ក្រុមអ្នកគាំទ្រលោក កឹម សុខា នៅថ្ងៃចន្ទនេះ បានច្រានចោលការប្រកាសតែងតាំងអតីតប្រធានបក្សជំទាស់ ដែលនិរទេសខ្លួន គឺលោក សម រង្ស៊ី ជាប្រធានស្តីទីរបស់គណបក្សសង្គ្រោះជាតិ។នេះបើតាមសេចក្តីថ្លែងការណ៍ដែលត្រូវបានផ្សព្វផ្សាយលើបណ្តាញសង្គមហ្វេសប៊ុករបស់អ្នកគាំទ្រ លោក កឹម សុខា។
នៅថ្ងៃទី២ ខែធ្នូ ឆ្នាំ២០១៨ ក្រុមតំណាងគណបក្សសង្គ្រោះជាតិដែលស្និទ្ធនឹងលោក សម រង្ស៊ី នៅតាមបណ្តាប្រទេសមួយចំនួន បានជួបជុំគ្នាធ្វើសន្និសីទពិភពលោកមួយនៅទីក្រុងអាត្លង់តា រដ្ឋ Georgia សហរដ្ឋអាមេរិក។ ក្នុងសន្និសីទនោះ លោក សម រង្ស៊ី អតីតប្រធានគណបក្ស និងជាប្រធានចលនាសង្គ្រោះជាតិ បានប្រកាសទទួលយកឋាន:ជាប្រធានស្តីទីគណបក្សសង្គ្រោះជាតិក្នុងពេលដែលលោក កឹម សុខា នៅជាប់ឃុំឃាំងក្នុងគេហដ្ឋាន ទៅតាមការស្នើរបស់តំណាងដែលចូលរួមសន្និសីទពិភពលោកនោះ។
លោក សម រង្ស៊ី បានផ្តល់សម្ភាសន៍ដល់ VOA Khmer ក្រោយបញ្ចប់សន្និសីទនាថ្ងៃទី២ ធ្នូនោះ ដោយលើកឡើងថា ការយល់ព្រមទទួលយកឋានៈជាប្រធានស្តីទីគណបក្សសង្គ្រោះជាតិ គឺដើម្បីបង្រួបបង្រួម និងធ្វើឲ្យគណបក្សសង្គ្រោះជាតិមានក្បាលម៉ាស៊ីនក្នុងការដឹកនាំ។ លោកបន្ថែមថា ឋានៈជាប្រធានស្តីទីគណបក្សនេះនឹងត្រូវបញ្ចប់ នៅពេលដែលលោក កឹម សុខា ទទួលបានសេរីភាពពេញលេញ។
លោកបញ្ជាក់ថា៖
«ពេលណាលោក កឹម សុខា មានសេរីភាពពេញលេញ មកដើរតួនាទីជាប្រធានពេញលេញដែរ តួនាទីរបស់ខ្ញុំជាប្រធានស្តីទីរបស់ខ្ញុំចប់ត្រឹមហ្នឹង។ ហើយទី៣ គឺស្មារតីនៃការបំពេញតួនាទីខ្ញុំបណ្តោះអាសន្ននេះ គឺស្មារតីបង្រួបបង្រួម មិនមែនសម្រាប់ក្រុមនេះក្រុមនោះទេ គឺសម្រាប់គណបក្សសង្គ្រោះជាតិទាំងមូល ហើយជានិមិត្តរូប គឺពាក្យស្លោក សម រង្ស៊ី និងកឹម សុខា គឺជាមនុស្សតែមួយ»។
នៅមុនបន្តិចនៃការប្រកាសថា លោក សម រង្ស៊ី ត្រូវធ្វើជាប្រធានស្តីទីគណបក្សសង្រ្គោះជាតិ លោក កឹម សុខា ប្រធានបច្ចុប្បន្នដែលកំពុងស្ថិតក្នុងការឃុំឃាំងក្នុងផ្ទះ បានបញ្ជាក់ជាថ្មីតាមរយៈមេធាវីរបស់លោកថា លោកមិនទទួលដឹងឮ មិនគាំទ្រការរៀបចំណាមួយក្នុងសន្និសីទដែលរៀបចំដោយក្រុមគណបក្សសង្គ្រោះជាតិ នៅសហរដ្ឋអាមេរិកនោះទេ។
លោក កឹម សុខា បានបង្ហោះសារលើទំព័រហ្វេសប៊ុករបស់លោកថា លោកបានប្រគល់សិទ្ធិឲ្យមេធាវីការពារក្តីរបស់លោក ក្នុងការនាំពាក្យ និងការបង្ហាញពីឆន្ទៈរបស់លោក តាមរយៈមេធាវីទៅតាមបញ្ញត្តិច្បាប់។
ក្នុងសេចក្តីថ្លែងការណ៍មួយរបស់ក្រុមមេធាវីការពារក្តីឲ្យលោក កឹម សុខា ចេញនៅថ្ងៃទី២ ខែធ្នូ ឆ្នាំ២០១៨ បញ្ជាក់ក្នុងន័យដើមថា៖
«ជាថ្មីម្តងទៀត នៅថ្ងៃទី២ ខែធ្នូ ឆ្នាំ២០១៨ ចំពោះមុខសហមេធាវីការពារក្តី ឯកឧត្តម កឹម សុខា នៅតែរក្សាជំហរដដែលគឺគាត់មិនទទួលដឹងឮ និងមិនគាំទ្រនូវការរៀបចំ និងការសម្រេចណាមួយនៃសន្និសីទថ្ងៃទី១ ទី២ ខែធ្នូ ឆ្នាំ២០១៨ នៅទីក្រុងអាត្លង់តា សហរដ្ឋអាមេរិក របស់ក្រុមគាំទ្រឯកឧត្តម សម រង្ស៊ី ប្រធានចលនាសង្គ្រោះជាតិនោះទេ»។
ចំណែកក្រុមមន្រ្តីគណបក្សសង្រ្គោះជាតិមួយចំនួនដែលមានទំនោរគាំទ្រលោក កឹម សុខា ទាំងក្នុងនិងក្រៅប្រទេស ក៏បានបង្ហាញការមិនពេញចិត្តទៅនឹងការធ្វើសន្និសីទពិភពលោករបស់មន្រ្តីបក្សប្រឆាំងដែលស្និទ្ធនឹងលោក សម រង្ស៊ី ហើយថា ទង្វើនេះអាចនឹងបំផ្លាញគណបក្សសង្គ្រោះជាតិ។
ពាក់ព័ន្ធនឹងការប្រកាសរបស់លោក កឹម សុខា មិនគាំទ្រសន្និសីទពិភពលោកនោះ លោក សម រង្ស៊ី អះអាងថា លោក កឹម សុខា កំពុងស្ថិតក្នុងសម្ពាធនៃការគំរាមកំហែងរបស់រដ្ឋាភិបាលលោក ហ៊ុន សែន ដូច្នេះលោកថា ការលើកឡើងណាមួយរបស់លោក កឹម សុខា គឺមិនអាចចាត់ទុកថាបានការនោះទេ។
ក្រោយការបញ្ចប់សន្និសីទនោះគេឃើញសេចក្តីថ្លែងការណ៍មួយ ដែលប្រឆំាងនឹងការតែងតាំង លោក សម រង្ស៊ី ជាប្រធានស្តីទីបក្សសង្គ្រោះជាតិ ត្រូវបានចែករំលែកតាមបណ្តាញសង្គមហ្វេសប៊ុករបស់ក្រុមអ្នកគាំទ្រ លោក កឹម សុខា។
សេចក្តីថ្លែងការណ៍បង្ហោះដោយមន្រ្តីគណបក្សសង្គ្រោះជាតិមួយចំនួន ដូចជាលោក ហ៊ីង សុខសាន្ត អតីតប្រធានក្រុមយុវជនសង្គ្រោះជាតិ បានអះអាងថាជាសេចក្តីថ្លែងការណ៍របស់គណបក្សសង្គ្រោះជាតិដែលបញ្ជាក់ថា ការសម្រេចរបស់សន្និសីទ នៅថ្ងៃទី២ ខែធ្នូ ដោយក្រុមគាំទ្រលោក សម រង្ស៊ី ធ្វើជាប្រធានស្តីទីគណបក្សសង្គ្រោះជាតិ គឺផ្ទុយទាំងស្រុងពីលក្ខន្តិកៈ គណបក្សសង្រ្គោះជាតិ និងមិនអាចយកជាការបានជាដាច់ខាត។
ក្នុងសេចក្តីថ្លែងការណ៍ដដែលដែលចេញផ្សាយនៅថ្ងៃចន្ទនេះបញ្ជាក់ក្នុងន័យដើមថា៖
«អ្នកចូលរួមក្នុងសេចក្តីសម្រេចនេះមិនមាននីតិសម្បទា ដែលមានសិទ្ធិជាអ្នកស្នើ ឬអ្នកសម្រេចជ្រើសរើស ឬជ្រើសតាំងប្រធានស្តីទីគណបក្សឡើយ។ ដូច្នេះសេចក្តីសម្រេចនេះគ្រាន់តែជាមតិយោបល់របស់មនុស្សមួយក្រុមប៉ុណ្ណោះ»។
យ៉ាងណាក៏ដោយមិនទាន់មានការបញ្ជាក់ជាថ្មីបន្ថែមទៀតចំពោះជំហររបស់លោក កឹម សុខា នៅក្រោយការប្រកាសទទួលរបស់លោក សម រង្ស៊ី ជាប្រធានស្តីទីគណបក្សសង្រ្គោះជាតិនោះទេ។
លោក ផែង ហេង មេធាវីការពារក្តីឱ្យ លោក កឹម សុខា បញ្ជាក់ថាលោក មិនទាន់ជួបលោក កឹម សុខា នៅឡើយនោះទេ ចាប់តាំងពីការជួបគ្នាដើម្បីបញ្ជាក់ជំហរចុងក្រោយរបស់លោក កឹម សុខា កាលពីថ្ងៃអាទិត្យនោះ។
ភាពចម្រូងចម្រាសក្នុងការធ្វើសន្និសីទជ្រើសរើសលោក សម រង្ស៊ី ធ្វើជាប្រធានស្តីទីគណបក្សសង្គ្រោះជាតិ ស្របពេលដែលលោក កឹម សុខា ប្រកាសមិនគាំទ្រ កំពុងធ្វើឲ្យមានការលើកឡើងថា គណបក្សប្រឆាំងដែលត្រូវបានតុលាការកំពូលរំលាយចោលនេះ កំពុងឈានទៅរកភាពបែកបាក់យ៉ាងធ្ងន់ធ្ងរ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាប្រាប់អ្នកសារព័ត៌មានតាមរយៈសារអេឡិចត្រូនិចតេឡេក្រាមនាថ្ងៃចន្ទនេះថា ការប្រើមធ្យោបាយណាមួយក៏ដោយ ក៏មិនអាចធ្វើឲ្យគណបក្សសង្គ្រោះជាតិរស់ឡើងវិញបានដែរ។
លោកសរសេរបន្ថែមក្នុងន័យដើមថា៖
«អតីតបក្សប្រឆាំងនៅកម្ពុជា ត្រូវបានតុលាការកំពូលសម្រេចរំលាយចោលតាំងពីខែវិច្ឆិកា ឆ្នាំ២០១៧មកម៉្លេះ ដោយសារទង្វើល្មើសច្បាប់ធ្ងន់ធ្ងរ។ ម៉្យាងទៀតទណ្ឌិត សម រង្សី ដែលជាអតីតមេបក្សប្រឆាំងនេះក៏បានលាលែងពីសមាជិកបក្ស និងពីប្រធានបក្សជាយូររួចហើយដែរ។ ដូច្នេះឧបាយកលប៉ុនប៉ងចង់ធ្វើឲ្យខ្មោចអតីតបក្សប្រឆាំងនេះរស់ឡើងវិញ គឺមិនអាចទៅរួចទាល់តែសោះ។ ហើយឧបាយកលចង់ប្រោសព្រំយកទណ្ឌិត សម រង្សី មកដឹកនាំអតីតបក្សនេះក៏អត់បានការដែរ»។
លោក ឡៅ ម៉ុងហៃ អ្នកវិភាគនយោបាយ និងជាអតីតអ្នកផ្តល់ប្រឹក្សាដល់លោក កឹម សុខា ប្រាប់ VOA ថាក្រុមអ្នកគាំទ្រលោក សម រង្ស៊ី និងក្រុមអ្នកគាំទ្រលោក កឹម សុខា គួរតែរួមគ្នាពង្រឹងគណបក្សជាជាងការគាំទ្របុគ្គលម្នាក់ៗ។
លោកមានប្រសាសន៍ថា៖
«មានការមូលមាត់គ្នាឲ្យច្រើន ហើយគឺការប្រើប្រាស់មនុស្សដើម្បីធ្វើសកម្មភាព ឬតាមសមត្ថភាព កុំយកតាមជំនឿផ្កាប់មុខទោលើបុគ្គលជាមេដឹកនាំអីហ្នឹង»។
គណបក្សសង្គ្រោះជាតិត្រូវបានតុលាការកំពូលរំលាយកាលពីថ្ងៃទី១៦ ខែវិច្ឆិកា ឆ្នាំ២០១៧ ទៅតាមបណ្តឹងរបស់ក្រសួងមហាផ្ទៃ។ គណបក្សជំទាស់នេះបានរងការចោទប្រកាន់ថា ឃុបឃិតជាមួយបរទេស រៀបចំគម្រោងផ្តួលរំលំរដ្ឋាភិបាលដែលដឹកនាំដោយលោកនាយករដ្ឋមន្រ្តី ហ៊ុន សែន។ ក្នុងថ្ងៃជាមួយគ្នានោះ តុលាការកំពូលក៏បានព្យួរសិទ្ធិរបស់មន្រ្តីគណបក្សប្រឆាំងចំនួន១១៨នាក់ ទាំងអ្នកដែលកំពុងស្ថិតនៅក្នុងនិងក្រៅប្រទេស មិនឲ្យធ្វើនយោបាយម្នាក់ៗចំនួន៥ឆ្នាំ។
មន្រ្តីជាន់ខ្ពស់គណបក្សនេះមួយចំនួនធំបានភៀសខ្លួនទៅបរទេស ខណៈលោក សម រង្ស៊ី ដែលស្ថិតនៅបរទេសស្រាប់នាពេលនោះ បានប្រកាសបង្កើតចលនាសង្គ្រោះជាតិ។
មុនបន្តិចនៃការរំលាយគណបក្សប្រឆាំង ដែលជាគណបក្សទទួលបានការគាំទ្រជាង៤០ភាគរយនៅទូទាំងប្រទេសក្នុងការបោះឆ្នោតក្រុមប្រឹក្សាឃុំ សង្កាត់ឆ្នាំកន្លងទៅ លោក កឹម សុខា ប្រធានគណបក្សនេះក៏ត្រូវបានសមត្ថកិច្ចចាប់ខ្លួន និងចោទប្រកាន់ពាក់ព័ន្ធនឹងបទក្បត់ជាតិដូចគ្នា។ បច្ចុប្បន្ន លោក កឹម សុខា កំពុងស្ថិតក្នុងការដាក់ឲ្យឃុំខ្លួនក្នុងផ្ទះ ដោយមានការឃ្លាំមើលពីតុលាការ ក្រោយលោកត្រូវបានឃុំខ្លួនក្នុងពន្ធនាគារអស់រយៈពេលជាង១ឆ្នាំ។
ការរំលាយ និងការដកបក្សជំទាស់ដ៏ធំនៅកម្ពុជាចេញពីការបោះឆ្នោតថ្នាក់ជាតិ កាលពីថ្ងៃទី២៩ ខែកក្កដា បានធ្វើឲ្យគណបក្សប្រជាជនកម្ពុជារបស់លោក ហ៊ុន សែន ទទួលជ័យជម្នះភ្លូកទឹកភ្លូកដី និងគ្រប់គ្រងប្រទេសដោយឯកបក្ស៕
