ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជប៉ុន​ពង្រីក​តំបន់​ជម្លៀស​នៅ​ជុំវិញ​រោងចក្រ​បរិមាណូ


រោងចក្រ​ថាមពល​នុយក្លេអ៊ែរ​ ហ៊្វូគូស្ហ៊ីម៉ា​ ដៃអ៊ិជី (Fukushima Daiichi)
រោងចក្រ​ថាមពល​នុយក្លេអ៊ែរ​ ហ៊្វូគូស្ហ៊ីម៉ា​ ដៃអ៊ិជី (Fukushima Daiichi)

សេចក្តី​ព្រមាន​មួយ​អំពី​ការ​ជម្លៀស​ពលរដ្ឋ​នៅ​តំបន់​ជិតៗ​រោងចក្រ​ថាមពល​នុយក្លេអ៊ែរ​ ហ៊្វូគូស្ហ៊ីម៉ា​ ដៃអ៊ិជី​ដែល​ខូច​ខាត​នោះ​ ត្រូវ​ពង្រីក​កាន់​តែ​ធំ​ឡើង​កាល​ពី​ថ្ងៃ​សុក្រ​ទី​២២​ខែមេសា​ ដោយ​សារ​មាន​ក្តី​បារម្ភ​ច្រើន​អំពី​ការ​សាយភាយ​ធាតុ​វិទ្យុសកម្ម។ ដំណើរការ​នេះ​កើត​ឡើង​មួយ​ថ្ងៃ​បន្ទាប់​ពី​ជប៉ុន​ចាប់​ផ្តើម​អនុវត្ត​តាម​ច្បាប់​សម្រាប់​តំបន់​ដែល​គេ​ហាម​ឃាត់​ចម្ងាយ​២០​គីឡូម៉ែត្រ​នៅ​ជុំវិញ​រោងចក្រ​អគ្គិសនី។

សេចក្តី​ព្រមាន​ថ្មីមួយ​នេះ​គ្រប​ដណ្តប់​នៅ​ក្នុង​ទីក្រុង​ជា​ច្រើន​នៅ​ភាគ​ឦសាន​នៃ​ តំបន់​ហាម​ឃាត់​ជា​កំហិត។ ក្រុម​អ្នក​ស្រុក​ត្រូវ​គេ​ស្នើ​សុំ​ឱ្យចាកចេញ​ពី​តំបន់​នោះ​ ក្នុង​អំឡុង​ខែ​ខាង​មុខ។

មន្ត្រី​រដ្ឋាភិបាល​និយាយ​ថា​ គ្រោះ​ថ្នាក់​នោះ​គឺ​មក​ពី​កំណើន​បណ្តើរៗ​នៃ​ជាតិ​វិទ្យុសកម្ម​ដែល​កំពុង​កើត​ឡើង​ចាប់​តាំង​ពី​មាន​ការ​រញ្ជួយដី​ និង​មហា​រលក​យក្ស​ ស៊ូណាមិ​កាល​ពី​ថ្ងៃ​ទី​១១​ខែ​មិនា​ ហើយ​បាន​ធ្វើ​ឲ្យ​ខូច​ខាត​រោងចក្រ​ថាមពល នុយ​ក្លេអ៊ែរ​ ហ៊្វូគូស្ហ៊ីម៉ា ​ដៃអ៊ិជី។

ក្រុម​អ្នក​ស្រុក​អាច​នឹង​រងគ្រោះ​ដោយ​ទទួល​កម្រិត​ធាតុ​វិទ្យុសកម្ម​លើស​កម្រិតសុវត្ថិភាព​ប្រចាំឆ្នាំ​ ប្រសិន​បើ​ស្នាក់​នៅ​ក្នុង​តំបន់​ហាម​ឃាត់​នោះ។

លោក​នាយក​រដ្ឋមន្ត្រី​ Naoto Kan​ បាន​ថ្លែង​អំពី​សេចក្តី​ព្រមាន​នេះ​ នៅ​ឯ​សន្និសីទ​កាសែត​មួយថា​ការ​ជម្លៀស​ត្រូវ​ធ្វើ​ឡើង​ដើម្បី​សុវត្ថិភាព​អ្នកស្រុក។​ លោក​បាន​ព្រមាន​ថា​ទីក្រុង​ជាច្រើន​ទៀត​អាច​នឹងត្រូវ​ស្នើសុំ​ឲ្យ​ជម្លៀស​ចេញ​ដែរ​នៅ​ថ្ងៃ​អនាគត។

តំបន់​នានា​ដែល​មាន​បញ្ហា​ ជា​តំបន់​កសិកម្ម​យ៉ាង​ធំធេង​ ហើយ​ពលរដ្ឋ​ខ្លះ​បាន​ចាក​ចេញ​រួច​ហើយ។

ពលរដ្ឋ​ប្រហែល​៧.០០០​នាក់​ត្រូវ​គេ​ប៉ាន់​ប្រមាណ​ថា​នៅ​បន្ត​ស្នាក់​នៅ​ក្នុង​តំបន់ហាម​ឃាត់​នៅ​ឡើយ៕

ប្រែ​សម្រួល​ដោយ​ សុខ ខេមរា

XS
SM
MD
LG