តុលាការខេត្តកោះកុង កាលពីថ្ងៃច័ន្ទនេះបានបើកអង្គសវនាការដោយមិនឲ្យសាធារណជនចូលស្តាប់ការជំនុំជម្រះក្តីសកម្មជនបរិស្ថានបីរូបនៃចលនាមាតាធម្មជាតិក្នុងសំណុំរឿងទប់ស្កាត់ការបូមខ្សាច់នៅក្នុងខេត្ត ដែលនៅជាប់នឹងប្រទេសថៃនេះ។ នេះបើតាមការបញ្ជាក់ពីមន្ត្រីសិទ្ធិមនុស្សប្រចាំខេត្តកោះកុង។
សកម្មជនទាំងបីនាក់នៃចលនាមាតាធម្មជាតិ រួមមាន លោក សាន់ ម៉ាឡា លោក ទ្រី សុវិគា និងលោក ស៊ីម សំណាង។ ពួកគេត្រូវបានព្រះរាជអាជ្ញាតុលាការដំបូងខេត្តកោះកុង ចោទប្រកាន់ពីបទគំរាមកំហែង និងធ្វើឲ្យខូចខាត ដែលភ្ជាប់នូវបញ្ហាអ្វីមួយ ក្នុងអំឡុងពេលពួកគេធ្វើយុទ្ធនាការទប់ស្កាត់ការបូមខ្សាច់នៅខេត្តកោះកុង ហើយត្រូវចាប់ដាក់ពន្ធនាគារចាប់តាំងពីពាក់កណ្ដាលខែសីហា ឆ្នាំ២០១៥។
លោក អ៊ិន គង់ជិត មន្ត្រីសិទ្ធិមនុស្សនៃអង្គការការពារសិទ្ធិមនុស្សលីកាដូ (Licadho) បានប្រាប់ VOA នៅល្ងាចថ្ងៃច័ន្ទថា តុលាការបានបើកសវនាការ នៅព្រឹកថ្ងៃច័ន្ទ ដោយការសួរដេញដោលទៅលើសកម្មជនទាំងបីនាក់ មន្ត្រីអាជ្ញាធរស្រុកបទុមសាគរ តំណាងក្រុមហ៊ុន Direct Acess និងមន្ត្រីធនធានរ៉ែ។
លោកបន្តថា តុលាការបានបន្តសួរសាក្សីចំនួន១៦នាក់បន្ថែមទៀត នៅល្ងាចថ្ងៃច័ន្ទដដែលនោះ ទាក់ទិនសំណុំរឿងទប់ស្កាត់ការបូមខ្សាច់នេះ។ លោកបញ្ជាក់ថា សវនាការនេះមិនបានបើកឲ្យមានការចូលរួមពីក្រុមអង្គការសង្គមស៊ីវិលនោះទេ ដោយតុលាការប្រាប់ថា បន្ទប់អង្គសវនាការមានលក្ខណៈតូចចង្អៀត។
(ទស្សនាវីដេអូដកស្រង់ចេញពីទំព័រហ្វេកប៊ុករបស់ចលនាមាតាធម្មជាតិ ទាក់ទងនឹងដំណើរការជំនុំជម្រះក្តីសកម្មជនបីរូបនៃចលនាមាតាធម្មជាតិ)
ទាក់ទងនឹងការបិទបាំងនេះ លោក អ៊ិន គង់ ជិតថ្លែងថា យុវជនទាំងបីនាក់នេះមុខជាពិបាករកឃើញពន្លឺយុត្តិធម៌។
«យើងមើលទៅការរៀបចំដំណើរការនោះហាក់ដូចជាមានអ្វីជាអាថ៌កំបាំង ហើយយើងរពឹងថា យុត្តិធម៌ប្រហែលជាមិនអាចស្វែងរកបានចំពោះជនជាប់ចោទទាំងបីហ្នឹងទេ»។
មន្ត្រីសិទ្ធិមនុស្សរូបនេះបានបន្ថែមថា ប្រជាពលរដ្ឋប្រមាណ៩០នាក់ មកពីសហគមន៍នានាក្នុងខេត្តកោះកុង ដែលរងគ្រោះដោយសារការរំលោភបំពានដីធ្លី បានមកចូលរួមឃ្លាំមើលអង្គសវនាការនេះដែរ។
ការបើកសវនាការជម្រះក្តីសកម្មជនទាំងបីនាក់នេះបានកើតឡើង នៅក្រោយពេលដែលលោក Alejandro Gonzalez-Davidson ស្ថាបនិកនៃចលនាមាតាធម្មជាតិ បានប្តឹងទៅអង្គការសហប្រជាជាតិកាលពីខែមេសា ឆ្នាំ២០១៦ ដើម្បីសុំឲ្យមានការបញ្ឈប់ការធ្វើបាបដោយអំណាចតុលាការមកលើសកម្មជនការពារសម្បត្តិធម្មជាតិក្នុងខេត្តកោះកុង។
VOA ព្យាយាមទាក់ទងលោក អ៊ីវ ត្រាយ ព្រះរាជអាជ្ញារងនៃតុលាការខេត្តកោះកុងដើម្បីសុំការអធិប្បាយទាក់ទិនការបើកសវនាការនេះ តែមិនទាន់អាចទាក់ទងបានទេកាលពីល្ងាចថ្ងៃច័ន្ទ។
ចលនាមាតាធម្មជាតិបានធ្វើការយ៉ាងសកម្មនៅក្នុងកិច្ចការការពារបរិស្ថាននៅក្នុងខេត្តកោះកុង។ ក្រៅពីការតវ៉ាឲ្យបញ្ឈប់ការបូមខ្សាច់ដ៏មហន្តរាយដល់បរិស្ថាននេះ ក្រុមការពារបរិស្ថាននេះក៏បានទប់ស្កាត់មិនឲ្យមានការវិនិយោគទំនប់វារីអគ្គិសនីលើស្ទឹងអារ៉ែងនៃជួរភ្នំក្រវ៉ាញ ដែលវិនិយោគដោយក្រុមហ៊ុនចិនឈ្មោះ Sinohydro ផងដែរ។សកម្មភាពរបស់ពួកគេមិនបានធ្វើឱ្យអាជ្ញាធរ និងអ្នកពាក់ព័ន្ធមួយចំនួនសប្បាយចិត្តនោះទេ។
បន្ទាប់ពីការសាកសួរដេញដោលអស់រយៈពេលមួយថ្ងៃពេញនោះ តុលាការខេត្តកោះកុងបានប្រកាសផ្អាកអង្គសវនាការនៅម៉ោង៥និង៣០នាទីល្ងាចថ្ងៃច័ន្ទម្សិលមិញនេះ ហើយតុលាការនឹងបន្តអង្គសវនាការទៀតនៅថ្ងៃអង្គារនេះ៕
