ឥណ្ឌានិយាយថាខ្លួនបានសម្រេចចិត្តកាត់បន្ថយការដឹកជញ្ជូនប្រេងឆៅពីអ៊ីរ៉ង់ចំនួន១១ភាគរយ នៅក្រោយមានការគាបសង្កត់ពីស.រ.អ.ដែលធ្វើឱ្យសាធារណរដ្ឋអ៊ីស្លាមមួយនេះនៅដាច់ឯកោពីគេឯងដោយសារកម្មវិធីបរមាណូរបស់ខ្លួន។
លោក ស៊ីញ R.P.N. Singh ទេសរដ្ឋមន្ត្រីក្រសួងប្រេងនៃប្រទេសឥណ្ឌាបាននិយាយកាលពីថ្ងៃអង្គារថានៅពេលនេះរោងចក្រចម្រាញ់ប្រេងឥណ្ឌាគ្រោងនឹងដឹកជញ្ជូនប្រេងឆៅ១៥,៥លានតោនពីប្រទេសអ៊ីរ៉ង់ក្នុងឆ្នាំសារពើពន្ធនេះដោយកាត់បន្ថយពីចំនួន១៧,៤៤លានតោនកាលពីឆ្នាំមុន។
សេចក្តីប្រកាសកាលពីថ្ងៃអង្គារបានធ្វើឡើងក្រោយពីលោកស្រីរដ្ឋមន្ត្រីការបរទេសស.រ.អ. ហ៊ីឡារី គ្លីនតុន បានសុំឱ្យឥណ្ឌាកាត់បន្ថយការដឹកជញ្ជូនប្រេងអ៊ីរ៉ង់ចូលក្នុងប្រទេសនៅក្នុងឱកាសទស្សនកិច្ចរបស់លោកស្រីក្នុងប្រទេសនេះក្នុងតំបន់អាស៊ីខាងត្បូងកាលពីសប្តាហ៍មុន។
ក្រិក៖ កិច្ចចរចាដែលមានគោលដៅដោះស្រាយវិបត្តិនយោបាយក្នុងប្រទេសក្រិកដែលជំពាក់បំណុលច្រើនបានបរាជ័យហើយ។ សេចក្តីថ្លែងការណ៍មួយកាលពីថ្ងៃអង្គារពីការិយាល័យរបស់លោកប្រធានាធិបតីក្រិក ការ៉ូឡូស ប៉ាប៉ូលីយ៉ាស បានប្រកាសថាកិច្ចចរចាគ្នាមិនមានជោគជ័យទេ។ ហើយលោក អេវ៉ង់ជេឡូស វេនីហ្សេឡូស Evangelos Venizelos មេដឹកនាំគណបក្ស PASOK បាននិយាយថានៅពេលនេះប្រទេសត្រូវធ្វើការបោះឆ្នោតជាថ្មី។ការបោះឆ្នោតនេះអាចប្រព្រឹត្តទៅនៅខែក្រោយ។
ក្រិក៖ លោក ហ្វ្រង់ស្វ័រ ហូឡង់ដ៍ ប្រធានាធិបតីថ្មីនៃប្រទេសបារាំងបានជួបជាមួយលោកស្រីអធិការបតីអាល្លឺម៉ង់ អេនជេឡា ម៉ាគេល នៅក្នុងក្រុងប៊ែរឡាំង ក្នុងរយៈពេលខ្លីក្រោយពិធីសម្ពោធតំណែងរបស់លោកជាមេដឹកនាំសង្គមនិយមទីមួយនៃប្រទេសបារាំងក្នុងរយៈពេល១៧ឆ្នាំ។
អ៊ីរ៉ង៖ ប្រទេសអ៊ីរ៉ង់និងទីភ្នាក់ងារបរមាណូអ.ស.ប.បានបញ្ចប់កិច្ចចរចា២ថ្ងៃនៅក្នុងក្រុងវ្យែនVienne ជាមួយការព្រមព្រៀងគ្នាមួយថានឹងជួបគ្នាទៀតនៅសប្តាហ៍ក្រោយដើម្បីពិភាក្សាគ្នាអំពីកង្វល់អន្តរជាតិស្តីពីកម្មវិធីបរមាណូចម្រូងចម្រាស់របស់អ៊ីរ៉ង់។
ស៊ីរី៖ ពួកសកម្មជនស៊ីរីបាននិយាយថាកងកម្លាំងរដ្ឋាភិបាលបានបាញ់សម្លាប់មនុស្សយ៉ាងតិចណាស់២០នាក់នៅក្នុងការដង្ហែសពមួយក្នុងភាគកណ្តាលនៃប្រទេសស៊ីរីខណៈដែលពួកអ្នកសង្កេតការយោធាអ.ស.ប.ឋិតនៅក្នុងតំបន់នោះ។
សូម៉ាលី៖ កងកម្លាំងប្រឆាំងនឹងពួកចោរសមុទ្រនៃសហភាពអឺរ៉ុបបាននិយាយថាពួកគេបានវាយប្រហារមូលដ្ឋានពួកចោរសមុទ្រសូម៉ាលីជាលើកដំបូងដោយបានបំផ្លាញទូកដែលបានត្រូវប្រើប្រាស់ដោយពួកអ្នកចាប់ចំណាប់ខ្មាំង។
ភូមា៖ លោកស្រីអោង សានស៊ូជីមេដឹកនាំលទ្ធិប្រជាធិបតេយ្យនៃប្រទេសភូមាបានមានប្រសាសន៍ថាលោកស្រីគាំទ្រដោយប្រុងប្រយ័ត្នដល់សេចក្តីស្នើមួយឱ្យលុបចោលការដាក់ទណ្ឌកម្មសេដ្ឋកិច្ចរបស់ស.រ.អ.ប្រឆាំងនឹងប្រទេសភូមា។
