ភ្ជាប់​ទៅ​គេហទំព័រ​ទាក់ទង

ព័ត៌មាន​អន្តរជាតិ​សង្ខេប៖ ៦ សីហា


នាយករដ្ឋមន្ត្រី​ថ្មី​ប្រទេស​ថៃ យីងឡាក់ ស៊ីណាវ៉ាត្រា សំពះ​បែប​ប្រពៃណី​ថៃ នៅ​រដ្ឋសភាក្រុងបាងកក ថ្ងៃទី៥ សីហា ២០១១

ថៃ៖ សភា​ថៃ​បាន​បោះឆ្នោត​ជ្រើសរើស​លោកស្រី​ យីងឡាក់ ស៊ីណាវ៉ាត្រា​ ជា​នាយក​រដ្ឋមន្រ្តី​ស្រី​លើក​ដំបូង​សម្រាប់​ប្រទេស​នេះកាលពី​ថ្ងៃ​សុក្រ​ មិនដល់​១ខែ​បន្ទាប់​ពី​គណបក្ស​របស់​លោក​ស្រី​បានទទួល​ជ័យជំនះ​ដ៏ច្រើន​លើសលុបក្នុង​ការបោះឆ្នោត​កាលពី​ថ្ងៃ​ទី​៣​ ខែ​កក្កដា។ សភា​ជាន់ទាប​បាន​បោះឆ្នោត​២៩៦​សំឡេង​ទល់នឹង​៣​សំឡេង ​ដើម្បី​គាំទ្រ​លោក​ស្រី ដោយ​មាន​សមាជិក​សភា​១៩៧​នាក់​បាន​បោះឆ្នោត​អនុប្បវាទ។ លោកស្រី​យីងឡាក់​ អាយុ​៤៤​ឆ្នាំ​រូប​នេះ​បាន​ចាប់ផ្តើម​អាជីព​នយោបាយ​កាលពី​ខែ​កក្កដា​ គឺ​ជា​ប្អូនស្រី​របស់​អតីត​នាយក​រដ្ឋមន្រ្តី​ ថាក់ស៊ីន ស៊ីណាវ៉ាត្រា។

ស៊ីរី៖ ជនជាតិ​ស៊ីរី រាប់​ម៉ឺន​នាក់បាន​ធ្វើ​បាតុកម្ម​ប្រឆាំង​រដ្ឋាភិបាល​ នៅពេល​ដែល​កម្លាំង​សន្តិសុខ​បាន​ពង្រីក​ការ​បង្ក្រាប​របស់​ខ្លួនលើ​ពួក​ប្រឆាំង។

លីប៊ី​៖ រដ្ឋាភិបាល​លីប៊ី​បាន​ច្រានចោល​ការ​អះអាង​របស់​ពួកឧទ្ទាម​ថា ​កូនប្រុ​ស​ម្នាក់​របស់​ Moammar​ Gadhafi បាន​ត្រូវ​សម្លាប់​នៅក្នុង​ការ​វាយប្រហារ​តាម​អាកាស​របស់​អង្គការ​អូតង់។

សេដ្ឋកិច្ច​សកលលោក​៖ ផ្សារ​ភាគហ៊ុន​នៅទូទាំង​សកលលោក​បាន​បន្ត​ធ្លាក់ចុះ​កាលពី​ថ្ងៃ​សុក្រ ​នៅពេល​មាន​ការភ័យខ្លាច​កាន់តែ​ខ្លាំងឡើងថា​សេដ្ឋកិច្ច​សកលលោក​ធ្លាក់ចូល​ក្នុងការ​មិនរីក​ចម្រើន​ថ្មី​មួយ​ទៀត។

សហរដ្ឋ​អាមេរិក៖ សេដ្ឋកិច្ច​សហរដ្ឋ​អាមេរិក​ បាន​បង្កើន​ការងារចំនួន​១សែន​១ម៉ឺន​៧ពាន់​ កាលពី​ខែ​កក្កដា​ ហើយ​អត្រា​អត់​ការងារ​ធ្វើ​បាន​ធ្លាក់ចុះ​បន្តិច​មកត្រឹម​៩,​១​ភាគរយ។

អឺរ៉ុប៖ ស្នងការ​ជាន់ខ្ពស់​សេដ្ឋកិច្ច​សហភាព​អឺរ៉ុប​និយាយ​ថា ​ទាំង​ប្រទេស​អ៊ីតាលី ​និង​អេស៉្បាញ​ នឹង​មិន​ត្រូវការ​ប្រាក់​សង្គ្រោះ​សេដ្ឋកិច្ច​អន្តរជាតិ ​ដើម្បី​ដោះស្រាយ​សេដ្ឋកិច្ច​របស់ខ្លួន​ទេ។

អេត្យូពី​៖ ប្រធាន​អង្គការ​កម្មវិធី​ស្បៀង​អាហារ​ពិភពលោក​ក្នុង​ប្រទេស​អេត្យូពី​និយាយ​ថា ម្ហូប​អាហារ​ដែលស្តុកទុក​ក្នុង​គ្រាអាសន្ន​របស់​ប្រទេស​នោះ​ជិតអស់​ហើយ ដែល​ជា​បញ្ហា​ថ្មីៗ​បំផុត​ដែល​បណ្តាល​មកពី​ការរាំងស្ងួត​ក្នុង​តំបន់​អាហ្វ្រិក​ខាង​កើត​។

ស៊ូដង់៖ អ្នកនាំពាក្យ​អង្គការ​សហប្រជាជាតិ​និយាយ​ថា ​កងថែ​រក្សាសន្តិភាព​ម្នាក់​របស់​អង្គការ​សហប្រជាជាតិ​បាន​ត្រូវ​សម្លាប់​ ហើយ​ម្នាក់​ទៀត​រងរបួស​យ៉ាង​ខ្លាំង​កាល​ពីថ្ងៃ​សុក្រ ​នៅ​ពេល​ដែល​រថយន្ត​របស់​ពួកគេ​បាន​រងការ​វាយ​ប្រហារ​ក្នុងតំបន់​ Darfur ​នៃ​ប្រទេស​ស៊ូដង់។

អាហ្វហ្គានីស្ថាន៖ បាតុ​កម្ម​ប្រឆាំង​អង្គការ​អូតង់​ក្នុង​ខេត្ត​ Zabul​ ខាងត្បូង​ប្រទេស​បាន​ក្លាយ​ទៅ​ជា​ហិង្សា​កាលពី​ថ្ងៃ​សុក្រ​ ពេល​ដែល​ជនស៊ីវិល​អាហ្វហ្គានីស្ថាន៣​នាក់ ​និង​មន្រ្តី​ប៉ូលីស​ម្នាក់​បាន​ត្រូវ​គេ​បាញ់​សម្លាប់។

ឥណ្ឌា៖ អ្នក​នយោបាយ​ដ៏​មាន​អំណាច​បំផុត​ម្នាក់​របស់​ប្រទេស​ឥណ្ឌា​ត្រូវ​បានគេ​និយាយ​ថា ​កំពុង​ជា​សះស្បើយ​ឡើងវិញ​ពី​ការវះកាត់​នៅបរទេស។

ឥណ្ឌា៖ ឥណ្ឌា​ឲ្យដឹង​ថា​ខ្លួន​មាន​ផែនការ​ស្ថាបនា​ផ្លូវ​ថ្នល់ ​និង​ផ្លូវ​រទេះភ្លើង​ថ្មី ​ដើម្បី​តទល់​ការ​ស្ថាបនា​ហេដ្ឋារចនា​សម្ព័ន្ធ​របស់​ចិន​នៅ​តាម​បណ្តោយ​ព្រំដែន​មាន​ជម្លោះ​រវាង​ប្រទេស​ទាំង​ពីរ។

XS
SM
MD
LG