ភ្ជាប់​ទៅ​គេហទំព័រ​ទាក់ទង

ព័ត៌មាន​អន្តរជាតិ​វីអូអេ​ ១៩ ធ្នូ យប់


ពលរដ្ឋ​កូរ៉េ​ខាង​ត្បូង​អាន​​ព័ត៌មាន​អំពី​​មរណភាព​របស់​មេដឹកនាំ​កូរ៉េ​ខាង​ត្បូង គឹម ជុងអ៊ីល នៅ​ឯ​ស្ថានីយ៍​រថភ្លើង​មួយ​កន្លែង​ក្នុង​ទី​ក្រុង​សេអ៊ូល​កាល​ពី​ថ្ងៃ​ច័ន្ទ​ទី​១៩​ខែ​ធ្នូ​នេះ។ ចំណង​ជើង​ជា​អក្សរ​កូរ៉េ​នេះ​សរសេរ​ថា​«មរណភាព​របស់​មេដឹកនាំ​កូរ៉េ​ខាង​ជើង

កូរ៉េ​ខាង​ជើង៖ លោក គីម ជុងអ៊ីល (Kim Jong Il) មេដឹកនាំ​យូរយារ​មក​ហើយ​នៃ​ប្រទេស​កូរ៉េ​ខាង​ជើង ទើប​ទទួល​អនិច្ចកម្ម។ ទីភ្នាក់ងារ​ព័ត៌មាន​កណ្តាល​កូរ៉េ​ជា​ផ្លូវការ​នៃ​ប្រទេស​កូរ៉េ​ខាង​ជើង​បាន​រាយការណ៍​នៅ​ថ្ងៃ​ច័ន្ទ​នេះ​ថា​មេដឹកនាំ​អាយុ​៦៩​ឆ្នាំ​រូប​នេះ​បាន​ស្លាប់​កាល​ពី​ថ្ងៃ​សៅរ៍​ដោយ​គាំង​បេះដូង​នៅ​ពេល​លោក​ឋិត​នៅ​ក្នុង​រថភ្លើង​មួយ​ ដែល​ជា​ការ​ធ្វើ​ដំណើរ​របស់​លោក​ដើម្បី​«ធ្វើ​ការ​ណែនាំ​នៅ​នឹង​កន្លែង»។ ​ទីភ្នាក់ងារ​ព័ត៌មាន​នេះ​បាន​សន្មត់​ថា​មរណភាព​របស់​លោក​បាន​បណ្តាល​មក​ពី​«ការ​ធ្វើ​ការ​ហួស​កម្លាំង​កាយ​និង​កម្លាំង​ចិត្ត»។​

កូរ៉េ​ខាង​ជើង៖ ដំណឹង​អំពី​មរណភាព​របស់​លោកមេដឹកនាំ​កូរ៉េ​ខាង​ជើង​ គីម ជុងអ៊ីល (Kim Jong Il) បាន​នាំ​ឱ្យ​មាន​ប្រតិកម្ម​នៅ​ទូទាំង​ពិភពលោក។​ នៅ​ក្នុង​រដ្ឋធានី​វ៉ាស៊ីនតោន​ គេ​បាន​ជម្រាប​លោក​ប្រធានាធិបតី​បារ៉ាក់​អូបាម៉ា និង​លោកស្រី​រដ្ឋមន្ត្រី​ការ​បរទេស​ Hillary Clinton អំពី​មរណភាព​របស់​មេដឹកនាំ​កូរ៉េខាង​ជើង​រូប​នេះ​ហើយ។

កូរ៉េ​ខាងជើង៖ លោក​ គីម ជុងអ៊ីល (Kim Jong Il) បាន​គ្រប់គ្រង​ប្រទេស​កូរ៉េ​ខាង​ជើង​១៧​ឆ្នាំ​ដោយ​ផ្តោត​ការ​យក​ចិត្ត​ទុក​ដាក់​លើ​គោលការណ៍​នៃ​ការ​ពឹងពាក់​លើ​ខ្លួន​ឯង​ និង​លទ្ធិ​បុគ្គលនិយម​ដែល​បាន​ត្រូវ​បង្កើត​ទ្បើង​ដោយ​លោក គីម អ៊ីលស៊ុង (Kim Il Sung) ដែល​ជា​ឪពុក​លោក។​ លោក​បាន​ទទួល​បរិញ្ញប័ត្រ​ពី​សាកលវិទ្យាល័​យ​ Kim IL Sung នៃក្រុង​ព្យុងយ៉ាង (Pyongyang) កាល​ពី​ឆ្នាំ​១៩៦៤។ នៅ​ក្នុង​ទសវត្សរ៍​ឆ្នាំ​១៩៧០ លោក​ Kim Jong Il បាន​ត្រូវ​តែងតាំង​ឱ្យ​កាន់​តំណែង​ជា​មេដឹកនាំ​នៅ​ក្នុង​គណបក្ស​គ្រប់​គ្រង​ប្រទេស​ដោយ​ចាប់​ផ្តើម​រយៈពេល​២​ទសវត្សរ៍ ​ដែល​នោះ​លោក​បាន​ហ្វឹកហ្វឺន​ការងារ​សម្រាប់​ជំនួស​ឪពុក​លោក​ជា​មេដឹកនាំ​របស់​ប្រទស​កូរ៉េខាង​ជើង។​

រុស្ស៊ី៖ គេ​បាន​រក​ឃើញ​ទូក​កៅស៊ូ​មួយ​នៅ​ថ្ងៃ​ច័ន្ទ​នេះ​ក្នុង​ទឹក​ត្រជាក់​ដូច​ទឹកកក​នៅ​ជិត​សំណង់​សម្រាប់​ខួង និង​បូម​ប្រេង​រុស្ស៊ី​មួយ​ដែល​បាន​ក្រទ្បាប់។​ ទូក​កៅស៊ូ​នេះ​អាច ដាក់​មនុស្ស​បាន​១៥​នាក់។ ​ពួក​អ្នក​ជួយ​សង្គ្រោះ​មិន​អាច​បញ្ជាក់​បាន​ជា​បន្ទាន់​ថា​តើ​មាន​មនុស្ស​នៅ​រស់​ក្នុង​ទូក​នេះ​ឬ​ទេ។

អាហ្វហ្គានីស្ថាន៖ អង្គការ​អូតង់​និយាយ​ថា​ខ្លួន​នឹង​បន្ត​ធ្វើការ​ឆ្មក់​វាយ​ប្រហារ​នៅ​ពេល​យប់​ក្នុង​ប្រទេសអាហ្វហ្គានីស្ថានទោះណា​ជា​មាន​ការ​ជំទាស់​ជា​ថ្មី​ដោយ​ប្រធានាធិបតី​នៃ​ប្រទេស​នេះ​ក៏​ដោយ។​ លោក​ឧត្តមសេនិយ៍​ត្រី​ Carsten Jacobson អ្នក​នាំ​ពាក្យ​នៃ​អង្គការ​អូតង់​បាន​និយាយ​នៅ​ថ្ងៃ​ច័ន្ទ​នេះ​ថា ការ​ឆ្មក់​វាយ​ប្រហារ​នៅ​ពេល​យប់នៅ​តែ​ជា​វិធី​មាន​សុវត្ថិភាព​បំផុត​ដើម្បី​កម្ចាត់​ពួក​មេដឹកនាំ​បះបោរ។

XS
SM
MD
LG