ក្រុមឧទ្ទាមដ៏សំខាន់មួយនៃប្រទេសស៊ីរី បានដកខ្លួនចេញពីការចរចារបស់ក្រុមប្រឆាំងដែលមានគោលបំណងបង្កើតរណសិរ្សរួបរួមគ្នាមួយមុនធ្វើការពិភាក្សាដ៏ធំមួយជាមួយរដ្ឋាភិបាលស៊ីរី។
ក្រុម Ahrar al-Sham បាននិយាយថា ខ្លួនដកខ្លួនចេញកាលពីថ្ងៃព្រហស្បតិ៍ដើម្បីតវ៉ាប្រឆាំងពីតួនាទីដែលបានផ្តល់ទៅឲ្យក្រុមផ្សេងៗទៀតដែលខ្លួនគិតថា មានការជិតស្និទ្ធទៅនឹងរដ្ឋាភិបាលរបស់ប្រធានាធិបតី Bashar a- Assad។
ក្រុម Ahra al-Sham ជាក្រុមអភិរក្សនិយមមួយដែលគាំទ្រដោយប្រទេសអារ៉ាប៊ីសាអូឌីតដែលប្រតិបត្តិការនៅក្នុងតំបន់ខាងជើងនៃប្រទេសស៊ីរី បានដកខ្លួនចេញពីសន្និសីទដែលមានរយៈពេល២ថ្ងៃនៅក្នុងរាជធានីរីយ៉ាដ (Riyadh)។
កាលពីព្រឹកថ្ងៃព្រហស្បតិ៍ លោករដ្ឋមន្រ្តីការបរទេសសហរដ្ឋអាមេរិក John Kerry បានមានប្រសាសន៍ថា សន្និសីទនោះបានបង្ហាញពីស្ថាបនាគ្នា ក៏ប៉ុន្តែវាលឿនពេកក្នុងការកំណត់ការចរចាសន្តិភាពថ្មីមួយទៀតនោះ។ លោករដ្ឋមន្រ្តីការបរទេសអាមេរិក Kerryបានធ្វើកំណត់សម្គាល់នៅខាងក្រៅសន្និសីទកំពូលស្តីពីការផ្លាស់ប្តូរអាកាសធាតុរបស់អង្គការសហប្រជាជាតិនៅក្នុងទីក្រុងប៉ារីស។
លោករដ្ឋមន្រ្តីការបរទេសអាមេរិកាំង Kerry បានប្រាប់ក្រុមអ្នកយកព័ត៌មានថា ផែនការកំពុងធ្វើឡើងសម្រាប់សន្និសីទដ៏ធំមួយនៅក្នុងទីក្រុងញូវយ៉កនៅក្រោមការត្រួតពិនិត្យរបស់អង្គការសហប្រជាជាតិ។ លោករដ្ឋមន្រ្តីការបរទេសអាមេរិកបានមានប្រសាសន៍ថា «ការចរចាមិនទាន់ជាប់គាំងនៅឡើយទេ ក៏ប៉ុន្តែជំនួបនៅក្នុងប្រទេសអារ៉ាប៊ីសាអូឌីតនោះ ទំនងជាការស្ថាបនាមួយនៅពេលនេះ ហើយយើងត្រូវតែរង់ចាំលទ្ធផលនៃសន្និសីទនោះ»។
ជំនួបនៅក្នុងរាជធានីរីយ៉ាដរួមមានអ្នកតំណាងមកពីក្រុមចម្រុះជាតិស៊ីរីដែលគាំទ្រដោយប្រទេសលោកខាងលិច ហើយនិងក្រុមបះបោរឥស្លាមខ្លះ។
ផែនការសន្តិភាពមួយដែលបានព្រមព្រៀងកាលពីខែមុនដោយប្រទេស២០នៅក្នុងទីក្រុងវីយ៉ែនបានកំណត់ថ្ងៃទី១ ខែមករាសម្រាប់ការចាប់ផ្តើមការចរចារវាងក្រុមឧទ្ទាមនិងរដ្ឋាភិបាល Assad៕
