ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ.ស.ប.​និង​អឺរ៉ុប​សុំ​ឲ្យ​មាន​ការ​ស៊ីប​អង្កេត​ការ​បាញ់​សម្លាប់​សកម្មជន​បរិស្ថាន​ខ្មែរ


លោក​ ឈុត វុទ្ធី ប្រធាន​អង្គការ​ការពារ​ធនធាន​ធម្មជាតិ​​ នៅ​ឧទ្យាន​ជាតិ​បុទុមសាគរ​ក្នុង​ខេត្ត​កោះកុង កាល​ពី​ខែ​កុម្ភៈ ឆ្នាំ​២០១២។ (រូបថត​ឯកសារ)
លោក​ ឈុត វុទ្ធី ប្រធាន​អង្គការ​ការពារ​ធនធាន​ធម្មជាតិ​​ នៅ​ឧទ្យាន​ជាតិ​បុទុមសាគរ​ក្នុង​ខេត្ត​កោះកុង កាល​ពី​ខែ​កុម្ភៈ ឆ្នាំ​២០១២។ (រូបថត​ឯកសារ)

យោង​ទៅ​តាម​ទីភ្នាក់ងារ​ព័ត៌មាន​បារាំង​អាអេហ្វ​ប៉េ ​អ.ស.ប.​ និង​សហភាព​អឺរុប​បាន​អំពាវនាវ​ដល់​រដ្ឋាភិបាល​កម្ពុជា​ ឲ្យ​រៀបចំ​យ៉ាង​ឆាប់​រហ័ស​នូវ​ការ​ស៊ើប​អង្កេត​ឯករាជ្យ​ អំពី​ឃាតកម្ម​មក​លើ​សកម្មជន​ល្បី​ឈ្មោះ​អ្នក​ការពារ​បរិស្ថាន។​

លោក ​ឈុត វុទ្ធី ​អាយុ​៤៣​ឆ្នាំ ​បាន​ត្រូវ​ប៉ូលីស​យោធា​បាញ់​សម្លាប់​នៅ​ថ្ងៃ​ទី​២៦​ខែ​មេសា​ នៅ​ពេល​ដែល​លោក​កំពុង​ប្រមូល​យក​ឯកសារ​ភស្ដុតាង​នៃ​ការ​កាប់​ព្រៃឈើ​ខុស​ច្បាប់​ក្នុង​ព្រៃ​ដាច់​ស្រយាល​ ដែល​ជា​ករណី​មួយ​ធ្វើ​ឲ្យ​មាន​ការ​ភ្ញាក់​ផ្អើល​ទូទាំង​ប្រទេស។​

មន្ដ្រី​យោធា​និយាយ​ថា​ ឃាតករ​បាន​ប្រើ​កាំភ្លើង AK-47​បាញ់​ខ្លួន​ឯង​ពីរ​ដង​នៅលើ​ដើម​ទ្រូង​ ដែល​ជាការ​អះអាង​នេះ​មនុស្ស​ជា​ច្រើន​មាន​ការ​សង្ស័យ​ថា​មិន​ពិត។​

អ្នក​នាំ​ពាក្ស​របស់​អគ្គ​ស្នងការ​អ.ស.ប.​ខាង​កិច្ចការ​ការពារ​សិទ្ធិ​មនុស្ស​ថ្លែង​នៅ​ក្នុងទីក្រុង​ហ្សឺណែវ​ថា​៖ «ថ្វី​បើ​គ្មាន​តម្លាភាព​នៅ​ពេល​នេះ​អំពី​អ្វី​ដែល​កើត​មាន​ឡើងយើង​មាន​ការ​ព្រួយ​បារម្ភ​ថា​ ការ​បាញ់​សម្លាប់​លោក​ វុទ្ធី​ ​កត់​សម្គាល់​ការ​វាយប្រហារ​ដោយ​អាវុធ​ជា​ច្រើន​គ្រា​មក​លើ​អ្នក​ការពារ​សិទ្ធិ​មនុស្ស​នៅ​ក្នុង​ប្រទេស​កម្ពុជា»។​

លោក​ថ្លែង​ទៀត​ថា៖ «យើង​អំពាវនាវ​ដល់​រដ្ឋាភិបាល​ខ្មែរ​ឲ្យ​ធានា​ថា​ វិធានការ​ស៊ើប​អង្កេត​ស៊ីវិល​ពេញ​លេញ ​សម​ធ្វើ​ឡើង​យ៉ាង​ឆាប់រហ័ស​ដោយ​យុត្ដិធម៌​និង​ឯករាជ្យ»។ ​នេះ​បើ​តាម​ពាក្យ​លោក ​Rupert Colville ​ថ្លែង​ប្រាប់​ទីភ្នាក់ងារ​ព័ត៌មាន​អាអេហ្វប៉េ​កាល​ពី​ល្ងាច​ថ្ងៃ​អង្គារ។

ព័ត៌មាន​អន្តរជាតិ​សំខាន់ៗ​ដទៃ​ទៀត៖

នៅ​ក្នុង​រូបថត​ដែល​ចេញ​ផ្សាយ​ដោយ​ការិយាល័យ​ព័ត៌មាន​ស្ថានទូត​អាមេរិក​នៅ​ក្រុង​ប៉េកាំង អ្នក​ច្បាប់​ពិការ​ភ្នែក​លោក Chen Guangcheng (កណ្តាល) ចាប់​ដៃ​ជាមួយ​ឯកអគ្គរដ្ឋទូត​អាមេរិក​ប្រចាំ​នៅ​ប្រទេស​ចិន លោក Gary Locke (ស្តាំ)។
នៅ​ក្នុង​រូបថត​ដែល​ចេញ​ផ្សាយ​ដោយ​ការិយាល័យ​ព័ត៌មាន​ស្ថានទូត​អាមេរិក​នៅ​ក្រុង​ប៉េកាំង អ្នក​ច្បាប់​ពិការ​ភ្នែក​លោក Chen Guangcheng (កណ្តាល) ចាប់​ដៃ​ជាមួយ​ឯកអគ្គរដ្ឋទូត​អាមេរិក​ប្រចាំ​នៅ​ប្រទេស​ចិន លោក Gary Locke (ស្តាំ)។

ចិន-អាមេរិក៖ មន្ដ្រី​អាមេរិកាំង​និយាយ​ថា​ សកម្មជន​ចិន​ខ្វាក់​ភ្នែក​ដែល​គេច​ចេញ​ពី​ការ​ឃុំឃាំង​ក្នុង​ផ្ទះ​ ហើយ​ចូល​ទៅ​ជ្រក​កោន​នៅ​ក្នុង​ស្ថានទូត​ស.រ.អ​ ក្នុង​ក្រុង​ប៉េកាំង​បានចាកចេញ​ទៅ​រក​ទី​កន្លែង​ថ្មី​ ដើម្បី​ព្យាបាល​ជំងឺ ​ហើយ​និង​ជួបជុំ​ជាមួយ​គ្រួសារ។

កូរ៉េ​ខាងជើង៖​ យោង​ទៅ​តាម​អ្នក​ជំនាញ​នុយក្លេអ៊ែរ​កូរ៉េ​ខាងត្បូង​ម្នាក់​ដែល​និយាយ​ថា​ វា​ហាក់​ដូចជា​កូរ៉េ​ខាងជើង​រៀបចំ​ស្រេច​ដើម្បី​ធ្វើ​តេស្ត​អាវុធ​នុយក្លេអ៊ែរ​ ជា​លើក​ទីបី​ ហើយ​រង់ចាំ​ ការ​សម្រេច​នយោបាយ​ដើម្បី​អនុវត្ដ។

ឥណ្ឌា-ចិន៖ យោង​តាម​ពាក្យ​សម្តី​របស់​រដ្ឋមន្ដ្រី​ឥណ្ឌា​ម្នាក់​ ដែល​និយាយ​កាល​ពី​ថ្ងៃ​ពុធ​នេះ​ថា ប្រទេស​ចិន​បាន​បំពាន​មក​លើ​ដែនអាកាស​របស់​ប្រទេស​ឥណ្ឌា​ចំនួន​ពីរ​ដង​កាល​ពី​ខែ​មិនា។​ ឧទ្ធម្ភាគចក្រ​ចិន​បាន​ហោះ​ចូល​ទៅ​ក្នុង​ដែន​អាកាស​ឥណ្ឌា​នៅ​ថ្ងៃ​ទី​១៦​ និង​ ១៩​ខែ​មិនា។​ លោក​រដ្ឋមន្ដ្រី​ការពារ​ប្រទេស​ឥណ្ឌា​ A K Antony ​ថ្លែង​ប្រាប់​រដ្ឋសភា​ ដោយ​បញ្ជាក់​ថា​ ឧប្បត្តិហេតុ​នោះ​កើត​ឡើង​នៅ​ពេល​ឧទ្ធម្ភាគចក្រ​ពីរ​គ្រឿង​របស់​ចិន​ បាន​ចូល​ទៅ​ក្នុង​ដែន​អាកាស​ឥណ្ឌា។

ជប៉ុន៖ រដ្ឋាភិបាល​តូក្យូ​បាន​រៃ​អង្គាស​ប្រាក់​បាន​១​លាន​ដុល្លារ​ជា​អំណោយ​ដើម្បី​ទិញ​យក​តំបន់​កោះ​ដែល​មាន​ជម្លោះ។​ នេះ​បើ​តាម​ពាក្យ​របស់​អាជ្ញាធរ​ក្រុង​កាល​ពី​ថ្ងៃ​ពុធក្រោយ​ពី​អភិបាល​ក្រុង ​បាន​ប្រកាស​អំពី​គម្រោង​ទិញ​យក​កោះ​នោះ​មក។​

អាមេរិក៖ ប្រធានាធិបតី​បារ៉ាក់​ អូបាម៉ា​ កត់​សម្គាល់​ខួប​ឆ្នាំ​ទី​មួយ​នៃ​មរណភាព​របស់​មេដឹកនាំ​អាល់កៃដា ​អូសាម៉ា ប៊ិនឡាឌិន ​ដោយ​លោក​ធ្វើ​ដំណើរ​រយៈពេល​ខ្លី​ទៅ​កាន់​ប្រទេស​អាហ្វហ្គានីស្ថាន​ ហើយ​លោក​បាន​ចុះ​ហត្ថលេខា​លើ​កិច្ច​ព្រមព្រៀង​យុទ្ធសាស្ដ្រ​ជាមួយ​រដ្ឋាភិបាល​កាប៊ូល​ ហើយ​និង​ថ្លែង​ជា​សារ​សម្រាប់​យុទ្ធនាការ​បោះឆ្នោត​នៅ​ឆ្នាំ​នេះ​ប្រាប់​ពលរដ្ឋ​អាមេរិកាំង​ថា​ សង្រ្គាម​បាន​ចុះ​ថយ​កម្រិត។

អាមេរិក៖ អតីត​ប្រធាន​រដ្ឋសភា ​លោក Newt Gingrich ត្រូវ​រំពឹង​ថា​នឹង​បញ្ឈប់​យុទ្ធនាការ​រក​ការ​តែងតាំង​ជា​បេក្ខជន​ប្រធានាធិបតី​ស.រ.អ.​ ពី​គណបក្ស​សាធារណរដ្ឋ​ ក្រោយ​ពី​លោក​បាន​យក​ជ័យជម្នះ​ក្នុង​ការ​បោះឆ្នោត​បឋម​តែ​ពីរ​ ហើយ​ជំពាក់​ប្រាក់​បំណុល​ពី​ការ​ចំណាយ​ឃោសនា​ដល់​ទៅ​៤​លាន​ដុល្លារ។

ភូមា៖ មេដឹកនាំ​លទ្ធិ​ប្រជាធិបតេយ្យ​ភូមា​ លោក​ស្រី ​អ៊ុងសាន ស៊ូជី ​បាន​ធ្វើ​សម្បថ​ចូល​កាន់​តំណែង​តាម​ផ្លូវការ ​ជា​សមាជិកា​នៅ​ក្នុង​រដ្ឋសភា​ជា​លើក​ទី​មួយ​ ក្រោយ​ពីបាន​ស្ថិត​នៅ​ក្នុង​ការ​ឃុំឃាំង​ក្នុង​ផ្ទះ​ជាង​ពីរ​ទសវត្សរ៍។

XS
SM
MD
LG