ពលរដ្ឋរុស្ស៊ីកំពុងតែទៅបោះឆ្នោតក្នុងការបោះឆ្នោតជ្រើសរើសប្រធានាធិបតី ដែលទំនងជានឹងនាំលោក វ្លាឌីមៀរ ពូទីន (Vladimir Putin) ឱ្យត្រលប់មកកាន់រដ្ឋាភិបាលវិមានក្រិមឡាំង (Kremlin) វិញ សម្រាប់កំណត់ត្រាអណត្តិទី៣របស់លោក។
អ្នកស្ម័គ្រចិត្ដតាមដានមើលការបោះឆ្នោតចំនួនជាង ២០០,០០០នាក់ បានពិនិត្យមើលយ៉ាងដិតដល់ ដល់ការបោះឆ្នោតដោយសង្ឃឹមថានឹងអាចបញ្ចៀសការបន្លំសន្លឹកឆ្នោតបាន ដូចដែលគេធ្លាប់ឃើញមាននៅពេលបោះឆ្នោតតំណាងរាស្ដ្រកាលពីថ្ងៃទី ៤ ខែ ធ្នូ។
អ្នកប្រើប្រាស់បណ្ដាញអ៊ីនធឺណេតជាង ៦ សែននាក់ផ្សេងទៀត បានចុះឈ្មោះដើម្បីតាមដានមើលកាមេរ៉ាដែលបានដំឡើងនៅគ្រប់បណ្តាស្ថានីយ៍បោះឆ្នោតជិត១០០,០០០កន្លែង។
ការស្ទង់មតិមុនការបោះឆ្នោតមួយ ទស្សទាយថាលោក ពូទីន នឹងយកជ័យជម្នះយ៉ាងតិច ទទួលបានសម្លេង៦២ភាគរយ ដែលគ្រប់គ្រាន់ ដោយមិនបាច់បោះឆ្នោតលើកទីពីរ។
ព័ត៌មានអន្តរជាតិសំខាន់ៗផ្សេងទៀត៖
ប៉ូឡូញ៖ មន្ដ្រីសង្គ្រោះបន្ទាន់ក្នុងប្រទេសប៉ូឡូញ និយាយថា មានរទេះភ្លើងពីរគ្រឿងបានប៉ះទង្គិចគ្នា មុខទល់នឹងមុខ បណ្ដាលឲ្យមនុស្ស ១៥ នាក់ស្លាប់ ហើយ ៥៤ នាក់ផ្សេងទៀតរបួស។
កុងហ្គោ៖ ពួកអ្នកសាក្សីនៅក្នុងរដ្ឋធានីរបស់ សាធារណរដ្ឋ កុងហ្គោ និយាយថាមានការផ្ទុះយ៉ាងតិចចំនួន៣ ដែលធ្វើឲ្យកក្រើកទីក្រុង ប្រេស្សាវីល (Brazzaville) កាលពីព្រឹកថ្ងៃអាទិត្យ។
ភូមា៖ លោកស្រី អង់ សាន ស៊ូជី (Aung San Suu Kyi) មេដឹកនាំដែលគាំទ្រលទ្ធិប្រជាធិបតេយ្យបានថ្លែងអំណរគុណដល់ប្រទេស កាណាដា និង បស្ចិមប្រទេសដទៃទៀត ដែលបានរក្សាទណ្ឌកម្ម មកលើភូមាដោយលោកស្រីមានប្រសាសន៍ថាប្រទេសទាំងនោះបានជួយសម្រួលការផ្លាស់ប្តូររបស់ប្រទេសនេះទៅរកលទ្ធិប្រជាធិបតេយ្យ។
ហ្គីណេ៖ មនុស្សប្រមាណ ៥០ នាក់ បានស្លាប់ និង ២០ នាក់ទៀតរបួសក្នុងគ្រោះថ្នាក់មួយនៅក្នុងប្រទេសហ្គីណេភាគខាងកើតកាលពីថ្ងៃសៅរ៍។
ចិន៖ អ្នកភូមិដែលបានបះបោរប្រឆាំងនឹងមេដឹកនាំពុករលួយកុម្មុយនិស្ដចិនបានទៅបោះឆ្នោតក្នុងជុំទីពីរ កាលពីថ្ងៃអាទិត្យនេះ ក្នុងការបោះឆ្នោតពីរថ្ងៃដែលជាកំណត់សម្គាល់ ក្នុងរបបផ្តាច់ការក្នុងរដ្ឋដែលមានគណបក្សតែមួយគត់។
ហ្វីលីពីន៖ ប៉ូលិសនិយាយថា មានអ្នកទេសចរណ៍ជាតិន័វវែសម្នាក់និងអ្នកបើកបរយន្ដហោះហ្វីលីពីនម្នាក់បានស្លាប់និង បរទេស៣នាក់ទៀត របួស ក្នុងគ្រោះថ្នាក់ធ្លាក់យន្ដហោះនៅតំបន់កណ្ដាលប្រទេសហ្វីលីពីន កាលពីថ្ងៃអាទិត្យ។
ចិន៖ បណ្ឌិតសភារបស់ប្រទេសចិន ថ្លែងនៅថ្ងៃអាទិត្យនេះថាការតម្លើងចំណាយយោធា របស់ប្រទេសចិន គឺសមហេតុសមផល បើយោងទៅតាមកត្ដាជាច្រើន។
