អភិបាលខេត្តកណ្តាលអះអាងថាសមត្ថកិច្ចកំពុងតែស្រាវជ្រាវតាមនីតិវិធីច្បាប់ក្នុងការស្វែងរកជនបង្ក ឬ អ្នកពាក់ព័ន្ធក្នុងរឿងជម្លោះដីធ្លីដែលមានការបាញ់ប្រហារបណ្តាលឲ្យប្រជាពលរដ្ឋម្នាក់រងរបួសជាទម្ងន់។
កាលពីពេលកន្លងទៅអភិបាលខេត្តកណ្តាល លោកគង់ សោភ័ណ្ឌ បានបញ្ជាក់ថានេះជាការបាញ់ផ្លាតចំពីសំណាក់ក្រុមទាហានតែប៉ុណ្ណោះ ខណៈពួកគេប្រឈមមុខនឹងការតវ៉ារបស់ប្រជាពលរដ្ឋរាប់រយនាក់។
លោក គង់ សោភ័ណ្ឌ ប្រាប់ VOA នៅថ្ងៃច័ន្ទនេះថា សមត្ថកិច្ចនិងព្រះរាជអាជ្ញានៃតុលាការខេត្តកណ្តាលកំពុងតែស្រាវជ្រាវរកអ្នកពាក់ព័ន្ធក្នុងការបាញ់ប្រហារនេះ។ លោកបន្តថាប្រជាពលរដ្ឋចង់បានដំណោះស្រាយមួយសមរម្យដោយស្នើកុំឲ្យប្រើប្រាស់គ្រឿងចក្រឈូសឆាយដីនាពេលនេះ ដោយសារទំនាស់មិនទាន់ត្រូវបានដោះស្រាយនៅឡើយ។
លោកថ្លែងថា៖ «គោលបំណងគាត់ចង់បាន សូមដោះស្រាយគោលនយោបាយឲ្យគាត់ឲ្យបានច្បាស់ លឿន។ ទីពីរគាត់សូមឲ្យធ្វើម៉េចកុំឲ្យដាក់គ្រឿងចាក់កាយដោយគាត់មិនទាន់បានសំណងឲ្យសមសមស្រប»។
អភិបាលខេត្តកណ្តាលបន្ថែមថារដ្ឋបាលខេត្តបានយល់ព្រមតាមសំណើរបស់ប្រជាពលរដ្ឋដោយព្យាយាមសិក្សា និងរកដំណោះស្រាយជាមួយអន្តរក្រសួង ដើម្បីផ្តល់សំណងសមរម្យតាមនីតិវិធីច្បាប់។
កាលពីថ្ងៃទី៣ ខែមិថុនា ពលរដ្ឋក្នុងជម្លោះដីធ្លីម្នាក់ គឺលោក មុំ ចាន់ថា អាយុ៥៦ឆ្នាំ រស់នៅក្នុងឃុំទួលពេជ្រ ស្រុកអង្គស្នួល បានរងរបួសដោយការបាញ់ប្រហារពីកម្លាំងទាហានរាប់សិបនាក់ ដោយគ្រាប់កាំភ្លើងត្រូវស្មាខាងធ្វេង។
លោក មុំ ចាន់ថា ជាជនរងគ្រោះត្រូវគ្រាប់កាំភ្លើង បានប្រាប់ VOA នៅថ្ងៃច័ន្ទនេះថាលោកសុំឲ្យអាជ្ញាធរជួយដោះស្រាយធ្វើយ៉ាងណាឲ្យលោកបានជាសះស្បើយខណៈលោកកំពុងបារម្ភអំពីជីវភាពគ្រួសារ ដោយសារលោកមិនអាចធ្វើការបាននៅពេលនេះហើយដីធ្លីរបស់លោកសរុបជាងកន្លះហិកតានឹងបាត់បង់នាពេលខាងមុខ។ លោកចង់បានដំណោះស្រាយដ៏យុត្តិធម៌មួយក្នុងរឿងទំនាស់ដីធ្លីនេះ។
លោកថ្លែងថា៖ «ធ្វើម៉េចឲ្យតែគាត់ជួយដោះស្រាយខ្ញុំឲ្យមើល[ព្យាបាល]ឲ្យបានជាទៅ។ ជីវភាពរបស់ខ្ញុំហ្នឹងណាដែលខ្ញុំ[ត្រូវទាហាន]បាញ់ត្រូវខ្ញុំខាត់បាត់បង់វាអស់ច្រើនដែរ។ បន្តិចបន្ទួចស្តូចស្តើងអីចេះតែគិតឲ្យប្រជាពលរដ្ឋទៅប្រជាពលរដ្ឋក៏មិនថាអីដែរឲ្យតែគិតឲ្យយកអីយកទៅ»។
លោកបន្តថាដោយសារតែមិនមានអ្នកណាម្នាក់នៅផ្ទះមើលថែទាំកូនៗរបស់លោកនិងមិនមានអ្នកណាម្នាក់មើលថែរូបលោកផ្ទាល់នៅឯមន្ទីរពេទ្យក្នុងរាជធានីភ្នំពេញខណៈភរិយារបស់លោកត្រូវបានពេទ្យយកទៅធ្វើចត្តាឡីស័កក្រោយសង្ស័យមានអាការៈជំងឺកូវីដ១៩លោក មុំ ចាន់ថាក៏បានសុំពេទ្យទៅសម្រាកព្យាបាលបន្តនៅផ្ទះរបស់លោកក្នុងខេត្តកណ្តាលវិញ ហើយពេទ្យបានយល់ព្រម។
ខណៈដៃកំពុងតែព្យួរសេរ៉ូមនិងនៅមានការឈឺចាប់ដោយរបួសស្នាមនៅឡើយកសិករមានកូន៤នាក់រូបនោះបញ្ជាក់ថា៖ «អញ្ចឹងដល់ពេលគេយកប្រពន្ធខ្ញុំមកខ្ញុំអត់មានលុយចាយរលីងប្រពន្ធខ្ញុំយកមកអស់រលីងគេអត់ទុកឲ្យយើងផងហើយប្រពន្ធយកលុយឲ្យខ្ញុំគេអត់ឲ្យយកឲ្យទៀតគេបង្ខំឲ្យប្រពន្ធខ្ញុំឡើងមកប្រឹបៗបណ្តោយដល់អញ្ចឹងខ្ញុំដាច់បាយម្សិលមិញ ដាច់ឡើងមុខដូចខ្មោចនិយាយត្រង់ហ្មង។ដល់ពេលហើយខ្ញុំលើកដៃសំពះពេទ្យសុំពេទ្យចេញបានចេញមកយប់មិញហ្នឹង»។
ជនរងគ្រោះនៅមានភាពស្ទាក់ស្ទើរក្នុងការជំរុញស្វែងរកដំណោះស្រាយតាមផ្លូវច្បាប់លើករណីរបស់លោក។ លោក មុំ ចាន់ថាឲ្យដឹងថាលោកក៏ទទួលបានជំនួយជាថវិកាពីអាជ្ញាធរពាក់ព័ន្ធផងដែរ។
លោក អំ សំអាត នាយករងផ្នែកទទួលបន្ទុកកម្មវិធីឃ្លាំមើលនៃអង្គការសិទ្ធិមនុស្សលីកាដូ បានប្រាប់ VOA ថាទោះបីជាជនរងគ្រោះមានការភ័យខ្លាចក្នុងការដាក់ពាក្យបណ្តឹងស្វែងរកមុខជនបង្កមកផ្តន្ទាទោសក៏ដោយ នេះជាករណីព្រហ្មទណ្ឌ ដែលព្រះរាជអាជ្ញាត្រូវតែមានចំណាត់ការហើយស៊ើបអង្កេតតាមស្វែងរកជនបង្កមកផ្តន្ទាទោស៕
