សាលាក្តីខ្មែរក្រហមបានរំលត់បណ្តឹងអាជ្ញាចំពោះជនសង្ស័យម្នាក់ក្នុងសំណុំរឿងបន្ថែម ក្រោយពេលដែលជនសង្ស័យក្នុងសំណុំរឿងដែលមានការរិះគន់ខ្លាំងនេះ បានស្លាប់ជិត២ឆ្នាំទៅហើយនោះ។
សហចៅក្រមស៊ើបអង្កេតបានសម្រេចលើកលែងការចោទប្រកាន់ប្រឆាំងនឹងស៊ូ ម៉េត ដែលជាជនសង្ស័យនិងជាអតីតកម្មាភិបាលខ្មែរក្រហមម្នាក់ក្នុងសំណុំរឿងបន្ថែម ០០៣ដ៏ចម្រូងចម្រាស ក្រោយពេលជនសង្ស័យរូបនេះបានស្លាប់។ នេះបើតាម សេចក្តីប្រកាសព័ត៌មានរបស់សហចៅក្រមស៊ើបអង្កេតនៃសាលាក្តីខ្មែរក្រហម ដែលចូលរួមដោយអ.ស.ប.ដែល VOA ទទួលបានកាលពីថ្ងៃព្រហស្បតិ៍។
ការលើកលែងបទចោទប្រកាន់ប្រឆាំងនឹងលោកស៊ូ ម៉េតនេះបានកើតឡើងនៅថ្ងៃទី២ខែមិថុនា ក្រោយពីជនសង្ស័យរូបនេះបានស្លាប់ដោយសារជំងឺកាលពីថ្ងៃទី១៤ខែមិថុនាឆ្នាំ២០១៣។
លោក ស៊ូ ម៉េត ជាអតីតមេបញ្ជាការកងទ័ពអាកាសម្នាក់ក្នុងសម័យខ្មែរក្រហម ស្ថិតក្នុងចំណោមជនសង្ស័យនៃសំណុំរឿង០០៣ ដែលត្រូវចោទប្រកាន់ថា មានការពាក់ព័ន្ធនឹងការកាប់សម្លាប់ពលរដ្ឋខ្មែរស្លូតត្រង់ជាច្រើនក្នុងទសវត្សរ៍១៩៧០ អំពីឧក្រិដ្ឋកម្មជាច្រើនរួមទាំងបទឧក្រិដ្ឋកម្មប្រឆាំងនឹងមនុស្សជាតិ បទឧក្រិដ្ឋកម្មសង្គ្រាម។
សេចក្តីប្រកាសព័ត៌មានដដែលបានឲ្យដឹងថា៖«សហចៅក្រមស៊ើបអង្កេតសន្និដ្ឋានថា មរណភាពរបស់ ស៊ូ ម៉េត បានបញ្ចប់ការចោទប្រកាន់ពីបទព្រហ្មទណ្ឌប្រឆាំងនឹងរូបគាត់។ ការកំណត់អំពីការទទួលខុសត្រូវព្រហ្មទណ្ឌ ចំពោះបទល្មើស ដែលត្រូវបានចោទប្រកាន់ក្នុងដីការសន្និដ្ឋានបញ្ជូនរឿងឲ្យ ស៊ើបសួរនឹងត្រូវធ្វើឡើងនៅក្នុងពេលចេញដីការដំណោះស្រាយអនុលោមតាមវិធាន៦៧នៃវិធានផ្ទៃក្នុង»។
សំណុំរឿង០០៣ និង០០៤ត្រូវគេគិតថា ជាសំណុំរឿងចុងក្រោយ ដែលមាន ជនសង្ស័យជាអតីតកម្មាភិបាលខ្មែរក្រហមថ្នាក់កណ្តាល៥នាក់។ សំណុំរឿង ទាំងនេះធ្វើឲ្យរដ្ឋាភិបាលកម្ពុជារងការរិះគន់ខ្លាំងថា បានជ្រៀតជ្រែកផ្នែកនយោបាយនិងបានរារាំងមិនឲ្យមានដំណើរការទៅមុខ។
សំណុំរឿងទាំងពីរនេះកំពុងស្ថិតក្នុងភាពខ្វែងគំនិតគ្នារវាងចៅក្រមជាតិនិង អន្តរជាតិ និងស្ថិតក្នុងដំណាក់កាលដែលគ្មានកិច្ចសហប្រតិបត្តិការពីភាគីកម្ពុជា ដើម្បីនាំខ្លួនជនសង្ស័យទាំងនោះមកឃុំខ្លួនដើម្បីបន្តនីតិវិធីច្បាប់តុលាការ។
សាលាក្តីខ្មែរក្រហមពេលនេះ កំពុងបន្តកាត់ទោសសំណុំរឿង០០២ វគ្គទី២ ដែល មានជនជាប់ចោទជាអតីតមេដឹកនាំខ្មែរក្រហមពីររូបគឺនួន ជា បងធំទី២ និងខៀវ សំផនជាប្រមុខរដ្ឋទាក់ទងនឹងបទចោទថា មានការពាក់ព័ន្ធនឹងការកាប់សម្លាប់ពលរដ្ឋខ្មែរជាង១លាន៧សែននាក់ចន្លោះឆ្នាំ១៩៧៥ដល់១៩៧៩៕
