ហ្សកដង់៖ កាលពីថ្ងៃសុក្រ ក្រុមបាតុករលម្អៀងទៅខាងការកែទម្រង់ក្នុងប្រទេស ហ្សកដង់បានប៉ះទង្គិចជាមួយពួកប៉ូលិស និងពួកអ្នកគាំទ្ររដ្ឋាភិបាល។
លីប៊ី៖ ប្រទេសជាង៣០ ដោយមានរួមបញ្ចូលទាំងស.រ.អ.ផងដែរ និយាយថាពួកគេទទួលស្គាល់ក្រុមប្រឹក្សាជាតិអន្តរកាលដែលជាក្រុមឧទ្ទាមនៃប្រទេសលីប៊ី ដោយប្រកាសថាមេដឹកនាំលីប៊ី Moammar Gadhafi លែងមានអំណាចត្រឹមត្រូវតាមច្បាប់លើប្រទេសនេះក្នុងផ្នែកខាងជើងនៃទ្វីបអាហ្វ្រិកទៀតហើយ។
ស៊ីរី៖ មានមនុស្សយ៉ាងតិចណាស់១៩នាក់បានស្លាប់ក្រោយពីកងកម្លាំងសន្តិសុខស៊ីរីបានបាញ់កាំភ្លើងទៅលើក្រុមបាតុករនៅក្នុងការតវ៉ាធំៗខ្លះរហូតមកដល់ពេលនេះប្រឆាំងនឹងរដ្ឋាភិបាលរបស់ប្រធានាធិបតី Bashar al-Assad។
ទុយនេស្ស៊ី៖ ពួកប៉ូលីសទុយនេស្ស៊ី បានបាញ់គ្រាប់បែកផ្សែងកាលពីថ្ងៃសុក្រដាក់ក្រុមបាតុករដែលតវ៉ាអំពីអ្វីដែលពួកគេយល់ឃើញថាជាល្បឿនដ៏យឺតនៃការកែទម្រង់របស់រដ្ឋាភិបាល។
សរអ៖ កាលពីថ្ងៃសុក្រ លោកប្រធានាធិបតីបារ៉ាក់ អូបាម៉ានិងពួកសាធារណរដ្ឋជាពួកប្រឆាំងបានអំពាវនាវដល់គ្នាទៅវិញទៅមកឱ្យផ្តល់ផែនការ «ហ្មត់ចត់» ដើម្បីដោះស្រាយបញ្ហាហិរញ្ញវត្ថុរបស់ប្រទេសជាតិ។
យែម៉ែន៖ មានមនុស្សយ៉ាងតិចណាស់១០នាក់បានត្រូវសម្លាប់ក្នុងប្រទេស យែម៉ែន នៅក្រោយការប៉ះទង្គិចគ្នារវាងកងកម្លាំងសន្តិសុខនិងពួកកុលសម្ព័ន្ធប្រឆាំង នៅពេលដែលមនុស្សរាប់ពាន់នាក់បានធ្វើការប្រជុំមហាជនកាលពីថ្ងៃសុក្រប្រឆាំងនឹងប្រធានាធិបតី Ali Abdullah Saleh។
អេហ្ស៊ីប៖ ប្រជារាស្ត្រអេហ្ស៊ីបរាប់ពាន់នាក់បានពុះពារធាតុអាកាសក្តៅខ្លាំងដើម្បីធ្វើការប្រជុំមហាជនក្នុងទីលានតារៀក្នុងក្រុង Le Caire ដែលនៅទីនោះពួកគេបានជំរុញរដ្ឋាភិបាលបណ្តោះអាសន្នឱ្យពន្លឿនការកែទម្រង់។
ឥណ្ឌា៖ រដ្ឋលេខាធិការក្រសួងមហាផ្ទៃប្រទេសឥណ្ឌា បាននិយាយថាពួកអ្នកស៊ើបអង្កេតកំពុងពិនិត្យមើលភ័ស្តុតាងផ្នែកកោសល្យវិច័យ និងវីដេអូឃ្លាំមើលពេលដែលពួកគេស្វែងរកតម្រុយអំពីការផ្ទុះគ្រាប់បែកដ៏ប្រល័យនៅក្នុងក្រុងមុមបៃ នៅពេលថ្មីៗនេះ។
