ភ្ជាប់​ទៅ​គេហទំព័រ​ទាក់ទង

ព័ត៌មាន​អន្តរជាតិ៖ ២៨ តុលា


ទឹក​ត្រឹម​ក​ជើង​បាន​ហៀរ​ចូល​ក្នុង​ព្រះ​មហា​បរម​រាជ​វាំង​ពី​ផ្លូវ​នៅ​ជុំវិញ​ទី​នោះ​ ដែល​​បាន​លិច​ដោយ​សារ​ទឹក​នៃ​ទន្លេ Chao Phraya ​មាន​កម្រិត​ខ្ពស់។

ព័ត៌មានចុងក្រោយបំផុត៖

ថៃ៖ ទឹក​ជំនន់​ដែល​បាន​លិច​តំបន់​ជាយ​ក្រុង​បាងកក​បី​បួន​អាទិត្យ​មក​ហើយ​នោះ​ បាន​ហៀរ​ចូល​បន្តិច​ម្តង​ៗ​ក្នុង​ផ្នែក​កណ្តាល​ក្រុង​ នៅ​ពេល​ដែល​អ្នក​ស្រុក​ជា​ច្រើន​នាក់​ដែល​មាន​ការ​ភ័យ​ខ្លាច​នៅ​តែ​បន្ត​ចាក​ចេញ​ពី​ក្រុង​នេះ។​ ទឹក​ត្រឹម​ក​ជើង​បាន​ហៀរ​ចូល​ក្នុង​ព្រះ​មហា​បរម​រាជ​វាំង​ពី​ផ្លូវ​នៅ​ជុំវិញ​ទី​នោះ​ដែល​បាន​លិច​ដោយ​សារ​ទឹក​នៃ​ទន្លេ Chao Phraya ​មាន​កម្រិត​ខ្ពស់។

តួកគី៖ ពួកអ្នក​ធ្វើការ​ជួយ​សង្គ្រោះ​នៅ​ក្នុង​ប្រទេស​តួកគី​បាន​ទាញ​យក​យុវជន​ជំទង់​ម្នាក់​ចេញ​ពី​កម្ទិច​អាគារ​នៅ​ថ្ងៃ​សុក្រ​នេះ​ ជាង​១រយ​ម៉ោង​ក្រោយ​ពី​ការ​រញ្ជួយ​ផែនដី​មាន​កម្លាំង​៧,២​បាន​បំផ្លាញ​ផ្នែក​ជា​ច្រើន​នៃ​តំបន់​អាគ្នេយ៍​ប្រទេស​កាល​ពី​ថ្ងៃអាទិត្យ។

ចិន៖ ប្រធាន​នៃ​មូលនិធិ​ជួយ​សង្គ្រោះ​ខាង​ហិរញ្ញវត្ថុនៃ​តំបន់​ប្រើប្រាស់​ប្រាក់​អឺរ៉ូ​ បាន​ធ្វើ​ដំណើរ​ទៅ​ដល់​ប្រទេស​ចិន​នៅ​ថ្ងៃ​សុក្រ​នេះ​ ដើម្បី​ពិភាក្សា​អំពី​លទ្ធភាព​នៃ​ការ​មាន​កិច្ច​ព្រមព្រៀង​មួយ​ជាមួយ​ពួក​អ្នក​រៀបចំ​គោល​នយោបាយ​នៃ​រដ្ឋាភិបាល​ក្រុង​ប៉េកាំង​ដើម្បី​ប្រើប្រាស់​ភាគ​ខ្លះ​នៃ​ប្រាក់​បរទេស​បម្រុង​ដ៏​ច្រើន​លើសលប់​របស់​ប្រទេស​ចិន​ដើម្បី​ធ្វើ​វិនិយោគ​ក្នុង​មូលនិធិ​នេះ​ដែល​មាន​ទឹក​ប្រាក់​រាប់​ពាន់​លាន​ដុល្លារ។

លីប៊ី៖ ពួក​រដ្ឋមន្ត្រី​នៃ​អង្គការ​អូតង់​ដែល​ប្រជុំ​គ្នា​នៅ​ក្រុង Brussels នៅ​ថ្ងៃ​សុក្រ​នេះ​បាន​យល់​ព្រម​ដល់​សេចក្តី​សម្រេចចិត្ត​មួយ​ដែល​បញ្ចាប់​យុទ្ធនាការ​តាម​អាកាស​នៅ​ក្នុង​សប្តាហ័៍​ក្រោយ។​សេចក្តី​សម្រេចចិត្ត​នេះ​មាន​ទ្បើង​មួយ​ថ្ងៃ​ក្រោយ​ពី​ក្រុម​ប្រឹក្សា​សន្តិសុខ​អ.ស.ប​បាន​បោះឆ្នោត​លុប​ចោល​អណតិ្ត​របស់​ខ្លួន​ដែល​បាន​បង្កើត​បេសកកម្ម​នេះ។

ទុយនេស៊ី៖ នៅ​ថ្ងៃ​សុក្រ​នេះ​មាន​ការ​ធ្វើ​បាតុកម្ម​ថ្មីៗ​នៅ​ក្នុង​ក្រូង​ Sidi Bouzid នៃ​ប្រទេស​ទុយនេស៊ី​ មួយ​ថ្ងៃ​ក្រោយ​ពីពួក​បាតុករ​រាប់​រយ​នាក់​បានដើរ​ធ្វើ​បាតុកម្ម​ទៅ​កាន់​ទី​ស្នាក់ការ​ក្នុង​មូលដ្ឋាន​របស់​គណបក្ស​អ៊ីស្លាម​និយម Ennahdha។

ក្រុមមេធាវី​ការពារ​ក្ដី​នួន ​ជា ​បាន​ដាក់បណ្ដឹង​ប្រឆាំង​មន្រ្តី​រដ្ឋាភិបាល​មួយ​ចំនួន​ពី​ការ​ជ្រៀតជ្រែក​ផ្នែក​នយោបាយ​លើ​ដំណើរការ​សាលាក្ដី​ខ្មែរ​ក្រហម។

ព័ត៌មាននៅពេលមុននេះ៖

ព័ត៌មាន​អន្តរជាតិ៖ ២៨ តុលា
ព័ត៌មាន​អន្តរជាតិ៖ ២៨ តុលា

អ៊ឺរ៉ុប៖ ផ្សារហ៊ុន​ពិភពលោក ​បាន​ឡើង​ថ្លៃ​ខ្ពស់​នៅ​ថ្ងៃ​ព្រហស្បត៍​នេះ​ បន្ទាប់​ពី​សហភាព​អឺរ៉ុប​ បាន​អនុម័ត​ផែន​ការ​មួយ​ដើម្បី​កាត់​បន្ថយ​ប្រាក់​បំណុល​របស់​ប្រទេស​ ក្រិក​ ចំនួន​ពាក់​កណ្តាល​ និង​តម្លើង​ថវិកា​ជួយ​សង្គ្រោះ​យ៉ាង​ច្រើន ដើម្បី​ខ្ទប់វិបត្តិ​ប្រាក់​បំណុល​ក្នុង​តំបន់ដែល​ប្រើ​ប្រាក់​ អឺរ៉ូ​ (Euro)។

សរអា៖ សេដ្ឋកិច្ច​សរអា​បាន​លូត​លាស់​យ៉ាង​លឿន​នៅ​ក្នុង​ខែ​កក្កដា​ សីហា​ និងកញ្ញា​ ដោយ​សារ​អ្នក​ប្រើ​ប្រាស់​អាមេរិកាំង​បាន​ចំណាយ​ប្រាក់​ទិញ​អីវ៉ាន់​ច្រើន​ជាង​មុន។ សេចក្តី​រាយការណ៍​របស់​ក្រសួង​ពាណិជ្ជកម្ម​នៅ​ថ្ងៃ​ព្រហស្បត៍​នេះ​ និយាយ​ថា​សេដ្ឋកិច្ច​សរអា​បានកើនឡើង​ក្នុង​អត្រាប្រចាំ​ឆ្នាំ​ចំនួន ២.៥%​ នៅ​ក្នុង​ត្រី​មាស​ទី​បី។ នេះ​ជា​អត្រា​លូតលាស់​ខ្ពស់​បំផុត​នៅ​ក្នុង​ឆ្នាំ​នេះ ដែល​មាន​ចំនួន​លើស​ពី​ត្រី​មាស​ទី​ពីរ​យ៉ាង​ច្រើន​ក្រាស់​ក្រែល។

តួកគី៖ ក្រុម​អ្នក​ជួយ​សង្គ្រោះ​បាន​ទាញ​មនុស្ស​ម្នាក់​ចេញ​ពី​គំនរ​អគារ​ នៅ​ក្នុង​ទី​ក្រុង​ Ercis​ ប្រទេស​ តួរគី​ ក្នុង​ពេល​បូន​ថ្ងៃ​នៅ​ក្រោយ​ការ​រញ្ជួយ​ផែនដី​ដែល​មាន​កម្លាំង​ ៧.២​ លើ​ជញ្ជីញ​ រិកទ័រ​ ដែល​បាន​បំផ្លាញ​ប្រទេស​ តួរ​គី​ ភាគ​អាគ្នេយ៍​យ៉ាង​ខ្ទេច​ខ្ទាំ។​ តែ​សេចក្តី​សង្ឃឹម​ចំពោះ​ការ​រក​ឃើញ​មនុស្ស​នៅ​រស់​បាន​រលាយ​បន្តិច​ម្តងៗ នៅ​ពេលដែលធាតុ​អាកាស​ត្រជាក់​និង​ទឹក​កក​បាន​រារាំង​ដល់​កិច្ច​ខ្នះ​ខ្នែង​ជួយ​សង្គ្រោះកាល​ពី​ថ្ងៃ​ព្រហស្បត៍​នេះ​ នៅទី​ក្រុង​ Ercis​ ដែល​ត្រូវ​រង​គ្រោះ​ធ្ងន់​ជាង​គេ។

ប៉ាគិស្ថាន៖ ពួក​មន្រ្តី​ស៊ើបការណ៍​សំងាត់​ប៉ាគីស្ថាន​ និយាយ​ថា​ការ​វាយ​ប្រហារ​មួយ​ដែល​គេ​សង្ស័យ​ថា​ ដោយ​យន្ត​ហោះ​គ្មាន​មនុស្ស​បើក​របស់​សហរដ្ឋ​អាមេរិក​ បាន​សម្លាប់​ពួក​ជន​សកម្ម​ប្រយុទ្ធយ៉ាង​ហោច​ណាស់​ក៏​ ៥នាក់​ ដែល​មាន​ការ​ជាប់​ទាក់​ទង​ជា​មួយ​មេ​បញ្ជាការ​កំពូល​ តាលីបាន់​ ម្នាក់​ នៅ​ក្នុង​តំបន់​កុល​សម្ព័ន្ធ​ភាគ​ពាយ័ព្យ។

អាហ្វហ្កានិស្ថាន៖ មន្រ្តី​អាហ្វហ្កានិស្ថាន​ និយាយ​ថា​ ពួក​ បះបោរ​ តាលីបាន់​ បាន​វាយ​ប្រហារ​ទៅ​លើ​មូលដ្ឋាន​មួយ​របស់​សរអា​ នៅ​ក្នុង​ប្រទេស​ អាហ្វហ្កានិស្ថាន​ ភាគ​ខាង​ត្បូង។

ជន​សកម្មប្រយុទ្ធ​ប្រដាប់​អាវុធ​យ៉ាង​តិច​ ៣​ នាក់​ បាន​បាញ់​កាំភ្លើង​ទៅ​លើ​មូលដ្ឋាន​នោះ​ ចេញ​ពី​អគារ​ដែល​ស្ថិត​នៅ​ក្បែរ​នោះ​ នៅ​ទី​ក្រុង​ Kandahar​ កាល​ពី​ថ្ងៃ​ព្រហស្បត៍។​ ក្រសួង​មហា​ផ្ទៃ​និយាយ​ថា​ ក្រោយ​មក​កង​កម្លាំង​សន្តិសុខ​ បាន​បាញ់​សម្លាប់​ពួក​អ្នក​វាយ​ប្រហារ​ ២​នាក់។

លីប៊ី៖ ក្រុម​ប្រឹក្សា​សន្តិសុខ​អង្គការ​សហប្រជាជាតិ​ បាន​បោះ​ឆ្នោត​ជា​ឯកឆន្ទ​លើ​សេចក្តី​សម្រេច​ចិត្តមួយ​ដើម្បី​បញ្ចប់​ជាស្ថាពរ​បេសកម្ម​របស់​អង្គការ​ អូតង់​ នៅ​ក្នុង​ប្រទេស​លីប៊ី​ ទោះ​បី​មាន​ការ​អំពាវនាវ​មកពី​ពួក​មន្រ្តី​លីប៊ី​ឲ្យ​បន្ត​បេសកកម្ម​នោះ​ទៀត​ក៏ដោយ។

ក្រុម​ប្រឹក្សា​ ដែល​មាន​សមាជិក​ ១៥​ នាក់​បាន​និយាយ​នៅ​ថ្ងៃ​ព្រហស្បត៍​នេះ​ថា​ បេសកកម្ម​របស់​ អូតង់​ នឹង​ចប់​នៅ​ថ្ងៃ​ទី​ ៣១​ ខែ​តុលា​ខាង​មុខ​នេះ។

អ៊ីរ៉ាក់៖ ក្រុម​ប៉ូលិស​ប្រទេស​ អ៊ីរ៉ាក់​ និយាយ​ថា​ ការ​ផ្ទុះ​គ្រាប់​បែក​ពីរ​ផ្ទួន​គ្នា​ នៅ​ទី​ក្រុង​ បាកដាដ​ បាន​សម្លាប់​មនុស្ស​ ១៨​ នាក់​ និង​ធ្វើ​ឲ្យ​របួស​ យ៉ាង​តិច​ ៣៦​ នាក់។

ប៉ូលិស​និយាយ​ថា​ ការ​ផ្ទុះ​កាល​ពី​ថ្ងៃ​ព្រហស្បត៍​ ក្នុង​ពេល​ប៉ុន្មាន​នាទី​ដាច់​ពី​គ្នា​ បាន​កើត​ឡើង​នៅ​ក្នុង​សង្កាត់​របស់​ជន​ជាតិ​ Shi'ite នៅ​ក្នុង​រដ្ឋធានី​ បាកដាដ។​ គ្រាប់​បែក​ទី​ពីរ​បាន​ផ្ទុះ​ឡើង​នៅ​ពេល​ពួក​អ្នក​ជួយ​សង្គ្រោះ​កំពុង​ព្យាបាល​ពួក​អ្នក​រង​គ្រោះ​នៅ​ទី​កន្លែង​ដោយ​សារ​គ្រាប់​បែក​ទី​មួយ។​ មិន​ទាន់​មាន​អ្នក​ប្រកាស​ទទួល​ខុស​ត្រូវ​ចំពោះ​ការ​បំផ្ទុះ​ទាំង​ពីរ​នេះ​នៅ​ឡើយ​ទេ។

ថៃ៖ អ្នក​ស្រុក​នៅ​ក្រុង​ បាងកក​ នាំ​គ្នា​ដើរ​កាត់​ទឹក​ជំនន់​ខ្ពស់​ស្មើ​ដល់​ចង្កេះ​ ឬ​បើ​មិន​ដូច្នោះ​ទេ​ ជិះ​ទូក​តាម​ផ្លូវ​ក្នុង​ទី​ក្រុង​ កាល​ពី​ថ្ងៃ​ព្រហស្បត៍​នេះ​ ដៅយ​រំពឹង​ថា​នឹង​មាន​ទឹក​ជំនន់​ឡើង​ច្រើន​ទៀត​នៅ​ក្នុង​រាជ​ធានី​ប្រទេស​ថៃ៕

XS
SM
MD
LG