ដែល​បាន​ធ្វើ​ឲ្យមនុស្ស​ជាង​២​ម៉ឺន​២​ពាន់​នាក់​ស្លាប់​ឬ​ក៏​បាត់​ខ្លួន ហើយ​បាន​នាំ​ឲ្យ​មាន​វិបត្តិ​នុយក្លេអ៊ែរ​ដ៏​អាក្រក់​អាក្រី​បំផុត​មួយនៅ​ក្នុង​ប្រវត្តិសាស្រ្ត។

សេណេហ្គាល់៖ ពួក​អ្នក​គាំទ្រ​គណបក្ស​ប្រឆាំង​រាប់​ពាន់​នាក់ បាន​ធ្វើ​ការ​ប្រជុំ​មហាជន​នៅ​ក្នុង​រដ្ឋធានី​នៃ​ប្រទេស​សេណេហ្គាល់ (Senegal) ដើម្បី​គាំទ្រលោក ម៉ាកឃី សល (Macky Sall) បេក្ខជន​ប្រធានាធិបតី ក៏​ប៉ុន្តែ​យុទ្ធនាការ​បោះឆ្នោត​របស់​ប្រធានាធិបតី អាប់ឌូឡេ វ៉ាឌី (Abdoulaye Wade) ប្រាប់​ឲ្យ​ដឹង​ថា​លោក​មាន​យុទ្ធសាស្រ្ត​ដើម្បី​ឲ្យ​ឈ្នះការ​បោះឆ្នោតលើក​ទី​២​នៅ​ចុង​ខែ​នេះ។


XS
SM
MD
LG