ភ្ជាប់​ទៅ​គេហទំព័រ​ទាក់ទង

ហ្វីលីពីន​និង​វៀតណាម​នឹង​លេង​កីឡា​រួម​គ្នា​លើ​កោះ​ស្ព្រែតលី


រូបភាព​នៃ​ប្រជុំ​កោះ​ Spratly ​ថត​ពី​លើ​អាកាស​។

បើ​យោង​ទៅ​តាម​មេបញ្ជាការ​យោធា​ជើងទឹក​របស់​ប្រទេស​ហ្វីលីពីន​ ទាហាន​ហ្វីលីពីន​ និង​ទាហាន​វៀតណាម​បាន​រួមគ្នា​លេង​កីឡា​នៅ​លើ​កោះ​ស្ព្រែតលី (Spratlys) ​ក្នុង​គោលបំណង​នឹង​ធ្វើ​ឲ្យ​ធូរស្រាល​ដល់​ស្ថានការណ៍​តានតឹង​នៅ​លើ​ជួរ​កោះ​ស្ព្រែតលី​នៃ​តំបន់​សមុទ្រ​ចិន​ភាគ​ខាងត្បូង។

តាម​ពាក្យ​របស់​ឧត្ដមនាវី​រង​ហ្វីលីពីន Alexander Pama ​ ដែល​និយាយ​ថា «យើង​នឹង​បញ្ជូន​ទាហាន​យើង​ទៅ​លើ​កោះ​ និង​ភាគី​មួយទៀត ​នឹង​បញ្ជូន​ទាហាន​របស់​គេ​ដែរ​ ដើម្បី​លេង​កីឡា​ផ្សេងៗ​ ដូច​ជា​បាល់បោះ​និង​បាល់ទាត់។

កោះ​នោះ ​ដែល​ទាមទារ​ដោយ​ចិន​ផង​ដែរ ​បាន​ត្រូវ​គេ​មើល​ឃើញ​ថា​ ជា​ចំណុច​ក្ដៅ​តែ​មិន​ឃើញ​មាន​អាវុធ​ពាក់ព័ន្ធ​ក្នុង​រឿង​នេះ​ទេ។

ព័ត៌មាន​អន្តរជាតិ​សំខាន់ៗ​ដទៃ​ទៀត៖

ឥណ្ឌូនេស៊ី៖ ជន​ស្វែង​រក​ទី​ជម្រក​ថ្មី​ដែល​ប្រាថ្នា​ធ្វើ​ដំណើរ​ទៅ​កាន់​ប្រទេស​អូស្រាលី ​បាន​ចាក​ចេញ​ពី​នាវា​ដឹកប្រេង​ដែល​ស្រោចស្រង់​ជីវិត​ខ្លួន​នៅ​លើ​សមុទ្រ​ហើយ​ ក្រោយ​ពី​បាន​ប្រឈម​មុខ​នឹង​អាជ្ញាធរ​ឥណ្ឌូនេស៊ី​មក។

កងទ័ព​រដ្ឋាភិបាល​នៃ​ប្រទេស​ស៊ីរី។
កងទ័ព​រដ្ឋាភិបាល​នៃ​ប្រទេស​ស៊ីរី។
ស៊ីរី៖ សកម្មជន​នៅ​ក្នុង​ប្រទេស​ស៊ីរី​រាយការណ៍​ថា ​ការ​វាយ​ប្រហារ​មក​លើ​ទី​ក្រុង​ពីរ​នឹង ​មិន​ឃើញ​មាន​ការ​ដក​កងទ័ព​ចេញ​កាល​ពី​ថ្ងៃ​អង្គារ​នេះ​ ទោះបី​ជា​រដ្ឋាភិបាល​ស៊ីរី​ និយាយ​អះអាង​ថា​ ខ្លួន​ចាប់ផ្ដើម​ដក​កងទ័ព​ចេញ​ពី​ទី​ក្រុង​ខ្លះ​ ដោយ​អនុវត្ដ​តាម​កិច្ច​ព្រមព្រៀង​ឈប់​បាញ់​គ្នា​ សម្របសម្រួល​ដោយ​អ.ស.ប.។

កូរ៉េ​ខាងជើង៖ នៅ​ថ្ងៃ​អង្គារ​នេះ​ កូរ៉េ​ខាងជើង​និយាយ​ថា​បាន​បញ្ចប់​កិច្ចការ​រៀបចំ​បាញ់​បង្ហោះ​រ៉ុក្កែត​ដែល​ជា​វិធានការ​ថ្កោល​ទោស​ដោយ​សហគមន៍​អន្ដរជាតិ។

នាយក​រង​នៃ​កម្មវិធី​អវកាស​កូរ៉េ​ខាងជើង​ Ryu Gun Chol ​និយាយ​ប្រាប់​ក្រុម​អ្នក​កាសែត​នៅ​ក្នុង​ទី​ក្រុង​ព្យុងយ៉ាង​ថា​ រ៉ុក្កែត​នោះ​រៀបចំ​ហើយ​ស្រេច​ដើម្បីបាញ់​បង្ហោះ​នៅ​ថ្ងៃ​ព្រហស្បត្តិ៍។ ​អ្នក​កាសែត​អន្ដរជាតិ​រាប់​ទាំង​ពី​វីអូអេ​ផង ​បាន​ត្រូវ​នាំ​ឲ្យ​ទៅ​មើល​ទី​កន្លែង​បាញ់​បង្ហោះ​កាល​ពី​ថ្ងៃ​អាទិត្យ។

ម៉ាឡេស៊ី៖ នាយករដ្ឋមន្ដ្រី​នៃ​ប្រទេស​ម៉ាឡេស៊ី ​លោក​ ណាជិប ​រាហ្សាក ​បាន​ចេញ​សេចក្ដី​ព្រាង​ច្បាប់​ថ្មី​មួយ​ដែល​រារាំង​ប៉ូលីស​មិន​ឲ្យ​ចាប់​ចង​ជន​សង្ស័យ​គ្មាន​ពេល​កំណត់​ដោយ​ មិន​មាន​ការ​កាត់ក្ដី​ ដោយសារ​តែ​ជំនឿ​នយោបាយ​របស់​គេ។

អ.ស.ប.៖ ក្រុម​ប្រឹក្សា​សន្ដិសុខ​អ.ស.ប. ​បាន​សម្ដែង​ការ​ព្រួយ​បារម្ភ​ដ៏​ជ្រាលជ្រៅ​មកលើ​ការ​គំរាម​ភេរវកម្ម​នៅ​តំបន់​ភាគ​ខាងជើង​ប្រទេស​ម៉ាលី​ ដោយ​និយាយ​ថា​ សមាជិក​របស់​ក្រុម​ អាល់កៃដា​នៅ​ក្នុង​ក្រុង​មាក្រេប​ និង​ក្រុម​និយម​ជ្រុល​ស្ថិត​នៅ​ក្នុង​ចំណោម​ជន​បះបោរ​ដែល​បាន​វាយ​ដណ្ដើម​ តំបន់​ភាគ​ខាងជើង​ប្រទេស។

ចិន៖ ប្រទេស​ចិន​បាន​កាត់ទោស​ដាក់​គុក​២​ឆ្នាំ​៨​ខែ​ ដល់​សកម្មជន​ពិការ​អ្នក​ការពារ​សិទ្ធិ​មនុស្សតាម​បទចោទ​ប្រកាន់​ពី​បទ​បណ្ដាល​ឲ្យ​មាន​ភាព​វឹកវរ​និង​ប្រព្រឹត្ដ​ការ​កេង​បន្លំ​ជំរុញ​ឲ្យ​មាន​ការ​តវ៉ា។

អាហ្វហ្គានីស្ថាន៖ អត្ដឃាតជន​បាន​បំផ្ទុះ​គ្រាប់បែក​បាន​សម្លាប់​មនុស្ស​យ៉ាង​តិច​១៥​នាក់​នៅ​ក្នុង​ការ​វាយ​ប្រហារ​នៅ​តំបន់​ភាគ​ខាងលិច ​និង​ខាង​ត្បូង​ប្រទេស​អាហ្វហ្គានីស្ថាន​ បណ្ដាល​ឲ្យ​មាន​ការ​ភ័យ​ខ្លាច​អំពី​ការ​វាយប្រហារ​ជា​ថ្មី​នៅ​រដូវ​ស្លឹក​ឈើ​លាស់។

ប៉ាគីស្ថាន៖ អ្នក​ជួយ​សង្រ្គោះ​រាប់រយ​នាក់​នៅ​បន្ដ​តាម​ស្វែងរក​ជនរងគ្រោះ​ពី​ការ​រមៀល​ទឹកកក​នៅ​ក្នុង​ប្រទេស​ប៉ាគីស្ថាន​ ដែល​បាន​សម្លាប់​មនុស្ស​ជាង​១៣៥​នាក់​ មាន​ទាហាន​និង​ជន​ស៊ីវិល​ផង ​ដែល​បាន​ត្រូវ​កប់​ដោយ​ទឹកកក​នៅ​ក្នុង​បន្ទាយ​ទាហាន​ នៅ​ ជិត​តំបន់​កាស្មៀរ​ភាគ​ខាង​ជើង​ប្រទេស។

XS
SM
MD
LG