ភ្ជាប់​ទៅ​គេហទំព័រ​ទាក់ទង

វិបត្តិ​បរមាណូ​ជប៉ុន​កាន់​តែ​មាន​សភាព​ធ្ងន់ធ្ងរ​ឡើង


ក្រុម​មន្ត្រី​ដែល​ស្លៀក​សម្លៀក​បំពាក់​ការពារ​ជាតិ​វិទ្យុសកម្ម កំពុង​​ណែនាំ​ពលរដ្ឋ​ដែល​បាន​ស្ថិត​នៅ​ក្នុង​ចម្ងាយ​២០​គ.ម.​ពី​រោងចក្រ​នុយក្លេអ៊ែរ​ហ្វ៊ូគូស៊ីម៉ា ដែអ៊ីជិ (Fukushima Dai-ichi) ក្នុង​ក្រុង Koriyama ខេត្ត Fukushima ប្រទេស​ជប៉ុន ឲ្យ​ចូល​ថត (scan) ក

វិបត្តិ​នៅ​ឯ​រោងចក្រ​បរមាណូ​ជប៉ុន​ដែល​មាន​ការ​ខូចខាត​នៅ​ក្នុង​ផ្នែក​ឦសាន​ប្រទេស​កំពុង​មាន​សភាព​ធ្ងន់ធ្ងរ​ទ្បើងៗ។​ ពួកមន្ត្រី​ជាន់ខ្ពស់​របស់​រដ្ឋាភិបាល​បាន​ទទួល​ស្គាល់​ថា​មាន​ការ​លេច​វិទ្យុសកម្ម​ច្រើន​ជាងមុន​និង​មាន​ការផ្ទុះ​នៅ​ក្នុង​ម៉ាស៊ីន​រ៉េអាក់ទ័រ (reacteurs) ​ទាំងអស់​បី។​ កាល​ពី​ព្រឹក​ថ្ងៃអង្គារ​ លោក​នាយករដ្ឋមន្ត្រី​ជប៉ុន​ Naoto​ Kan​ បាន​ថ្លែង​សារ​មួយ​ផ្សាយ​តាម​ទូរទស្សន៍​នៅ​ទូទាំង​ប្រទេស​ទៅ​កាន់​ប្រជាពលរដ្ឋ​ ក្រោយ​ពី​ការផ្ទុះ​នៅ​ឯ​អគារ​ reacteur​ ទី​បី​បាន​ត្រូវ​បញ្ជាក់​ថា​ប្រាកដ​បាន​កើត​មាន​មែន​នៅ​ Fukushima។

ដោយ​សុំ​ឱ្យ​សាធារណជន​យក​ចិត្ត​ទុកដាក់​នឹង​ពាក្យ​សំដី​លោក​ដោយ​ស្ងប់ស្ងៀម​ លោក​ Kan ​បាន​ទទួល​ស្គាល់​ថា​ម៉ាស៊ីន​ reacteur​ មួយ​ក្នុង​បណ្តា​ម៉ាស៊ីន​ reacteur​ ដែល​ខូច​កំពុង​ប្រឈមមុខ​នឹង​គ្រោះថ្នាក់​ខ្លាំង​ជាង​មុន​ក្នុង​ការបញ្ចេញ​វិទ្យុសកម្ម​ទៅ​ក្នុង​បរិយាកាស។

លោក​នាយករដ្ឋមន្ត្រី​បាន​សុំ​ដល់​ជន​ទាំងទ្បាយ​ណា​ដែល​រស់​នៅ​រវាង​២០​និង៣០​គ.ម.​ពី​រោងចក្រ​នេះ​ឱ្យ​ឋិត​នៅ​ក្នុង​ផ្ទះ។ ​មនុស្ស​ប្រមាណ​២​សែន​នាក់​ដែល​រស់​នៅ​ជិត​រោងចក្រ​នេះ​បាន​ជម្លៀស​ចេញ​រួចស្រេច​ហើយ។

ក្រោយ​លោក​នាយករដ្ឋមន្ត្រី​បាន​បញ្ចប់​សេចក្តីថ្លែងការណ៍​របស់​លោក​ហើយលោក​ Yukio​ Edano​ អគ្គលេខាធិការ​គណៈរដ្ឋមន្ត្រី​បាន​ជួប​ជាមួយ​ពួក​អ្នក​កាសែត។

អ្នក​នាំពាក្យ​ជាន់ខ្ពស់​របស់​រដ្ឋាភិបាល​បាន​និយាយ​ថា​វិទ្យុសកម្ម​ដែល​បាន​រកឃើញ​នៅ​ក្នុង​ reacteur​ មួយ​ទៀត​ដែល​ខូច​គឺ​ reacteur​ លេខ​បី ​មាន​កម្រិត​ដែល​អាច​ធ្វើ​ឱ្យ​មាន​ផលបះពាល់​មិនល្អ​ដល់​មនុស្ស។

ការ​កើនទ្បើង​នៃ​កម្រិត​វិទ្យុសកម្ម​ដ៏​ខ្ពស់​បំផុត​ក្នុង​រយៈពេល​ខ្លី​នៅ​ឯ​រោងចក្រ​បរមាណូ​ Fukushima ​មាន​ចំនួន​៨​ដង​ច្រើន​ជាង​កម្រិត​ជា​មធ្យមភាគ​ដែល​មនុស្ស​ម្នាក់​អាច​ទទួល​បាន​ក្នុង​មួយ​ឆ្នាំ។

ក្រុមហ៊ុន​ Tokyo ​Electric​ Power​ បាន​ប្រកាស​ថា​ប្រព័ន្ធ​ធ្វើ​ឱ្យ​ reacteur​ ត្រជាក់​គ្មាន​ដំណើរការ​នៅ​ឯ​reacteur ​លេខពីរ​ក្នុង​រោងចក្រ ​Fukushima។ គ្រឿង​ឧបករណ៍​សម្រាប់​ធ្វើ​ឱ្យ​ត្រជាក់​បាន​ខូចខាត​ដោយសារ​ការរញ្ជួយ​ផែនដី​កាល​ពី​ថ្ងៃ​សុក្រ​ដែល​មាន​កម្លាំង​៩​និង​មហារលកសមុទ្រ​ tsunami។

ប្រែ​សម្រួល​ដោយ​ ឈឹម សុមេធ

XS
SM
MD
LG