ភ្ជាប់​ទៅ​គេហទំព័រ​ទាក់ទង

ដំណើរ​ការ​ប្តឹង​រក​យុត្តិធម៌​ឲ្យខ្មែរស្ត្រី​បម្រើ​គេ​នៅ​ម៉ាឡេស៊ី​ ​ត្រូវ​រាំងស្ទះ


ឪពុក​ម្តាយ​របស់​កុមារី​ចំប៉ី ដែល​ត្រូវ​ទទួល​រង​ការ​វាយ​ធ្វើ​បាប​ពេល​ធ្វើ​ជា​អ្នក​បម្រើ​គេ​នៅ​ក្នុង​ផ្ទះ​​នៅ​ប្រទេស​ម៉ាឡេស៊ី។

បទ​យក​ការណ៍​ភាគ​ទី​៣​ដែលជា​ភាគបញ្ចប់

គ្រួសារ​របស់​ជន​រងគ្រោះ​ដែលបាន​ទៅ​ធ្វើការ​ជា​អ្នក​បម្រើ​តាម​ផ្ទះគេនៅ​ប្រទេស​ម៉ាឡេស៊ី​បាន​បង្ហាញ​ក្តី​សង្ឃឹម​តិចតួច​ថា​ ​នឹង​ទទួល​បាន​យុត្តិធម៌​ ​ដោយ​សារ​ពាក្យ​បណ្តឹង​របស់​ពួកគេ​ប្រឆាំង​នឹង​មេខ្យល់​និង​ក្រុមហ៊ុនជ្រើសរើសពលករ​ទៅ​ក្រៅ​ប្រទេស​នោះ​មិន​ត្រូវ​បាន​គេ​ដោះស្រាយ។

ថ្វី​បើ​ស្ថាន​ភាព​របស់​តៃ ចំប៉ី​បាន​ប្រសើរ​ឡើង​វិញ​បន្តិ​ច​ក៏​ដោយ​ ​ក៏​ឪពុកម្តាយ​របស់​នាង​នៅ​មិន​ទាន់​ស្ងប់​ចិត្ត​នៅ​ឡើយ​ដែរ​ ​ដោយ​ពួកគេត្រូវ​ការ​យុត្តិធម៌​និង​ការ​ទទួល​ខុស​ត្រូវ​ចំពោះ​អ្វីដែល​បាន​កើត​ឡើង​មកលើ​កូន​ស្រី​របស់​ពួកគេ។

តៃ ចំប៉ី ​ដែល​រស់នៅ​ក្នុង​ភូមិដំណាក់​ចិន​ ​ឃុំរស្មី​ ​ស្រុក​រវៀង ​ខេត្ត​ព្រះវិហារ​នេះ​ ​បាន​ទៅ​ធ្វើ​ជា​អ្នក​បម្រើ​តាម​ផ្ទះ​គេ​នៅ​ប្រទេស​ម៉ាឡេស៊ី​អស់​រយៈ​ពេល​៧​ខែ​ ​តាម​រយៈ​ក្រុម​ហ៊ុន​ជ្រើស​រើស​ពលករ​មួយ​ឈ្មោះ ​TSE​ ​ហើយ​វិលត្រឡប់​មក​ផ្ទះ​វិញ​ក្នុង​សភា​ព​ខុស​ប្រក្រតីទាំង​អាកប្បកិរិយា​និង​ការ​និយាយ​ស្តី ​ដែល​ឪពុកម្តាយ​និង​អ្នក​ភូមិ​របស់​នាងចាត់​ទុក​ថា​ ​ដូច​ជា​មនុស្ស​ឆ្កួត។

ចំប៉ី​អះអាង​ថា​ ​នាង​ត្រូវ​បាន​ថៅកែ​និង​ភ្នាក់ងារ​របស់​ក្រុមហ៊ុន​នៅ​ប្រទេស​ម៉ាឡេស៊ី​វាយ​ធ្វើ​បាប​យ៉ាង​ដំណំដោយ​ដៃ​ ​ដំបង ​ការ​ភ្ជង់​កាំភ្លើង​គំរាមនិង​ការ​បង្ខាំង​ក្នុង​បន្ទប់ដែល​ត្រជាក់​ខ្លាំង​ជាដើម​ ​នៅក្នុង​អំឡុងពេល​ដែល​នាង​ស្នាក់​នៅ​និង​ធ្វើការ​ជា​អ្នក​បម្រើតាម​ផ្ទះ​គេ​នៅ​ទី​នោះ។

ក្រុមហ៊ុន ​TSE ​បាន​ផ្តល់​ប្រាក់​ចំនួន​២លាន​រៀល​ដល់​គ្រួសាររបស់​យុវតី​តៃ ចំប៉ី​ ​បន្ទាប់ពីអតីត​អ្នក​បម្រើ​តាម​ផ្ទះ​គេ​នៅ​ប្រទេស​ម៉ាឡេស៊ី​រូបនេះ​ត្រូវ​បាន​បញ្ជូន​វិល​ត្រឡប់​មក​ប្រទេស​កម្ពុជា​វិញដោយ​មាន​សភាព​ដូច​ជា​មនុស្ស​ឡប់​សតិ​កាល​ពី​ជាង​២ខែ​មុននោះ។

អ្នក​ស្រី​សៅ អ៊ោន​ ​ម្តាយ​របស់ចំប៉ី​ ​មាន​ប្រសាសន៍​ថា​ ​ចំនួន​ទឹក​ប្រាក់​នេះ​មិន​គ្រប់គ្រាន់​ដើម្បី​ធ្វើ​ឲ្យ​អ្នក​ស្រី​ស្ងប់​ចិត្ត​នោះ​ទេ។

«លុយ​២លាន​មិន​បាន​ស្មើ​ជីវិត​កូន​ខ្ញុំ​មួយ​ទេ។​ ​កាល​ដើម​កូន​ខ្ញុំ​ល្អ​ ​ប៉ុន្តែ​តំណាក់​កាល​នេះ​យ៉ាង​ម៉ិច​បាន​ជា​កូន​ខ្ញុំ​វិល​ត្រឡប់​ពី​ប្រទេស​ក្រៅ​វិញ​ ​មក​ដល់​ប្រទេស​ខ្លួន​ឯង​វិញ​កើត​ឆ្កួត​កើត​រម៉ើល»។

អ្នក​ស្រី​សៅ អ៊ោន​មាន​ប្រសាសន៍​បន្ថែម​ថា​ ​អ្នក​ស្រី​ចង់​បានសំណង​ជា​ទឹកប្រាក់​យ៉ាង​តិច​ចំនួន​២​ពាន់​ដុល្លារ​សហ​រដ្ឋ​អាមេរិកសម្រាប់​យក​មក​ព្យាបាល​ចំប៉ី​ ​ហើយក៏​បាន​ប្តឹងទាមទារ​ឲ្យ​ក្រុមហ៊ុន ​TSE ​និង​អ្នក​ជ្រើសរើស​ពលករ​ក្នុងស្រុក​ឈ្មោះ​ សៀ ទ្រីកួយ​និង​ភរិយា​របស់គាត់ឈ្មោះ​តុន រ៉ាន់​ ឲ្យ​ទទួល​ខុស​ត្រូវនៅ​ចំពោះ​មុខ​ច្បាប់ចំពោះ​ហេតុ​ការណ៍ដែលបាន​កើត​ឡើង​មកលើ​កូន​ស្រី​របស់​អ្នកស្រី។

ប៉ុន្តែ​ពាក្យ​បណ្តឹង​របស់​អ្នក​ស្រី​សៅ​ អ៊ោន​និងប្តី​របស់​គាត់​គឺ​លោក​រស់ ឈឿន​នោះ​ត្រូវ​បាន​អាជ្ញាធរ​បញ្ជូន​ត្រឡប់​មក​ឲ្យ​ពួកគាត់វិញ​ចំនួន​៣​ដង​រួចមក​ហើយ​ ​ដោយពួកគេ​អះអាង​ថា​ ពាក្យបណ្តឹង​នោះ​សរសេរ​មិន​ត្រឹម​ត្រួវ។

លោក​រស់ ឈឿន​ ​ឪពុក​របស់​ចំប៉ី​ មានប្រសាសន៍នៅ​លើ​ខ្ទម​ចម្ការ​របស់​លោកដែល​ស្ថិត​នៅ​ចម្ងាយ​ជាង​២០​គីឡូម៉ែត្រ​ពី​ផ្ទះ​ថា​ ​លោក​មាន​សង្ឃឹម​តិចតួច​ណាស់​ថា​ ​នឹង​ទទួល​បាន​យុត្តិធម៌​នោះ។

«ខ្ញុំ​គ្មាន​សង្ឃឹមទេ​ ​បើ​ស្ងាត់​រហ៊ាម​អញ្ចេះ។​ ឃើញតែ​ហៅ​សួរៗ​ប៉ុណ្ណឹង​ឯង​ ​មិន​ឃើញ​និយាយ​អី​ផង»។

លោក​សុខ លុយ​ មេឃុំ​រស្មី ​ស្រុក​រវៀង​នេះ​ ​មាន​ប្រសាសន៍​ថា​ ​លោក​បាន​ចុះ​ហត្ថលេខា​លើពាក្យ​បណ្តឹង​របស់​ឪពុកម្តាយ​តៃ ចំប៉ី​នេះ​ ​បី​ដង​រួច​មក​ហើយ​ ​ហើយ​ក៏បាន​បញ្ជូន​ពាក្យ​បណ្តឹង​នោះទៅ​ឲ្យ​អាជ្ញាធរ​ស្រុក​រួច​ហើយ​ដែរ។

«ធ្វើ​បី​សារ​ហើយ​ ​ធ្វើ​ម្តង​ថា​ ​ខុស​ទៅ​ដល់​ខេត្ត​ខុស​ ​មក​ធ្វើ​ម្តងទៀត។ លើក​ទី​២​បញ្ជូន​ដល់​កន្លែងការងារ​ ​គេ​ថាខុស​ ​បញ្ជូនមក​មួយ​សារ​ទៀត​ ​ឲ្យ​ធ្វើ​ម្តង​ទៀត។​ ខ្ញុំ​ស៊ីញ៉េ​ឲ្យ​បី​ដង​ហើយ»។

លោកសុខ លុយ​មាន​ប្រសាសន៍​ថា​ ពាក្យ​បណ្តឹង​នោះ​ត្រូវ​បាន​គេ​អះអាង​ថា​ សរសេរ​ខុស​ ត្រង់ការ​បញ្ជាក់​ថា​ ​យុវតី​តៃ​ ចំប៉ី​ត្រូវ​បាន​ភ្នាក់​ងារ​ក្រុមហ៊ុនវាយ​ធ្វើ​បាប​រហូត​ដល់​ឡប់​សតិ​ ​ទើប​បញ្ជូន​មក​ប្រទេស​កម្ពុជា​វិញ។

ប៉ុន្តែ​លោក​ឯ សារ៉ូ ​អភិបាល​ស្រុករវៀង​ ​មាន​ប្រសាសន៍​ថា​ ​លោក​ពុំ​ដែល​ទទួល​បាន​ពាក្យ​បណ្តឹង​របស់​គ្រួសារ​តៃ ចំប៉ីនេះ​ទេ​ ​ដោយ​លោក​អះអាង​ថា​ ​រាល់​ការធ្វើ​លិខិត​ស្នាម​ក្នុង​ការ​ជ្រើសរើស​និង​បញ្ជូល​ពលករ​ក្នុង​ស្រុក​របស់​លោក​ឲ្យទៅ​ធ្វើ​ការ​នៅ​ក្រៅ​ប្រទេស​នោះ​គឺ​ធ្វើ ឡើង​ត្រឹម​ថ្នាក់​ភូមិ​ និង​ឃុំ​ជាមួយ​ក្រុមហ៊ុន​ជ្រើសរើស​ពលករ​ទៅ​ក្រៅ​ប្រទេស​តែ​ប៉ុណ្ណោះ។

អ្នក​ស្រី​តុន រ៉ាន់​ និង​លោក​សៀ ​ទ្រី​កួយ​ ដែល​បាន​ជ្រើសរើស​តៃ ចំប៉ី​ឲ្យ​ទៅធ្វើ​ការជា​អ្នក​បម្រើ​តាម​ផ្ទះគេនៅ​ប្រទេស​ម៉ាឡេស៊ី​នោះ​ ​មាន​ប្រសាសន៍​នៅ​អែប​នឹង​ហាង​ខារ៉ាអូខេ​របស់​អ្នក​ទាំង​ពីរ​ក្នុង​ស្រុក​រវៀង​នេះ​ថា​ ​លោក​និង​លោក​ស្រីជ្រើស​រើស​ពលករ​ទៅ​ធ្វើ​ការ​នៅ​ប្រទេស​ម៉ាឡេស៊ី​ដោយ​ស្របច្បាប់​ ​ដូច្នេះ​ការទទួល​ខុស​ត្រូវ​ចំពោះ​ហេតុ​ការណ៍​ដែល​កើត​ឡើង​មកលើ​តៃ ចំប៉ីនោះ​គឺមិន​មែន​ស្ថិត​នៅ​លើ​លោកនិង​លោក​ស្រី​ទាំង​ស្រុង​នោះ​ទេ។

«គេ​ប្តឹង​ ​មាន​តែ​ខ្ញុំ​ទទួល​ខុស​ត្រូវ​ដែរ។​ ប៉ុន្តែចាំ​មើល​គេ​ស្រាវជ្រាវ​ ​ពីព្រោះ​មនុស្ស​នេះ​នៅ​កន្លែង​ Agency​ វា​បាន​បង្ក​រឿង​ពីរ​បី​ដង​ដែរ»។

លោក​សេង សិទ្ធិជ័យ​ អគ្គ​នាយក​ក្រុមហ៊ុន​ TSE​ មាន​ប្រសាសន៍​ថា​ ​ក្រុមហ៊ុន​របស់​លោក អាច​មាន​លទ្ធភាពផ្តល់​ជូន​គ្រួសារ​របស់​យុវតី​តៃ ចំប៉ី​ត្រឹម​តែ​២លាន​រៀល​ប៉ុណ្ណោះ​សម្រាប់​ការ​ចំណាយ​ទៅ​លើ​ការ​ព្យាបាល​នាង។

«ចង់​និយាយ​ថា​ ​ក្រុមហ៊ុន​ជួយ​ឧបត្ថម្ភ​ប៉ុណ្ណឹង​តាម​កម្រិត​របស់​ក្រុមហ៊ុន។​ ចង់​ជួ​យ​គាត់​ដែរ​ ​ធ្វើ​យ៉ាងម៉ិច​ ​បើ​កើត​រឿង​អញ្ចឹង​ហើយ។​ យើង​ក៏​អត់​ចង់​ឲ្យ​កើត​ដែរ»។

លោក​សេង សិទ្ធិជ័យ​មាន​ប្រសាសន៍​បន្ថែមថា​ ​ក្រុមហ៊ុន​របស់​លោក​ក៏​សុខចិត្ត​ជួយ​នាំ​តៃ ចំប៉ីទៅ​ពិនិត្យ​ព្យាបាល​នៅ​ឯ​មន្ទីរពេទ្រ​មិត្តភាព​ខ្មែរ​ ​សូវៀត​ ដែល​ជា​មន្ទីរពេទ្រ​រដ្ឋ​ ​ក្នុង​ទីក្រុង​ភ្នំពេញ​ទទួល​ពិនិត្យ​ ​និង​ព្យាបាល​ជំងឺ​ផ្លូវចិត្ត​ ​ប្រសិន​បើ​គ្រួសារ​របស់​នាង​នាំ​យក​នាង​ទៅ​ព្យាបាល​នៅ​ទីក្រុង​ភ្នំពេញ​នោះ។

សូម​បញ្ជាក់​ថា​ ​ក្រសួង​ការងារ​និង​បណ្តុះ​បណ្តាល​វិជ្ជាជីវៈ​បាន​កំណត់​ឲ្យ​ក្រុមហ៊ុន​ឯកជន​ដែល​ជ្រើសរើស​និង​បញ្ជូន​ពលករ​ឲ្យ​ទៅ​ធ្វើ​ការ​នៅ​ក្រៅ​ប្រទេស​ ​ត្រូវ​តម្កល់​ប្រាក់​ចំនួន​១០​ម៉ឺន​ដុល្លារ​សហ​រដ្ឋ​អាមេរិកនៅ​ក្នុង​គណនី​របស់​ក្រសួង​ ​សម្រាប់​ប្រើប្រាស់​ជា​សំណង​ដល់​ពលករ​ក្នុង​ករណី​ដែល​មាន​ឧបទ្ទវហេតុ​អាក្រក់​ណាមួយ​កើតឡើង​ចំពោះ​ពលករដែល​ទៅ​ធ្វើ​ការ​នៅ​ក្រៅ​ប្រទេស​នោះ។

លោក​វង សូត ​រដ្ឋមន្រ្តី​ក្រសួង​ការងារ​ ​និង​បណ្តុះបណ្តាល​វិជ្ជាជីវៈ​ មាន​ប្រសាសន៍​ប្រាប់​ក្រុម​អ្នក​តំណាងរាស្រ្ត​ក្នុង​សភា​កាល​ពី​ខែ​តុលាកន្លង​ទៅ​នេះថា​ ​ក្រសួង​របស់​លោក​បាន​រៀបចំ​ធ្វើ​កិច្ច​សន្យា​ជាមួយ​គ្រប់​បណ្តា​ក្រុមហ៊ុន​ជ្រើសរើស​ពលករទៅ​ក្រៅ​ប្រទេស​ដែល​បាន​ចុះ​បញ្ជី​ជា​មួយ​ក្រសួង​របស់​លោក​ហើយ។

«ក្រសួង​បាន​ដំណើរ​ការ​ពង្រឹង​ការ​គ្រប់​គ្រង​តាម​រយៈ​ការ​រៀបចំ​ឯកសារ​សំខាន់ៗ​មួយ​ចំនួន​ទាក់​ទង​នឹង​ទេសន្តរ​ប្រវេសន៍​ការងារ​ ​ដូចជា​ ​រៀបចំ​ជា​កិច្ច​សន្យា​គម្រូ​សម្រាប់​ការ​អនុវត្ត​ ដោយ​ឯកភាព​ចំពោះ​គ្រប់​ក្រុមហ៊ុន»។

ប៉ុន្តែ​លោក​ពុំបាន​បញ្ជាក់​អំពី​វិធានការ​ជាក់លាក់​នៅ​ក្នុងកិច្ច​សន្យា​ទាក់​ទង​នឹងការ​ផ្តល់​សំណង​ដល់​ជន​រងគ្រោះ​ដែល​ចេញ​ទៅ​ធ្វើ​ការ​នៅ​ក្រៅ​ប្រទេស​តាម​រយៈ​ក្រុមហ៊ុន​ឯក​ជន​ទាំង​នោះ​ឡើយ។

អ្នក​ស្រី​ ពុង ឈីវកេក​ ប្រធាន​អង្គការ​លីកាដូ​ ​មាន​ប្រសាសន៍​ថា​ ​រដ្ឋាភិបាល​គួរតែ​ជា​អ្នក​រៀបចំ​ជ្រើសរើស​និង​បញ្ជូន​ពលករ​ទៅ​ក្រៅ​ប្រទេស​ដោយ​ខ្លួនឯង​ ​ជា​ជាង​អនុញ្ញាត​ឲ្យ​ក្រុមហ៊ុន​ឯកជន​ជា​អ្នកធ្វើ​កិច្ចការងារ​នេះ​ ​ដើម្បី​ធានា​សុវត្ថិភាព​ពលករ​ចំណាក​ស្រុក​ទៅ​ធ្វើ​ជាអ្នក​បម្រើ​តាម​ផ្ទះ​គេ​នៅក្រៅ​ប្រទេស​នោះ។

«បើ​ធ្វើ​របៀប​អញ្ចឹង​ខ្ញុំ​ថា​ ​ការពារ​បាន​ច្រើន​ណាស់​ ​មិន​សូវ​មាន​ការ​រំលោភ​សិទ្ធិមនុស្ស​ទេ។​ ទី​១​ ​មេខ្យល់​ដែល​យក​ទៅ​ខុស​គោលការណ៍​អត់​បាន​ទេ​ ​ព្រោះ​រដ្ឋា​ភិបាល​ជា​អ្នក​រើស​ ​ហើយ​លោក​ជូន​ដំណើរ​ទៅ​ទៀត។​ ​ចុះ​មាន​អី​នៅ​ក្រសួង​ការងារ​យើង​មាន​មនុស្ស​ច្រើ​ន​សឹង​អី»។

ទោះជា​យ៉ាងណា​ក៏ដោយ​ ​ឪពុកម្តាយ​របស់​តៃ​ ចំប៉ី​និយាយ​ថា​ ​ពួកគេ​ចង់​ឃើញ​យុត្តិធម៌​និង​ការ​ទទួល​ខុស​ត្រូវ​ដ៏​សមស្របមួយ​សម្រាប់​តៃ ចំប៉ី ​ដើម្បី​ឲ្យ​កូន​ស្រី​របស់​ពួកគេ​នេះ​អាច​វិល​ត្រឡប់​មក​រក​ជីវិត​របស់​នាង​ក្នុង​សភាពប្រក្រតី​ដូច​មុន​ពេល​ចេញ​ទៅ​ធ្វើការ​នៅ​ប្រទេស​ម៉ាឡេស៊ី​នោះ៕

XS
SM
MD
LG