សហរដ្ឋអាមេរិក៖ ការយកចិត្តទុកដាក់ទៅលើការប្រកួតប្រជែងដើម្បីកំណត់ថាបេក្ខជនរូបណាក្នុងគណបក្សសាធារណរដ្ឋនឹងប្រជែងជាមួយលោកប្រធានាធិបតី បារ៉ាក់ អូបាម៉ា ក្នុងការបោះឆ្នោតសាកលក្នុងខែវិច្ឆិកានៅពេលនេះបានតម្រង់ទៅទិសខាងកើតពីរដ្ឋ នេវ៉ាដា Nevada ទៅកាន់រដ្ឋកូឡូរ៉ាដូ Colorado និងរដ្ឋមីនីសូតា Minnesota ដែលនឹងធ្វើការប្រជុំ caucuses នៅថ្ងៃអង្គារ។
លោក មិត រ៉មនី Mitt Romney បេក្ខជននាំមុខគេនិងជាអតីតអភិបាលរដ្ឋ ម៉ាសាឈូសេត Massachusetts បានទទួលជ័យជំនះដាច់ណាត់ក្នុងការប្រជុំ caucuses ក្នុងរដ្ឋនេវ៉ាដា Nevada នាភាគខាងលិច ដោយបានទទួលសន្លឹកឆ្នោតគាំទ្រ២ដងច្រើនជាងសន្លឹកឆ្នោតគាំទ្រគូប្រជែងប្រកៀកបំផុតរបស់លោកគឺលោកញូវ ហ្គីងរីច Newt Gingrich ដែលជាអតីតប្រធានសភាតំណាងរាស្ត្រអាមេរិកាំង។
អេហ្ស៊ីប៖ ពួកបាតុករអេហ្ស៊ីបបានប៉ះទង្គិចជាមួយពួកប៉ូលីសក្នុងក្រុង ឡឺ គែរ Le Caire ក្នុងថ្ងៃទីបួនបន្តបន្ទាប់គ្នា នៅពេលពួកគេទាមទារឲ្យមានការបោះឆ្នោតប្រធានាធិបតីឲ្យបានឆាប់រហ័សនិងការផ្ទេរអំណាចមុនពេលកំណត់ពីក្រុមប្រឹក្សាយោធាគ្រប់គ្រងប្រទេសទៅឲ្យរដ្ឋាភិបាលស៊ីវិលមួយ។
អេហ្ស៊ីប៖ ចៅក្រមស៊ើបអង្កេតអេហ្ស៊ីបបានបញ្ជូនមនុស្ស៤៣នាក់ដោយមានរួមបញ្ចូលទាំងពលរដ្ឋអាមេរិក១៩នាក់ផងទៅឲ្យតុលាការឧក្រិដ្ឋកម្មមួយកាត់ទោសពីបទទាក់ទិននឹងសកម្មភាពត្រូវហាមឃាត់របស់ក្រុមគាំទ្រលទ្ធិប្រជាធិបតេយ្យដែលបានទទួលអ្វីដែលរដ្ឋាភិបាលក្រុង ឡឺ គែរ Le Caire ហៅថា «ការផ្តល់ប្រាក់ពីបរទេសដោយខុសច្បាប់»។
ស៊ីរី៖ លោកស្រីរដ្ឋមន្ត្រីក្រសួងការបរទេសអាមេរិក ហ៊ីលឡារី គ្លីនតុន Hillary Clinton បានអំពាវនាវដល់ «បក្សពួកជាមិត្តនៃប្រទេសស៊ីរីប្រជាធិបតេយ្យ» ឲ្យជំរុញការបញ្ឈប់អំពើបង្ក្រាបប្រកបដោយការបង្ហូរឈាមរបស់ប្រធានាធិបតី Bashar al-Assad ទៅលើក្រុមបាតុករប្រឆាំងនឹងរដ្ឋាភិបាលនិងគាំទ្រអន្តរកាលនយោបាយមួយដែលទម្លាក់លោកឲ្យចុះចេញពីតំណែង។
អាហ្វហ្គានីស្ថាន៖ លោកប្រធានាធិបតី ហាមីដ កាហ្សាយ Hamid Karzai បានថ្កោលទោសការបំផ្ទុះគ្រាប់បែកក្នុងរថយន្តមួយដ៏ប្រល័យដែលបានកើតមានទ្បើងកាលពីថ្ងៃអាទិត្យនៅខាងក្រៅទីស្នាក់ការកណ្តាលរបស់ប៉ូលីសក្នុងភាគខាងត្បូងប្រទេស។
ប៊ុលហ្គារី៖ លោកស្រីរដ្ឋមន្ត្រីក្រសួងការបរទេសអាមេរិក ហ៊ីលឡារី គ្លីនតុន Hillary Clinton បានអញ្ជើញទៅដល់ប៊ុលហ្គារី Bulgarie ដើម្បីធ្វើការចរចាដែលគេរំពឹងថានឹងផ្តោតការយកចិត្តទុកដាក់ទៅលើសន្តិសុខថាមពល។ នៅក្នុងទស្សនកិច្ចរយៈពេលខ្លីរបស់លោកស្រីកាលពីថ្ងៃអាទិត្យ លោកស្រី គ្លីនតុនកំណត់នឹងជួបជាមួយលោកប្រធានាធិបតី រ៉ូសេន ប្លេវនេឡេវ Rosen Plevneliev និងលោកនាយករដ្ឋមន្ត្រីប៊យកូ បូរីសូវ Boyko Borissov។